Read Angami Naga Kediko Kerieu 18 Bible Online

Kediko Kerieu 18 - Angami Naga bible

Kediko Kerieu 18

¹Teisozha kekra sie teirü moketa cie seu cie Jihova die Elija ki vor di sie, “Voliecie, n thuo n khapie Ahab pekieshücie, sitse a cüsie tei perüpie kijüu gei shüshütuo” si.

²Süla Elija-e puo thuo puo pie Ahab pengutuoü vota. Süteikisü Samaria nu pekrie pie mhapuochü ba.

³Sitse Ahab-e kedi kiu mehoyakezhau Obadia kieshü (Obadia-e Jihova prei di lhouya;

⁴Jezebel-e Jihova siedzekesimiako dukhrikecü tei ki, Obadia siedzekesimia krie puo zelie, sidi mia hiepengoungou idi tsiepfü nunu keviewa, sidi niekhrüda mu dzü pie uko vachüshü.)

⁵Sitse Ahab-e sie Obadia üse, “Kijüu gei dzükhou peteko mu razha peteko nu vocie, gurako mu gadako la nha ngulie, sidi uko khunuo huo pejüwa molie vituo mu” sita.

⁶Süla unie-e kijü pete nu volieketuo la vo di unie donu kijüu kezalie, sidi Ahab-e puo rübei cha puonu vota, mu Obadia-e puo rübei cha kekrei puo nu vota.

⁷Mu Obadia-e cha nu tuo luokecü nu harie, Elija-e vor puo ze keselie, mu Obadia-e puo silie, di tetsu zere zhüta; sidi sie, “No a niepuu Elija te me?” idi pu.

⁸Sitse puo sie, “A süulie. Tuo volie, sidi a niepuu ki, Elija haki tuoü pushülie.”

⁹Sitse puoe sie, “A kephouma kicüpuo chüwata di no n kituou khapie Ahab dzienu shü di puo bu a dukhrituoüya ga?

¹⁰Jihova n Kepenuopfü rheiketuo mhiei, a niepuu seyie puorei morei kedirüvie puo nu rei n pfhü kemo jüte, mu ukoe sie, ‘Puo hanu ba mo’ sishü tse, mu puoe kediko mu seyieko bu n ngu moükecü rüsenutatuo.

¹¹Derei no tsie, ‘Tuo voliecie, sidi n niepuu ki, Elija haki tuoü pushülie.’

¹²Mu ae n kinunu tuota mumetha, Jihova Ruopfüe n pfü se a sikemora votatie; sidi ae vor di Ahab ki pushü, mu puo n ngulie kenjüta tse, puoe a dukhriwa zotie, a n kituou ha a nhicu nunu Jihova prei tuota.

¹³Jezebel-e Jihova siedzekesiko dukhri kecü ki ae kedipuo mhie di Jihova siedzekesiko mia kriepuo keviewa, hiepengoungou idi tsiepfü nunu, siro niekhrüda mu dzü pie uko vachüshü shikecü a niepuu kipushü mo me?

¹⁴Mu tsie noe sie, ‘Tuo volie, sidi n niepuu ki, Elija haki tuoücü pushülie,’ puoe a dukhriwa zotie” sishü.

¹⁵Sitse Elija sie, “Krodiko Jihova rheiketuo kemhie, a puo mhodzünu thayakezhau a thie a pie puo pengushü tou zotuo” sita.

¹⁶Süla Obadia-e Ahab ze kesetuoü vota, sidi puo pushü tsiu Ahab-e Elija ze kesetuoü vota.

¹⁷Ahab-e Elija ngu tse, Ahab sie puo ki, “Israel bie kesiephashüyakezhau no die?” si

¹⁸Sitse puoe puo diekela di sie, “A Israel kebvüshü mo; derei no, mu n puonuoko kikruko, niekoe Jihova diekhakeshü ze tuo mote, sidi niekoe Baalko siemedzi tuote.

¹⁹Süla noe tsie mia ketseshü di, Israel pete kie kengu pie Karmel kijüthou gei shüliecie, siro Baal siedzekesimia krie dia di hiepengou, mu Ashera siedzekesimia krie dia, Jezebel mizhü geinu mhacü mhakrieyakezhako kieshülie” sishü.

²⁰Süla Ahab-e Israel pete ki dielie ketseshü, sidi siedzekesiko bu vor, Karmel kijüthou geinu kengulie.

²¹Sitse Elija-e themia peteko penuo vor di sie, “Nieko kichie puo kenounie batieya ga? Mhanuü Jihovae u Kepenuopfü üliro puo siemedzilie; derei Baal üro, puo siemedzilie” sishü. Sitse themiako puo die yopuo rei kelalie mota.

²²Sitse Elija-e sie themiako ki, “A rübei, Jihova siedzekesimia a rübei zote, derei Baal siedzekesimia we mia krie dia di hiepengou ba.

²³Thudo kenie khapie hieko tsüshücie; sidi uko thuo uko la thudo puo kedalie, sidi süu khrie petselie, sidi süu pie sei gei piezhülie, derei mi pie sünu shü hie, mu a rei thudo kekreiu chü khrielietuo, sidi süu pie sei gei pie zhülietuo, tsiu mi pie sünu shülie lho.

²⁴Sidi nieko thuo nieko rhuoko kieshülie, mu a rei Jihova za kieshütuo, derei mi üse kelakeshü rhuo Ukepenuopfü kethoütuo” sita. Sitse pete rei sie, “Süu die kevi we” silie.

²⁵Sitse Elija sie Baal siedzekesiko ki, “N la thudo puo kedaliecie, sidi süu kese rieliecie, kekreilamonyü nieko we themia kra eru, sidi nieko rhuoko za kieshücie, derei mi pie süu nu shü hie” si.

²⁶Sidi ukoe thudo pie uko tsükeshüu lielie, sidi süu keselie, sidi khise nu vo theheketso sie, “O Baal, hieko pfhe rünyüshücie” idi Baal kie. Derei mhapfhe puo rei silie mo, morei uko die kelashü mo. Sitse ukoe pru rülhou pie chükelie ruosuobau whi bata.

²⁷Mu theheteita tse, Elija-e uko kre di sie, “Cha petoshülie; puoe terhuomia puo zotuo, mhale bata, morei mharapuo vota morei puo rüve tuota nhie, morei puoe zezhüta di puo kesoushü morosuo tatuo” sishü.

²⁸Sidi ukoe uko zhoki chü meliepeto phi, mu zhiechanuo tsiu rüngou pie uko gei di thezie kru parlie kemochie si bata.

²⁹Sidi, thehesieta tse, mu ukoe thevatie ruosuokechü teitso di diepu ba, derei mhapfhepuo rei vor mo, morei uko die kelashü mota.

³⁰Sitse Elija sie themiako ki, “A penuo vorlie” sishü, sitse themia pete rei puo penuo vorlie. Mu puoe Jihova ruosuoba tsoketau ketso lalie.

³¹Sidi Elija-e ketsie kerekenie chülie, Jakob nuonuoko seyie medzi di, Jihova die puo ki “N za pie Israel chütuowe” ikecü mhie di

³²mu ketsie süko pie puoe Jihova za nunu ruosuoba puo chülie mu puoe puokhie puomhou kheho thielie, süu mhatsia kemejü kenie balieketuo mese.

³³Tsiu puoe sei pie kese menuoshülie, sidi thudo-u khrielie, tsiu süu pie sei gei shüshü. Sidi sie, “Mhabou dia nu dzü pie tshushülie, sidi süu rupie kethe ruosuou gei tsiu seiu gei shücie” sishü

³⁴Süsie rei, “Va kenie rei chüshülie” sita, Sitse ukoe va kenie sishü. Mu puoe sie, “Va se rei chüshülie,” sita. Sitse ukoe va se chüshü.

³⁵Sitse dzüe ruosuobau khieümhou kru tsuta; sidi dzüthou khehoko tshuta.

³⁶Sidi thevatie ruosuokechü teiu vorlie tse, Elija siedzekesiu penuo vor di sie, “He-i, Jihova, Abraham, Isak mu Israel Kepenuopfü, thie noe Israel Kepenuopfü ükecü, mu ae n kituou zo ükecü mu ae mha hako pete n die nunu chü ükecü mia bu siliecie.

³⁷He-i Jihova, themia hako bu Jihova noe Kepenuopfü zoükecü silie, mu noe uko nou teshükerei se n kitsatie shülieketuo la a pfhe rünyüshücie” sishü.

³⁸Sitse Jihova mi tetsur, di kethe ruosuou, seiu, ketsieko mu nyopheko thewa mu kheho nu dzüko rei the pesowata.

³⁹Tsiu themia pete süu ngu tse, ukoe tetsu uzie zerepfü di sie, “Jihovae Kepenuopfü zowe, Jihovae Kepenuopfü zowe” sita.

⁴⁰Sitse Elija-e sie uko ki, “Baal siedzekesiko teliecie, mia puo bu rei tata hie” sishü. Sitse ukoe süko telie, mu Elija uko ze Kishon Rüu nu tsur di sünunu uko dukhriwa.

⁴¹Sitse Elija-e sie Ahab ki, “No sielie, di mhacümhakrieliecie; kekreilamonyü teirü se vorketuo pfhe si bate.”

⁴²Süla Ahab-e mhacümhakrietuoü vota. Mu Elija-e Karmel mezü gei khota; sidi puoe tsu kijü balie, di nuketsu puo khoudzanie donu zerepfü bata.

⁴³Sidi sie puo kituou üse, “Tsie tuo pesotsa vocie, dzükezhatsa mehoshücie” si, sitse puoe tuo kho, sidi mehoshü di sie, “Mhapuorei tuo molie” idi pu mu puoe sie, “Va thenie la vocie” si.

⁴⁴Sidi va thenie va, puoe sie, “Harie, dzükezha nunu kimhou kecünuo yopuo themia dzie tuoi di sierzhie” si. Sitse puoe sie, “Tuo kho di Ahab ki pushücie, teirü bu n kedeiwa molieketuo la, n guragari keselie di ketacie” ishülie.

⁴⁵Telhe kemo nu, tei-e zeiboui vorta, mu teirü pie mhapuochüta. Mu Ahab-e sielie, di Jezril nu vota.

⁴⁶Derei Jihova dzie-e Elija gei tuo; mu puo puo chie phalie, di ta Ahab mhodzü Jezril cha nu vota.