Read Angami Naga Kediko Kerieu 19 Bible Online

Kediko Kerieu 19 - Angami Naga bible

Kediko Kerieu 19

¹Siro Ahab-e Jezebel ki Elija chükeshüko pete, mu kedipuo kemhie di zhiecha pie siedzekesiko dukhriwate shikecü pushü.

²Sitse Jezebel-e dieliemia ketse pie Elija kishü di sie, “A sodu hateiki n kerheiro pie uko kemhiewa moü liro, terhuoko bu a gei sükemhie, mu sü kezie rei chüwacie,” sita.

³Sitse puoe michieta, sidi sielie di puo pekrulietuoükecü la tata, sidi Juda nu keba Beersheba nu vorlie, sidi sünu puo kituou khapie bawa.

⁴Derei puo thuo zo we khunhie chatuo tuo se rayha nu vota, sidi vo brumbo puo khro balie; sidi puoe puo bu siatanu cha di sie, “Ci zorei vite, he-i Jihova, tsie a kerheiro chüsetacie, kekreilamonyü ae a puonuoko ki vikuo molie” sita.

⁵Sidi puoe brumbo khro nu zekezhü ki, harie, teigeidieliemia puo vor puo bie di sie, “Sielie di mhacümhakriecie” sita.

⁶Tsiu puoe mehoshü mu, harie, ketsie gei niekhrüda riepie zhü, tsiu puo tsü ki dzübou puo nu dzü keba ngulie. Sidi puo cü mu krielie di la ke zhüta.

⁷Sitse Jihova dieliemia va kenieu la vor di puo bie di sie, “Sielie di mhacüliecie; mo liro rüveu n la rethortatuo eru” sita.

⁸Ru puoe sielie, sidi mhacümhakrielie, sidi kecüca süu geinu kekuo ngukelie geinu teisozha hiedia mu teizeizha hiedia se di Kepenuopfü kijüthouu Horeb gei vota.

⁹Sünunu puoe tsiepfü puo nu vorlie, sidi süzhü sünu bata. Siro harie, Jihova die puo ki vor di sie puo ki, “Elija, no hanu kedipuo chü ba ga?” sita.

¹⁰Sitse puoe sie, “Jihova Krodiko Kepenuopfü la a rhierhu phi sier; kekreilamonyü Israelko n dietseidiekhoko khakegewa, n ruosuoba rhuo kelhouwa, siro zhiecha pie n siedzekesiko dukhriwate; mu a, a rübei keba zote; siru a dukhriwatuoü a pfhütuo zote” sita.

¹¹Sitse puoe sie, “Chazou palie, sidi kijüthou gei Jihova mhodzünu thaliecie, Jihova sünunu pfüthe votuoü kezhü la” sita. Mu süki teikhrie kere se puo vor, süu rethor zo vo Jihova mhodzünu nu kijüthouko hephro mu tsiekrieko hetsha phaphawata. Jihova teikhrieu nu tuo mo; mu teikhrie sie kiükishü vor, derei Jihova kiükishü nu tuo mo,

¹²mu kiükishü sie miü, derei Jihova miü nu tuo mo mu miü sie mhapfhe zei zokecü puo vor.

¹³Elija-e süu si tse, puoe puo pfhe pie puo zie dzelie, sidi tuopra tsiepfü kicie ki thata. Mu harie, mhapfhe puo puo ki vor di sie, “Elija, no hanu kedipuo chü ba ga?” sita.

¹⁴Sitse puoe sie, “Jihova, Krodiko Kepenuopfü la mia a ngu u rothor bate; kekreilamonyü Israelmiako n dietseidiekho-u khakegewa, n ruosuobako rhuo kelhouwa, mu zhiecha pie n siedzekesiko dukhriwate, mu a, a rübei, lhiepiekeba zote, siro uko a dukhriwatuoü a pfhütuo zote” sita.

¹⁵Sitse Jihova sie puo üse, “Tuoshülie, di pesie la Damaska rayhatsa votalie; mu no sünu volie tse, tier pie Hazael kenhelie di puo bu Aram mho kedi chülie.

¹⁶Siro no tier pie Nimshi nuou Jehu kenhelie di puo bu Israel mho kedi chülie. Siro no tier pie Abel-meholamia Shafat nuou Elisha kenhe pie puo bu n sounu siedzekesiu chüliecie.

¹⁷Mu Hazael zhiechau nunu taprakelieko Jehue dukhriwatuo; mu Jehu zhiechau nunu taprakelieko Elisha bu dukhriwatuo.

¹⁸Siwa zorei a Israel nu, khutu tsu Baal rüsuo kemo, mu u tie pie puo mebokemo mia nyie thenie peshashütuo” sita.

¹⁹Sidi puoe sünunu tuoshü, sidi Shafat nuou Elisha ngulie, süu lie phietuo. Puo mhodzünu vocie kepfü thudo kerekenie tuo, puoe kerekenieu zetuo. Elija puo khieki phir, sidi puo pfhe kelhoupie puo wheshü.

²⁰Sitse puoe puo thu khawa sidi tase Elija whuo vo di, “A bu a puo mu a zuo meboshüyi, mu süsie a n siemedzi tatuolie” sita. Sitse puoe sie “La votalie, a n gei kedipuo chüshü üdi?” sita.

²¹Sitse puoe rürei la vorta, sidi mithu kemetseikecüko ze vorlie, sidi dukhrilie, mu mithu vocieko pie mi chülie di themuoko chalie, sidi pie themiako tsüshü, di ukoe cülie. Süsie puo sielie di Elija siemedzi vota, sidi puo kituou chüta.