Read Angami Naga Kediko Kerieu 2 Bible Online

Kediko Kerieu 2 - Angami Naga bible

Kediko Kerieu 2

¹David siataketuo teiu penuo vorketa ki; puo nuou Solomon ki diekhashü di sie:

²“Ae kijüu zho tuoi tuotatuoüzhie. Süla meteilie, thepfulie.

³Sidi Jihova n Kepenuopfü diekhakeshüko chüüzelie, puo zhoko nu tuo volie, puo pukeshüko, puo die khakeshüko, mu puo capiko, mu puo zhapuko nu, Mosa zho nu thupiekezhü tuoi, chüüzelie, silie ro n mhatho peteko nu, mu n kevo peteko nu vilietuo.

⁴Siliero Jihova a dze kepuko chüshülietuo, süu pukecü: ‘Mhanuü n nuonuoko n cha nu menuolie, u melou pete mu u ruopfü pete se di a mhodzünu ketho chanu tuo volie ro, Israel kediba nu n la themia n gei jütalie lho’ puoe sishü.

⁵“Sizomoü no rei Joab Zeruia nuou a gei kedipuo chüshü shikecü, mu Israel rüpfhünuo krüta nie, Ner nuou Abner gei, mu Amasa Jether nuou nie gei kedipuo chüshü shikecü no rei si ba ru, puoe süko dukhriwa, sidi kezekevi teiki terhü zie pekruwate, sidi kejokejüko ziepie puo chiecha nu, puo chiepha nu, siro puo phikou nu, shüwate.

⁶Süla n mhasi se di mhachülie, derei puo tsüpou bu thenou mene di Sheol nu le hie.

⁷Derei ketseikevi tha pie Barzilai Gilid-u pekieshücie, siro süko bu n mizhü gei nu mhacüükrieyakezhamia chücie, kekreilamonyü sikecü ae n dzürieu Absalom la, taketuo ki a ki vorwate.

⁸Siro n ze keba Shimei Gera nuou, Bahurim nunu kevor mho Benjamin-u, a Mahanaim nu kevo ki puoe rüse kere se pie a rüse, derei puoe Jordan nu a ze kesetuoü ker, mu ae Jihova ki, ‘Ae zhiechaü n dukhrilie lho we’ idi rüsewate.

⁹Süla no tsie puo üse jo moü hiecie, noe mhakesimia puo eru, mu puo gei kedipuo chüshükecü mese shikecü siba eru; puo tsü kerüpouu thezie sa di pie Sheol nu shüwacie” sishü.

¹⁰Sidi David-e puo pfutsanuoko ze di zhüta, mu David nadiu nunu puo khruwa.

¹¹Siro David-e teicie hiedia Israel mho kedichü, teicie thenie puoe Hebron nu di, tsiu teicie serese Jerusalem nu kedichü.

¹²Süsie Solomon-e puo puou David kediba gei balie, sidi puo kediba chü pezhalie.

¹³Sitse Adonija Hagit nuou Bathsheba Solomon nuo zuo ki vor, sitse hapfüe sie, “No n nou mene di vorzhie me?” si. Puo sie, “Mene di vorzhie” si.

¹⁴Sitse puoe sie, “A n ki mhapuo pu nyüyalie” si. Hapfü sie, “Pushülie” sishü.

¹⁵Sitse puoe sie, “kedibau a vie kecü no siba, mu Israelmia pete rei a kedichüketuo a merü ba; sirei kedibau teshü kewhiwate, sidi a siezeu tsüwate, kekreilamonyü süu Jihova kinu puo vie üvorte.

¹⁶Mu tsie a n ki mhapuo chaya, khashü a tsü mvüta hiecie” si, sitse hapfüe sie puo ki “pushücie” si.

¹⁷Sitse puoe sie, “Kediu Solomon ki pu shücie, puo n melietalie lho, süusü puo bu Abishag Shunampfü bu a ki nyi cü mu” sishü.

¹⁸Sitse Bathsheba sie, “Viwe, a n la kediu ki pushütuo” sishü.

¹⁹Süla Bathshebae kediu Solomon ki Adonija sou dieputuoü vo. Siru kediue puo ze kesetuoü par di puo mhodzü nuketsushü; süsie puo kediba gei ke balie, siro kediu puo zuo la theba puo rei se vorshü, sidi hapfüe puo zatsa balie.

²⁰Sitse hapfü sie, “A n ki mhakecü yopuo chayalie, a meliewa hiecie” sishü, Sitse kediu puo üse, “Chaliecie, a zuo, a n ki lhoütalie lhocü la” si.

²¹Sitse puoe sie, “Abishag Shunampfü pie n dzürieu Adonija ki penyishücie” sishü.

²²Sitse kediu Solomon puo zuo die kela di sie, “No kiüdi Adonija la Abishag Shunampfü ketsoya ga? puo la kedibau sa chaliecie, kekreilamonyü puoe a dzürieu ze, puo la rei, siro Abiathar zievo-u la, mu Joab Zeruia la rei chaliecie” si.

²³Sitse kediu Solomon Jihova za se rüse di sie, “Mhanüu Adonija die hauha puo thuo puo kerheiro kepeka la puwata moü liro, Kepenuopfü bu a gei sükemhie, tsiu sükezie rei chüshüliecie.

²⁴Süla tsie Jihova rheikeba tuoi, puoe a pesieshü, mu a khapie a puou David kediba gei shüshü, mu puoe ki puo chüshü a tsü, puo phrakeshü tuoi, thie Adonija bu siatatuo” sita.

²⁵Sidi kediu Solomon-e Jehoiada nuou Benaia ketseshü di puo biewa mu puo siata.

²⁶Siro kediue Abiathar zievo-u ki, “Anathoth nu, n thuo n lie nu votacie, kekreilamonyü noe siaketa mesete. Derei a hateiki n pesiawalie lho, kekreilamonyü noe a puo David mhodzü Jihova, Kepenuopfü dietseidiekhobouu toupietuo, mu no puo kemezhiekelie pete nu puo ze kemezhieshü” si.

²⁷Sidi Solomon-e Abiathar bu Jihova zievo chü mota; süusü Jihova die puoe Shilo nu Elinuo kinumia dze kepu chü tseilieketuo la zo.

²⁸Siro dielieu Joab ki vor tse, kekreilamonyü Joab-e Adonija yapieya, puoe Absalom yapie moürei. Joab-e ta se Jihova ruosuopfhekiu nu vota, di ruosuoba kia theze se bata.

²⁹Mu süu se Solomon ki pu di “Joab-e ta vo Jihova ruosuopfhekiu nu bate, mu harie, puoe ruosuoba kiki bate” ishü. Sitse Solomon-e Jehoiada nuou Benaia ketse di puo ki, “Tuo volie, di puo biewaliecie” sita.

³⁰Süla Benaia Jihova ruosuopfhekiu nu vor di puo ki, “Kediu diekhashüte, ‘Parliecie’ si.” Derei puo sie, “Lie lho; a haki nu siatatuo” sita. Süsie Benaia die se la kediu ki vor di sie, “Joab hakemhie pu, mu hakemhie di a die kelate” sishü.

³¹Sitse kediu sie puo üse, “Puo kepu tuoi chüshücie, mu puo biewaliecie, sidi puo khruwalie, mu no Joab-e pekrukewa kejokejü zieu, a geinu mu a puonuoko ki nunu chüwaliecie.

³²Jihovae puo zie pie puo tsü gei shütuo, puoe a puo David pesi mo di zhiecha pie puo ki miathokuo mu vikuokecü mia kenie dukhriwa, süniesü Abner Ner nuou, Israelmia rüpfhünuo krütau, mu Amasa Jether nuou, Judamia rüpfhünuo krütau.

³³Süla uko zie gei Joab mu puosepuoyieko tsü gei tuoseitatuo; derei David, mu puo seyieko, puo kinuko, mu puo kediba gei we Jihova ki nunu nouneu kechachie uko gei tuotuo” sishü.

³⁴Süsie Jehoiada nuou Benaia-e tuo kho, sidi puo bie di puo dukhriwa sidi rayha nu puo ki nunu puo khruwata.

³⁵Siro kediue Jehoiada nuou Benaia khapie puo kinu rüpfhünuoko mho shüshü, mu kediue Zadok zievo-u pie Abiathar sou nu shüwa.

³⁶Siro kediu mia ketse pie Shimei kie di sie puo ki, “N thuo n la Jerusalem nu ki puo chüliecie, di sünu lhouliecie, mu sünunu tuo thechü kekrei puo nu rei vota hiecie.

³⁷Kekreilamonyü no chazou kepra nhie, Kidron ciekevo nhie, no sia toutaketuo si touliecie, n zieu thuo n tsü gei la vortuo” si.

³⁸Sitse Shimei sie kediu ki, “N kepuu vi zo; a niepuu kediu keputuoi, n kituou sükemhie chülietuo” sishü, süla Shimei-e Jerusalem nu teisozha kekra lhou bata.

³⁹Derei teicie se tseitakezhü ki Shimei kituomia kenie Gath nu kediu Maka nuou Akish ki vota mu süu se Shimei ki, “Harie n kituonie Gath nu bate ho” sishü.

⁴⁰Sitse Shimei sielie di puo gada keselie, sidi puo kituonie pfhütuoü Gath nu Akish ki vo; sidi Shimei vo di Gath nunu puo kituonie ze vor.

⁴¹Siro Shimei Jerusalem nunu Gath nu vo di la vorta kecü Solomon ki pushü tse,

⁴²kediu mia ketse pie Shimei kie di sie puo ki, “A n bu Jihova za se rüse di n ki, ‘No chazou kepra teisozhanhie, kehourapuo tuo zo shierei sia tou zotuokecü si touliecie, sishü moü me’? Mu no a ki, ‘N kepuu vi zo we, a zelietuo’ sishü ze.

⁴³Siliro no kiüdi Jihova ki phrakeshüu, mu a n kipukeshü die se balie mota ga?” si.

⁴⁴Sizomoü kediue sie Shimei ki, “A puo David gei mha kesuo chükeshü pete n melouu thuo si ba ze; süla Jihovae n kesuou pie n tsü gei shüshütuo;

⁴⁵Derei kediu Solomon we theja pfülietuo, mu kedibau Jihova mhodzü kechachie balietuo” si.

⁴⁶Süsie kediue Jehoiada Benaia nuou ki diekhashü; mu puoe tuoprata, di vo puo biewa mu puoe siata. Süla kediba Solomon dzie nunu pesie se bata.