Read Angami Naga Kediko Kerieu 20 Bible Online

Kediko Kerieu 20 - Angami Naga bible

Kediko Kerieu 20

¹Aram kediu Ben-hadad-e puo rüpfhünuoko pete kie kengulie; sünu kedimia serekenie, gura mu guragari puo zetuo; sidi puo kho di Samaria houlie, tsiu süu ze terhü chü.

²Sitse puoe dieliemia ketse pie Israel kediu Ahab ki shü di sie puo üse, Ben-hadad-e hakemhiekecü puyawe.

³“N raka tsiu n suna a vie; n nupfünuoko rei mu n nuonuo kevithoko rei a vie zo” sita.

⁴Sitse Israel kediu puo die kela di sie, “A niepuu, he-i kediu, n kepu kemhiei, a mu a keba pete n vie zo” si.

⁵Sitse dieliemia la vor di sie, “Ben-hadad-e hakemhiekecü puya we: ‘No n raka tsiu n suna, tsiu n nupfünuoko mu n nuonuoko pie a tsüwalie’ sishü.

⁶Derei a sodu ha tei ki a kituomia ketsepie n ki shütuo, mu sükoe n kinu, mu n kituoko ki nu mhapfhütuo, sidi mha kikecüpuo u mhi ki zivi shiü süko pielietuo, di süu setatuo” sita.

⁷Sitse Israel kediue rünau nu phichüko pete kielie, di sie, “Tsie mehoshücie, themia hauha kiüdi kezekesuo pfhüya shi, kekreilamonyü puoe mia ketseshü di a nupfünuoko, a nuonuoko mu a raka mu a suna cha, mu a puo melieshü mo” sishü.

⁸Sitse phichüko mu themiako pete rei sie puo ki, “Puo pfhe rünyü hie, morei tuoü rei shü hie” sita.

⁹Süla puoe sie Ben-hadad dielieko üse, “A niepuu kediu ki puwacie: No n kituou ki pukeshü therieko pete ae chüshütuo, derei mha hau we a chülie kenjü” sishü. Sitse dielieko tuota, sidi die se la vorshü.

¹⁰Ben-hadad-e dielie ketse lapie puo ki shü di sie, “Mhanuü Samaria nu nyophekoe a siemedziketuoko la u dziezhü ketsu puopuokecü rei tsolie üliro, terhuomia bu a gei sükemhiekecü chüshücie, sü kezie rei chüshücie” sita.

¹¹Sitse Israel kediue puo die kela di sie, “Puo ki pushücie, themia puo terhünyie se ketuou bu süu rhuokewamia kemhiei di kemelha hiecie” sita.

¹²Ben-hadad-e dielie hau sikecü ki, hatei ki puo mu puo kediko pru nunu zu krie ba, süla puo sie puo themiako üse, “Nieko dojüliecie” sishü. Sitse ukoe nadiu perhietuoü dojülie.

¹³Siro harie, siedzekesimia puo Israel kediu Ahab ki vor di sie, “Jihova hamhiekecü puya, no themia kedi hako pete ngu mo? Harie, a thie uko pie n dzienu shüwatuo ho. Süki noe a Jihova zoükecü silietuo” sishü.

¹⁴Sitse Ahab-e sie, “Supuo geinu tuo ga?” Puoe sie, “Jihova hamhiekecü puya, ahng khruohiyakezha khriesako geinu tuo” si. Sitse puoe sie, “Supuonie terhü sedeshütuo ga?” si. Ru puoe sie, “No” si.

¹⁵Sitse puoe rünako nu khriesako phrülie, sitse sükoe mia krie kenie di serekenie mu süko sie puo Israel themia peteko phrülie, sükoe nyie thenie.

¹⁶Mu ukoe khinhieluo ki tuoprata, siro Ben-hada mu puo kediko mu puo kekhruohi serekenieko pru nunu zu krie di meze ba.

¹⁷Rünako nu khriesako pra rie. Mu Ben-hadad-e mia ketseshü, mu sükoe sie puo ki, “Themia Samaria nunu par tuote” si.

¹⁸Sitse puoe sie, “Süko kezekevi la vorzhü ro, perhei uko teliecie, morei ukoe terhü chütuoü vorzhü üro, perhei teliecie” si.

¹⁹Sidi rünako nunu khriesako tsiu chüpahiko süko siemedziketuoko nadiu nunu parlie.

²⁰Sidi ukoe mia puopuokecü puo mese dukhriwa, sitse Arammiako tata mu Israelkoe süko sie whuo tsiu Aram kediu Ben-hadad-e gura puo geinu gura themiako ze di tata.

²¹Sitse Israel kediu tuo pra, sidi gura mu guragari biewa, tsiu Arammia kekra dukhriwata.

²²Sitse siedzekesiu Israel kediu ki vor di sie, “Tuo voliecie, n thuo n chü kemeteilie, sidi no kedipuo chütuo shiü le menuolie, kekreilamonyü bayie teiki Aram kediu vor n perhietuo ho” sita.

²³Sitse Aram kediu kituoko sie puo ki, “Mia rhuokoe kijükhru gei rhuo; süla sükoe uki kuokuote, derei úko kijüthezha nunu uko ze kegei khe, siliro we uko ki kuokuo mecie zo.

²⁴Siro mha hau rei chüliecie, kediko puopuokecü puo tha nunu chüwalie, sidi süko sounu terhü krütako bu thalie;

²⁵siro chüpahimia kezukengulie, no pejükewa chüpahi dekecü, gura kidepuo shi, guragari kidepuo shi, puo de puopuokecü phrüliecie; sidi we kijüthezha nunu uko ze kegeituo, mu ukoe süko ki kuolie tou zotuo” sita. Sitse puoe süko pfhe rünyülie, sidi sükemhie chülie.

²⁶Bayie teiki Ben-haded-e Arammia kezulie, sidi Afek nu Israel ze kegeituoü kho.

²⁷Tsiu Israel rei puo themia kezulie mu kecüca keselie, sidi vo uko ze kegei; Israelko uko mhodzünu tekuonuo kro kenie tuoi vo balie; derei Arammia we kijüu ketshu chütuota.

²⁸Ukepenuopfü themia puo vor Israel Kediu ki, “Jihova hakemhie puya: Arammiakoe Jihova üse kijüthou gei rhuou mu puoe razha nu rhuou mo isi, süla a krodi hau pie n dzienu shüwatuo, sidi noe a Jihova ükecü silietuo” si.

²⁹Sidi ukoe teisozha thenie huoniehuo petsoupfü ba. Sidi zha thenie nhie terhü chüta; siru Israelmiako teisozha puo nhie nu zokecü Arammia pephiketuo mia nyie krie puo dukhriwata.

³⁰Derei keshako we ta se Afek nadiu nu vota; sitse sünunu dahou metsur peshakeshü mia nyie mepfüethenie vawa. Ben-hadad rei tatuo, sidi puoe ta nadiu nu rüshü vota.

³¹Sitse puo kituokoe sie puo ki, “Harie, Israel kiu kedikoe mia ngumezhieyakezha kedimia kropuo ücü hie sishülie, uko gakhropfhe pie u chiecha phalie, mu kero pie u tsü kezeipfülie di Israel kediu ki vo khe; puoe u kerheiro kelashü rei silie lho mu” sita.

³²Süla ukoe gakhropfhe pie uchieca phalie, mu kero pie u tsü kezipfülie di Israel kediu ki vor di sie, “N kituou Benhadad-e puyalie, ‘A n ki a mezhiemeloya, a perheishü cümu.’ ” Sitse puoe sie, “Puo tsie rei rhei baluo me? Puoe a siezeu ze” sita.

³³Süki themiakoe puo geinu zasi mehotuoü pfhü ba, sidi uko puo dieu pe mhai zo di sie, “Ben-hadad sü n siezeu zo” si. Sitse puo sie, “Vo di puo ze vorlie” sita. Sitse Ben-hadad-e puo ki vor, mu puoe puo bu guragari gei pfülie.

³⁴Sitse Benhadad-e sie puo üse, “A puoe n puo kinu liekelie nadiko ae kha lashüwatuo, a puoe Samaria nu chükevor tuoi n thuo Damaska nu lhithochü chüliecie” sishü. Sitse Ahab-e sie, “A vu dietseidiekhokelie hauha se di a n ketsewatuo” si. Sidi puoe puo ze kedietseidiekhowa, sidi puo ketsewata.

³⁵Sitse siedzekesimia nuonuoko donu miapuoe Jihova diekhakeshü nunu sie puo zeu üse, “A n ki chaya, a vüshücie,” sita. Siru themiau puo vümvüta.

³⁶Sitse puoe sie, “No Jihova pfhe rünyü moketa la, harie, no a kinunu tuota mumetha, losha puoe n tewatuo” sita. Sidi puoe puo ki nunu tuota mumetha, losha puo ze keselie di süu bu puo tewa.

³⁷Süsie puoe mia kekreimia puo ki, “A n ki chaya, a vüshücie” si, siru themiau puo vüshü, sidi puo vü kerüzawa.

³⁸Süla siedzekesiu tuota, sidi chakhie kinu, pfhenyhie pie puo zie kezilie di puo rhi chüpekrei pfü di kediu pfhe ba.

³⁹Sidi kediu tuo phir tse, puoe kra di sie, “N kituou terhü chükeba donu vo; ru harie, chüpahimia puo rürei vor, di mia puo ze a ki vor di sie, ‘Themia hau ze baliecie; mhanüu puoe tata cü sie, n kerheiro pie puo kerheiro sou chütuo, mo liro no raka talent puo soutuo.’

⁴⁰Tsiu n kituou lukihaki merei batacü ki puoe tate.” Sitse Israel kediu, “N thuo pepiliete ru, n gei sükemhieshütuo” sita.

⁴¹Sitse puoe rükrei puo zie geinu pfhenyhieu biewa; sitse Israel kediue puoe siedzekesimiako donu mia puo kecü silie.

⁴²Sitse puoe sie puo ki, “Jihova hamhiekecü puya, ‘Noe puo peka lotsowaketuo la a n dzienu khakeshü petawata kecü la, n kerheiroe puo kerheiro sou nu votatuo, mu n themiae puo themia sounu votatuo.’ ”

⁴³Sitse Israel kediu puo nou suo se tsiu rünou mo se di puo kinu votatuoü di tuo vota, sidi Samaria nu vorlie.