Read Angami Naga Kediko Kerieu 21 Bible Online

Kediko Kerieu 21 - Angami Naga bible

Kediko Kerieu 21

¹Siro puotei huo sie mha hako chüta: Naboth Jezril-ue Jezril nu, Samaria kediu Ahab kediki khie ki khubelie puo baya,

²mu Ahab-e sie Naboth ki, “N khubelie pie a tsüyi, sidi a bu tezie chüyi, süu a ki penuo bakecü la. Mu a süla khubelie vikuokecü puo khashü n tsütuo, moro, n medo liro a priesa süu ma de pie n tsütuolie” si.

³Derei Naboth-e sie Ahab ki, “A puonuo kayie pie n tsüketuo Jihova khalie” si.

⁴Sitse Ahab-e Naboth Jezril-u die puo ki kepu dieu la puo neimo tsiu puo thesuosiei di puo kinu vor, kekreilamonyü puoe sie, “A a puonuoko kayieu pie n tsülie lho we” sitakecü la. Sidi puoe tsu puo zhünu zhülie, mu puo zie kereilie, tsiu mha rei cü mvüta.

⁵Derei puo kimia Jezebel puo ki vor di sie, “No kiüdi thenousuosiei di mhacü mo bata ga?” si.

⁶Sitse puoe sie süpfü ki, “Ae Naboth Jezril-u ki, ‘A bu n khubelie raka pie khrüliecie, moro, n medo liro a süu mese nu khubelie kekrei puo khashütuo’ sidi pu; ru puoe sie, ‘A a khubelie pie n tsülie kenjü we’ ” site.

⁷Sitse puo kimia Jezebel sie puo ki, “No tsie Israel kekha ba moü me? Sieliecie, sidi mhachüliecie, sidi n nou n neilie, a Naboth Jezril-u khubelie pie n tsüwatuo” silie.

⁸Sidi süpfüe Ahab za nunu leshü thulie, sidi puo nupfu mohor pie vüwa, sidi leshüu ketsepie puo nupfu nadi nu Naboth ze bayakezha pehüko tsiu krütako ki shü.

⁹Hapfüe leshüu nu thukeshü, “Mevoketuo tei puo pesishülie, sidi Naboth bu themia donu kerükrie gei balie,

¹⁰Siro themia kesuo kenie kedapie puo petsou pie balie, sidi unie bu puo pejo di sie, ‘Noe Kepenuopfü mu kediu rüsekecü die pute’ siliecie. Süsie puo toupie casie pra di ketsie pie puo vakhriwaliecie” sishü.

¹¹Sitse nadi nu themiako, pehüko tsiu krütako puo nadi nu bayakezhakoe, Jezebel-e uko bu chünukeshü kemhie chüwata.

¹²Sidi ukoe mevoketuo pesishülie, siro Naboth khapie themia donu kerükrie gei shülie.

¹³Sidi themia kesuo kenie ze vorlie, sidi unie bu puo petsou di balie, sidi kemethuo themia nie themiako mhodzünu nu Naboth pejo di sie, “Naboth-e Kepenuopfü mu kediu rüsekecü die pute” sita. Süla ukoe puo toupie casie pra, sidi ketsie pie puo vakhriwata.

¹⁴Sitse ukoe mia ketse pie Jezebel kishü di sie, “Ketsie pie Naboth pewate, mu puo siate ho” siwa.

¹⁵Sidi Jezebel-e ketsiepie Naboth vakhrikewa silie tse, Jezebel-e sie Ahab ki, “Sieliecie, Naboth Jezril-u khubelie puoma kechünu n tsü mvüketau lieliecie, kekreilamonyü Naboth-e rheiba mote, derei siate ho” sita.

¹⁶Siro Ahab-e Naboth siaketa silie mumetha sielie di tuo se Naboth Jezril-u khubelie welietuoü di khubelieu nu tsuta.

¹⁷Sitse Jihova die Elija Tishbi-u ki vor di sie,

¹⁸Sieliecie, ke di Samaria nu dikeba Israel kediu Ahab ze kesecie, harie, puoe Naboth khubelie nu tsu di süu lielietuoü bate ho.

¹⁹Mu no puo ki hakemhie pushülie, “Jihova hakemhiekecü puya: No mia dukhriwa, sizomonyü mia vie sa lielietieya me?” silie. Mu no puo ki, “Jihova hakemhiekecü puya: Tefü Naboth zie kriekecü thechüu nunu tefüe n zie krietuo” sita.

²⁰Ahab-e sie Elija ki, “Harie a ngumvüu, no a nguliete ha?” sita. Sitse puoe puo die kela di sie, “A n nguliete, kekreilamonyü noe n thuo n ze pie Jihova mhodzü ki mha kesuo shüüko chütuoü tuote ru.

²¹Harie, ae mhakesuo se n gei vortuo, sidi n nuosenuoyie chüsetatuo, sidi Ahab gei thepfumia pete, kediekechümia rei kemomia rei chüsetatuo.

²²Sidi ae n kiu chü pie Nebat-u nuou Jeroboam ki, siro Ahija nuou Baasha ki kemhiewatatuo, kekreilamonyü noe thenou chükemeyie shüte. Mu Israel chü kephoumakewa la.

²³Siro Jezril la rei Jihova puya, ‘Tefüe Jezril cahou kinu Jezebel chü cülietuo.’

²⁴Ahab ze di nadiu nunu sia ketako tefüe cütuo mu lie nunu siaketako teirakoe cütuo” si.

²⁵(Ketho zo, miapuorei puo thuo puo ze pie Jihova mhodzünu mha kesuo shüüko chütuoketa Ahab mhiekecü tuo mo, süusü puo kimia Jezebel-e puo pfükerhüshü.

²⁶Mu puoe mha kerütse pete chü terhuomiarhi sie medzite, Ammonmia, Jihova Israel themiako mhodzünu nu chükelhoukewako, chüyakezha pete chütuota.)

²⁷Ahab-e die hako silie tse, puoe puo pfhe cierha, siro gakhropfhe dzielie, sidi mevota, tsiu gakhropfhe dzielie di puo thesuosiei tuota.

²⁸Sitse Jihova die Elija Tishbi-u ki vor di sie,

²⁹“Ahab-e kedipuo kemhie di a mhodzünu puo thuo puo bie kerünuolie shikecü no ngu ba nhie? A, puo kelhou ki mha kesuo se vorlie lho, kekreilamonyü puo puo chü kerünuoliete; derei puo nuou teiki a mhakesuo se puo kikru nu shütuo” sita.