Read Angami Naga Kediko Kerieu 22 Bible Online

Kediko Kerieu 22 - Angami Naga bible

Kediko Kerieu 22

¹Aram mu Israel nie donu terhüchü kemo cie se balie.

²Derei cie se cie Juda kediu Jehoshafat-e Israel kediu ki ker.

³Sitse Israel kediu puo kituoko üse, “Ramoth-gilid-e uko vie ükecü nieko rei si ba nhie, derei úko Aram kediu dzie nunu süu lie lalieketuo la mhapuorei chü motuo ze” sita.

⁴Sidi puoe sie Jehoshafat ki, “No a ze vo Ramoth-gilid nu terhüchütuo me?” Jehoshafat-e sie Israel kediu ki, “A sü n kemhie ze, a themia sü n themia kemhie ze, a gura sü n gura kemhie ze” sita.

⁵Derei Jehoshafat-e sie Israel kediu ki, “Jihova die ketso riecie,” sita.

⁶Sidi Israel kediue siedzekesiko kie kengulie, uko mia krie dia mese, sidi sie uko ki, “A bu vo Ramoth-gilid nu terhüchü tuo mo, a bu terhüchü hienuta?” sishü. Sitse ukoe sie puo ki, “Khocie, kekreilamonyü Jihovae süu pie kediu dzie nu shüwatuoüzhie,” si.

⁷Derei Jehoshafat-e sie, “Hako kemo Jihova siedzekesi huo ketsolie kevi ba saluo me?” si.

⁸Siru Israel kediue sie Jehoshafat ki, “Tsie rei mia puo baluo, Imla nuou Mikaia, puo kinu Jihova ketsolie rei vi, derei a puo ngumecüya; kekreilamonyü puoe a dze keviu puya mo, derei kemo-u puya.” Sitse Jehoshafat-e sie, “Kediu bu sita hiecie” si.

⁹Sitse Israel kediue kezhamia puo kielie, di sie “Rükrei Mikaia Imla nuou ze haki vorcie” si.

¹⁰Sidi Israel kediu mu Juda kediu Jehoshafat unie kenienie u kediba gei balie, kedi pfhenei se di, sidi Samaria nu kele kharu ki sie nu ba; siro siedzekesiko pete unie mhodzünu siedzekesi die pushü.

¹¹Siru Kenana nuou Zedekia puo thuo thegi pie mhakia chülie, sidi sie Jihova hakemhie puya, “Noe mha hako se Arammia thuge votuo, uko peka lotsowa kemochie” sita.

¹²Sidi siedzekesimia pete rei siedzekesidie pu di sie, “Ramoth-gilid nu kho di kuoliecie, kekreilamonyü Jihova süu khapie kediu dzie nu shüwatuo” sita.

¹³Sitse dieliemia Mikaia ki kevo-ue sie puo ki, “Harie, siedzekesiko diepuochü di kediu la viketuo dze pu phrete, n die bu rei uko die kemhieliecie, sidi viketuo dze puliecie” silie.

¹⁴Derei Mikaia sie, “Jihova rheituoyakezha mhie, Jihova a ki kedipuo putuo shi, a süu putuo” sita.

¹⁵Sidi puo kediu ki vor tse, kediue sie, puo üse “Mikaia, hie Ramoth-gilid nu vo terhüchü ro vituo mo hie bu terhüchü hienu ga?” si. Sitse puoe puo die kela di sie, “Tuo volie, sidi kuoliecie, kekreilamonyü Jihova süu pie kediu dzienu shüwatuo” sita.

¹⁶Derei kediue sie puo ki, “N bu Jihova za nunu ketho-u rübei pushünu a bu va kidepuo n ki putieya mu?” sita.

¹⁷Sitse puoe sie, “Ae Israel pete kijüthouko gei cüretuoketa ngu ho, ukoe tekuo u kepfhe kejü tuoi tuote, mu Jihova sie, ‘Hako u kepetha tuo mote; uko mia puopuokecü bu u nou mene di la u kinu votaliecie.’ ”

¹⁸Siro Israel kediu sie Jehoshafat ki, “Puoe a dze mha kesuou sie mha kevi puya mokecü a n ki pu mo me?” si.

¹⁹Sitse Mikaia sie, “Süla no Jihova die rünyüliecie: Ae Jihova puo kediba gei ba di ngu, siro teigei krodiko pete puo dzie puo zatsatie tsiu puo vitsatie tha.

²⁰Sitse Jihova sie, ‘Ahab bu kho di Ramoth-gilid nunu tetsuketuo la supuonie puo hüshü ta?’ Sitse mia puoe mhapuo pu, mu kekrei puoe kekrei puo puta.

²¹Sitse sünu ruopfü puo par, sidi Jihova mhodzü thalie di sie, ‘A puo hüshütuo’ silie.

²²Sitse Jihova sie puo ki, ‘Kedipuo mhie di ta?’ Siru puoe sie, ‘A tuopra di puo siedzekesiko tie nunu kemeda ruopfü chülietuo.’ Sitse Jihovae sie, ‘No puo hülietuo, tsiu kuo reilietuo; tuopraliecie, sidi süu chüliecie.’

²³Süla harie, Jihova kemeda ruopfü pie siedzekesi hakoha pete tie nu shüwate ho, mu Jihova n gei kepeka vorketuo puya ho” sita.

²⁴Derei Kenana nuou Zedekia tuo phir di Mikaia dzo vüshü, di sie, “Kimhie di Jihova Ruopfüu n ki putuoü prata mu?” si.

²⁵Sitse Mikaia-e sie, “Harie, no n thuo n kevielietuoü di kinutshekou kele nhie noe silietuo ho” sita.

²⁶Sitse Israel kediue sie, “Mikaia teliecie, sidi puo ze la vo nadiu nu kekhakezhau Amon mu kediu nuou Joash ki shüwaliecie.

²⁷Sidi sie, ‘Kediu hakemhie puya: Themia hauha pie kedieki nu shüpie bawalie, sidi a vi di la vor kemochie kemezhiekecü niekhrüda mu dzü pie puo va chüshücie.’ ”

²⁸Siru Mikaia-e sie, “Mhanuü no vi di la vor üliro Jihova a ki die pushü mo ho” sita. Süsie puoe sie, “Nieko pete, rünyüliecie!”

²⁹Sidi Israel kediu mu Juda kediu Jehoshafat unie Ramoth-gilid nu kho.

³⁰Sitse Israel kediu sie Jehoshafat ki, “A a thuo a rhichü pekreilie di, terhü nu votuo; derei no we n thuo n pfhenei selie” sita. Sidi Israel kediue puo puorhi chüpekreilie di terhü nu vo.

³¹Siro harie Aram kediu puo guragari mehoyakezha mia serekenieko üse, “Israel kediu zokemo sie, themia kecümia morei kezhamia ze kegei hiecie” siwa.

³²Mu guragari mhokezhakoe Jehoshafat ngu tse ukoe sie, “Harie Israel kediu meciete” sita. Sidi ukoe puo ze kegeituoü puo re tsur, mu Jehoshafat-e shieshü.

³³Sitse guragari mhokezhakoe süu Israel kediu mokecü silie tse, ukoe puo whuo sa mota.

³⁴Derei mia puoe tuoükemo nu theü cieshü, di Israel kediu rünyie kemekhrekecü nunu le di puo pewata; süla puoe puo guragari keseu üse, “No rürei vor di a toupfü rüyachü khie shüwaliecie, a rüzaliete mu” sita.

³⁵Sidi sünhiesü terhü re miemieta, tsiu kediue puo guragari geinu thevatie ketso Arammiako petsoupfü ba di siata, siru thezie-e rüzapfü nunu kru se guragari phinu tsuta.

³⁶Sitse niaki le tazhücü ki rüpfhünuoko pete ki dielie pu di, “Mia pete rei puo kebachü nu votaliecie, tsiu mia pete rei puo rüna nu votaliecie” ivorta.

³⁷Sidi kediue siata, sidi puo pfü Samaria nu vor, sidi uko Samaria nunu kediu khruwa.

³⁸Mu ukoe guragari-u Samaria dzükhou nunu khrüwa, mu tefüe puo zie meyolie tsiu thethenukoe sünunu u mo-u khrüwa. Sidi Jihova pukeshü dieu chü tseilie.

³⁹Siro Ahab mhatho kekreiko, mu puoe chükeshü peteko, mu puo tsohupie ki chükelieu, siro puoe nadi chükelie pete, Israel kediko seyie dze leshüda nu thupie zhü moü me?

⁴⁰Sidi Ahab-e puo puonuoko ze zezhüta; sitse puo nuou Ahazia puo sou nu kedichülie.

⁴¹Tsiu Asa nuou Jehoshafat-e Israel kediu Ahab dikelie cie dia cie Juda mho kedichülie.

⁴²Jehoshafat dikelie ki cie serepengouta; mu puoe Jerusalem nu teicie mepfüepengou di. Puo zuo za Azuba, Shilhi nuopfü.

⁴³Puoe puo puo Asa zho pete nu tuo; puoe sünunu rüreita mo, Jihova mhodzü ki kemezhüu chü, sishierei thechü kerükrieko chüwa mo; mu themiakoe süteiki rei thechü kerükrieko gei ruosuo chü tsiu mharekethengu thetuo zo.

⁴⁴Siro Jehoshafat-e Israel kediu ze vithochülie.

⁴⁵Siro Jehoshafat mhatho kekreiko tsiu puo kekuo thakeshü, puo kedipuomhie di terhü chü shikecüko, Juda kediko seyie dze leshüda nu thupie zhü moü me?

⁴⁶Siro rüsuokiko nu thepfumia thuo thepfumia ze mhakesuokechü kekreiko, puo puo Asa teiki nu peshapie ketuo, puoe süko bie pejüwa.

⁴⁷Süteiki Edom nu kedi tuo mo, puo kekhruohi puoe kedi chü.

⁴⁸Jehoshafat-e Ofir nu vo suna se vortuoü di Tarshish rou pfü mhiecü kro puo chülie; derei ukoe vo mota; kekreilamonyü roukoe Ezion-geber nunu tseütsaketa la.

⁴⁹Sitse Ahazia, Ahab nuou sie Jehoshafat ki, “A kituoko bu n kituoko ze rou gei vocie” sisie, derei Jehoshafat-e lho üta.

⁵⁰Siro Jehoshafat-e puo puonuoko zezhüta, sidi puo puo David nadi nunu puo khruwa; sitse puo nuou Jehoram puo sounu kedi chülie.

⁵¹Ahab nuou Ahazia Samaria nu Israel mho dikelie ki Jehoshafat-e Juda nu dikelie cie kerethenieta, mu puoe Israel mho cie kenie di;

⁵²puoe Jihova mhodzü mhakesuo shüüko chü, siro puo puo zho nu tuo; tsiu puo zuo zho nu tuo, mu Nebat nuou Jeroboam Israel bu phoumaketau zho nu tuo.

⁵³Kekreilamonyü puoe Baal lie chü, sidi puo rüsuo mu Jihova, Israel Kepenuopfü nou chükemeyie, puo puoe chükecüko pete chü zo.