Read Angami Naga Kediko Kerieu 3 Bible Online

Kediko Kerieu 3 - Angami Naga bible

Kediko Kerieu 3

¹Solomon-e Ijipt nu kediu Faro ze kekhrietholie, sidi Faro nuopfü lielie, sidi puo ze David nadiu nu vor bata, puo kiu, siro Jihova kiu mu Jerusalem khieümhou dahou chü tseilie kemochie.

²Themiakoe thechü kerükriera nu ruosuochü, kekreilamonyü süki ki puorei chüpie Jihova za nu khapie ba mo.

³Tsiu Solomon-e Jihova khrie, puo puo David zho-u medzi di; puoe thechü kerükrieko nu ruosuo chü mu mharekethengu thekecü rübei zo.

⁴Siro kediu Gibeon nu ruosuo chütuoü vo, süue thechü kerükrie kezha puocü la, Solomon-e ruosuoba sügeinu kethe ruosuo nyie puo chü.

⁵Gibeon nunu Jihova theva gei Solomon mho geinu vor puo pengushü di Ukepenuopfüe sie, “A bu kedipuo pie n tsünu shiü chaliecie” si.

⁶Sitse Solomon sie, “No n kituou David a puou, puoe n mhodzünu miatho tsiu mezhü, mu puo noumezhü di n ze ketuo tuoi, noe puo ngumezhiethorkecü thashüte; siro noe puo la ketseikevi hau chüshü, süusü thie tuoi, noe thepfunuoyo puo se puo bu puo kediba gei batuoü khashü.

⁷Mu tsie, he-i Jihova a Kepenuopfü, noe n kituou kediu chüpie tsie puo bu a puo David sounu shüshüe, ae nhicu zoluo; ae kepra kele tei puorei si mie,

⁸tsiu n kituoue no kedakelie n themiako donu ba, themia kra pere, krathorcü la phrü hulie kenjü.

⁹N themiako kekhaketuo la kesikele nou, keviu mu kesuou si kekreilieketuo khapie n kituou tsüshücümu, supuonie n themia krodi haha kekhalie vituo ga?” sishü.

¹⁰Solomon-e chakeshü die hau Jihova puo neilie.

¹¹Sidi Ukepenuopfü sie puo ki, “No hau chakecü, n thuo n la rhei chalieketuo mo; morei n la kishükinyi chata mo, morei n ngumvümia kerheiro cha mo, derei n bu vikecü silieketuo la kesikele cha;

¹²a n die ki tuoi chüshütuo. Harie, ae mhasi tsiu kesikele nou khashü n tsütuo; süusü n mhodzütsa miapuorei n kemhie tuo mo, morei n sietsa rei miapuorei n kemhie lhou sierlie lho.

¹³Sizomonyü ae no chakemo rei sapie n tsütuo: kinyi, tsiu thetshetherhu, süla n teisozha pete nu kedimia donu n kemhiemia puorei balie lho.

¹⁴Mu mhanuü noe a zhoko nu tuo volie, a khakeshü mu a dieko chüüzelie, n puo David ketuo nu tuolie liro a n teisozhako chü pechashütuo.”

¹⁵Siro Solomon cosierlie, ru harie, süue puo mho puo zo. Süsie puo Jerusalem nu la vorlie. Sidi Jihova ze dietseidiekhokecüu mhodzünu thalie, sidi kethe ruosuo tsiu vitho ruosuo chüshü, sidi puo kituoko pete la thehe puo chüshü

¹⁶Süsie thethenumiapfü kenie kediu ki vor puo mhodzünu thalie.

¹⁷Sitse thenupfünie puo ki, “He-i, a niepuu, thenu hapfü hienie ki puo nu baya, mu puo kinu bakecü ki a thepfunuo hayo zelie.

¹⁸Süsie a nuo zekelie zha se nhie, hapfü rei nuo zelie mu hienie rübei ba, kinu hienie zokemosie, mia kekreimia puorei ba mo.

¹⁹Sitse thenu hapfü nuoyo theva siata, kekreilamonyü puo thuo puo nuo pezhüwaketa la.

²⁰Puoe khiso teiluo sielie di n kituopfü zekezhünu a khie kinu a nuoyo pielie di puo merü nu zhülie mu puo nuo kesiau pie a merü khie zhüwa.

²¹A khise sielie di a nuoyo bu nutuoü sie tse, harie, süyo siazhüte, derei a khise a nuo meho menuoshü tse, harie, süyoe a penuokeshü a nuo thepfunuoyo mota.”

²²Derei thenu kekreipfüe sie, “Molie, rheikeba nuoyo a nuo zo, mu kesia nuoyo n nuolie” sita. Mu keriepfüe sie, “Molie, kesia nuoyo n nuo zo, mu rhei keba nuoyo a nuolie” sita. Sükemhie unie-e kediu mhodzünu kemeüta.

²³Sitse kediu sie, “Miapfü puo sie, ‘Kerheiyo a nuo, mu n nuoyoe kesiayo;’ mu kekreiue sie, ‘Mo derei n nuoyoe kesiayo, mu a nuoe rheikebayo’ ite.”

²⁴Süla kediu sie, “Zhiecha puo se vorcie” sita. Sitse ukoe zhiecha puo se kediu mhodzü vorlie.

²⁵Siru kediu sie, “Rheikebayo da kenie chülie, sidi ketoupuo pie miapfü puo tsüwa, mu ketou puo pie kekreipfü tsüwalie” sita.

²⁶Sitse kerheiyonuo zuoe puo nuo la puo nou mezhieta, di sie kediu üse, “He-i a niepuu, nuo kerheiyo pie puo tsüwalie, sidi puo dukhriwa hie zocie” sita. Derei kekreipfüe sie, “Süu bu a vie rei chü hie morei n vie rei chü hie, derei kezawalie” sita.

²⁷Sitse kediu sie: “Kerheiyo pie keriepfü tsüwalie, mu puo dukhriwa hie, puoe süyonuo zuo eru,” sita.

²⁸Sitse Israelmia pete kediu dienya kecükeshü capiu dze silie; sidi ukoe kediu preita, kekreilamonyü ukoe dietho tou di chülie kevi Ukepenuopfü mhasi puo gei tuokecü ngulieta.