Read Angami Naga Kediko Kerieu 4 Bible Online

Kediko Kerieu 4 - Angami Naga bible

Kediko Kerieu 4

¹Kediu Solomon-e Israel pete mho kedi chü,

²Mu hako puo themia kezhako: Zadok nuou Azaria-e zievo chü.

³Shisha nuonie Elihoref mu Ahija bu kepethanie chü; Ahilud nuo Jehoshafat bu kethuu chü.

⁴Jehoiada nuou Benaia-e rüpfhünuoko mhokezha chü.

⁵Nathan nuo Azaria-e kezhako mho kezhau chü. Nathan nuo Zabud-e zievo mu kedi khrietho-u chü,

⁶Siro Ahishar kedikiu kemeho-u chü; tsiu Abda nuou Adoniram bu mhakechüko meho.

⁷Solomon-e Israel pete mho kezhamia kerekenie khapie balie, süko bu kediu mu puo kinu la kecüca keseya, mia puoe teicie puo nu khrüpuo meseseya.

⁸Uko zae hakoha: Efraim kijüthouu nunu vo Ben-hur;

⁹Ben-deker-e Makaz, Shalbim, Bethshemesh mu Elon-beth-hanan nu;

¹⁰Ben-hesed-e Aruboth nu, (puo kitsa Soko mu Hefer kijü pete puo vie);

¹¹Ben-abinadab-e Nafat-dor pete nu, (puoe Solomon nuopfü Tafat liepie puo kimia chülie);

¹²Ahilud nuou Bana, puo kitsa Tanak mu Megido, mu Beth-shean pete, süu Zarethan khie ki Jezril khro, Beth-shean nunu vo Abel-mehola ketso, Jokmeam tse kevo thechüu ketso.

¹³Ben-geber, Ramoth-gilid nu; puo kitsa Jair Manasseh nuou rünako, süko Gilid nu ba; siro puo kitsa Argob kijüko Bashan nu kebako; rüna kezha hiesorou dahouko mu mese cakhako chükecü ba.

¹⁴Iddo nuou Ahinadab Mahanaim nu;

¹⁵Ahimaz, Naftali nu (puoe Solomon nuopfü Basemat liepie puo kimia chü.)

¹⁶Hushai nuou Bana, Asher mu Bealot nu;

¹⁷Paruah nuou Jehoshafat Isakar nu;

¹⁸Ela nuou Shimei, Benjamin nu,

¹⁹Uri nuo Geber, Gilid kijü pete nu, Sihon Amormia kediu rüna nu mu Og Bashan nu kediu, siro Juda kijü nu kezhamia puo rübei zo.

²⁰Juda mu Israel-e krapie dzükezha khie theshünyo mhie zo, ukoe cüükrie di uko nei phi ba.

²¹[2] Solomon-e Eufrat nunu vo Filistin rüna ketso, tsiu Ijipt tierie ketso kedi rüvie peteko mho kedi chü; sükoe Solomon kerheichie khezhanuo se vor puo tsü mu puo lie chü.

²²Siro Solomon kecüca khunhie puo la thou kevitho kemejü ser, tsiu kecüca kemejü hiesorou,

²³thudo keluo ker, siro lie nunu pedo mepfü, tekuo krie puo, sütsü gei tekhra, thelou, mu chüzhie, tsiu thevü puo phou kevi sa.

²⁴Kekreilamonyü puoe Efrat rü niakratsa peteko nu, Tifsa nunu vo Gaza ketso, Efrat niakratsatie kediko pete mho kekha, siro puo khie lutsahatsa pete nu kezekevi ba.

²⁵Siro Juda mu Israel, Dan nunu vo Ber-sheba ketso, themia pete puo khubebo khro mu puo chiedebo khro nu Solomon kerheichie lhou khrukhre balie.

²⁶Siro Solomon-e puo gura gari la gura ki nyie hiedia mu gura themia nyie kerekenie ba.

²⁷Siro kezhamia sükoe kediu Solomon mizhü ki kevormia pete la, thekhrü metsei u meseu nu keseshüya; ukoe mhapuo nu rei tsopfhüta mo.

²⁸Ukoe gurako la mu khunuoko la barli mu rügu u thuo u mese nu se vor kezhamiako kebachü nu shüshü.

²⁹Siro Kepenuopfü mhasi tsiu kesikele kha phishü Solomon tsü, siro puo nou meyakecü bu dzükezha khie theshünyo kemhieshü zo.

³⁰Süla Solomon mhasi-e niathu tsatie themiako tsiu Ijipt nu mhasi pete kirei vikuo.

³¹Kekreilamonyü puoe mia pete ki rei, Ezrahitmia Ethan-u kirei, Mahol nuonuoko Heman, mu Kalkol mu Darda, hako ki mhasikuo; siro puo khie puo mhou seyie pete nu puo za meyie vota.

³²Siro puoe mhasidie nyie se pushü; tsiu puo ütsali-e nyie puo di pengou.

³³Puo seibo dze, Lebanon nu keba sedar bo nunu vo hisop nhapfü dahou nunu tsü paryakezha dze pu, tsiu puoe khunuo dze, mu pera mu guketuo khunuo mu khuo dze pu.

³⁴Siro kijü pete nunu mu kedimia pete donu nu themia Solomon mhasi rünyütuoü vor.