Read Angami Naga Kediko Kerieu 5 Bible Online

Kediko Kerieu 5 - Angami Naga bible

Kediko Kerieu 5

¹Sitse Hiram, Tur nu kediu puo kituoko ketsepie Solomon ki shü; puoe uko puo kedapie puo puo sou nu kedi chü baketa sicü la; kekreilamonyü Hiram-e puotei pete nu David khrietho mia zo.

²Sitse Solomon-e die ketsepie Hiram tsü di sie,

³“Jihova uko khapie puo phizho chüwa kemochie, a puo David-e puo khie puo mhou pete nu terhükechü la ki puo chüpie Jihova puo Kepenuopfü za nu shülie lhoketa dze no sidi ba.

⁴Derei tsiewe Jihova a Kepenuopfüe lutsahatsa rei kerülei kha a tsüshüte, sidi mia a ngukemvü rei jü morei mha kesuo rei vor mote.

⁵Mu süla a ki puo chüpie Jihova a Kepenuopfü zanu shüketuo medoliete, süsü Jihova a puo David ki pukeshü: ‘N nuou a puo pie n kediba gei shüshüketuou, puoe ki puo a za nunu chülietuo.’

⁶Süla no tsie uko bu Lebanon nu sedarbo wishüketuo die khashücie; mu a kituokoe n kituoko zetuo, mu no zha pukeshü pete chüshü n tsütuo; kekreilamonyü hieko donu miapuorei Sidonmia kemhie sei wi sikecü ba mokecü no siba eru” sishü.

⁷Siro Hiram-e Solomon die silie tse, puo nei phita, sidi sie, “Thie Jihova bu zapuzayie chüliecie; puoe themia kekra hakoha la nuo mhakesi puo pie David tsükeshü la” sita.

⁸Sidi Hiram-e Solomon ki mia ketseshü di sie, “No a ki ketsekeshü dielieu a sishüte; mu ae no sedar sei mu Fir sei dze la n kemengu pete chüshüketuo dojü se ba zo.

⁹A kituokoe süko Lebanon nunu se ker dzükezha nu shütuo, mu ae süko dzükezha nunu pekru pie no a ki pukeshüra shüshütuo, sidi sünunu a süko khashüwatuo, mu no süko ngulietuo, mu noe kecükekrie pie a kinumiako tsü di a menguko chü tseishütuo,” si.

¹⁰Sidi Hiram-e sedarboko mu Firboko Solomon kemengu de chüshü tsü,

¹¹tsiu Solomon-e Hiram kinumiako la kecüca thoulha kemejü nyie mepfü, siro tier zokecü gekelie kemejü nyie mepfü khashü. Hakemhie di Solomon-e teiciekepra pie Hiram tsü.

¹²Tsiu Jihovae phrakeshü tuoi, mhasi pie Solomon tsü, tsiu Hiram mu Solomon unie donu kezekevi balie; mu unie-e keze kedietelie.

¹³Tsiu kediu Solomon-e Israel pete ki khezhanuo kekhruo mhatho puo khashü; tsiu khezhanuo kekhruo themia nyie ser.

¹⁴Sidi puo süko ketse pie Lebanon nu shü, thekhrü puo nu mia nyie ker idi, khrü puo ukoe Lebanon nu balie, mu khrü kenie kinu balie, Adoniram bu khezhanuo mhokezha chü.

¹⁵Siro Solomon-e thepie kepfü mia nyie hiethenie mu kijüthouko gei ketsie kechümia nyie hiethetha rei ba.

¹⁶Sütsügei rei, themia mhakechüko kemeho, Solomon themia kezhako mhatho kemeho mia nyie se di krie se.

¹⁷Kediu diekhakeshü nunu, ukoe ketsie kezhazhakecü, puoma kere, mu ketsie phrokewa kiu mvüdze chütuoü se vorlie.

¹⁸Sidi Solomon kituomiako mu Hiram kituomiako mu ketsiekechümiako süko phrolie, sidi ukoe kiu chütuoü seiko mu ketsieko keselieta.