Read Angami Naga Kediko Kerieu 6 Bible Online

Kediko Kerieu 6 - Angami Naga bible

Kediko Kerieu 6

¹Situo di Israelmiako Ijipt nunu taparkelie cie krie dia di hiethetha cie, Solomon-e Israel mho dikelie cie dia cie, Ziv-u khrü, süusü khrü kenieu, puoe Jihova kiu chü sedelie.

²Tsiu kediu Solomon-e Jihova la ki chükecü puo cha thu hiesorou, puo zha thu mepfü, tsiu puo rükrie thu ser.

³Siro ruosuokiu mhodzü kifükhro-u thu mepfü, kiu puo zhau zeketou, tsiu kiu mhodzü puo kesouu thu ker.

⁴Kiu la puoe kezie bu leketuo khirki chüshü.

⁵Puoe sozhau peze di kibou chü pie houshü, kiluo mu kemesa sie kemesau, puoe kibou chü pie süko houshü.

⁶Kibou kerünuotho-u[3] thu pengou meya, tsiu metsuo-u thu sorou meya, tsiu seu thu thenie meya, kekreilamonyü kiu sozha chazoutsa puoe mhakemengupfü khashülie, süusü kiphiko se vo di kiu sozha ze ketouwawa moketuo la.

⁷Kiu chükecü ki, tsiekriechü nunu jo toulieketa pie chü, sikelie la süusü chü kebaki, mhajokecü pfhe morei thegi pie kechü pfhe kiu nunu si mota.

⁸Kilha metsuo nu kele kikha ki pekhrotsa ba, mu chapra chü whi se kilha metsuo nu paya mu kilha seu nu rei sidi khoya.

⁹Sidi puoe kiu chülie, mu süu chü tseilie, sidi sedar kirie mu sedar la pie kiu vüwa.

¹⁰Puoe kibouko chü pie kiu pezeshülie, puo rükrie thu pengoungou mu sükoe sedar seiu la pie kiu gei khriepfü bata.

¹¹Sitse Jihova die Solomon ki vor di sie,

¹²“No ki chükeba hau, mhanuü noe a zhoko nu tuolie, tsiu ahzako zelie, siro a diekhakeshüko nu tuolie liro, a a die n puo David ki pukeshüu chüshütuo.

¹³Siro ae Israelmia nuonuoko donu tuolietuo, tsiu a themia Israelko khawalie lho zo” si.

¹⁴Sükemhie di Solomon kiu chülie mu süu chü tseilie.

¹⁵Tsiu puoe kiu puo nu sozhako, sedar la pie dashü, kiluo-u nunu kiluo mhoya ketso; puonutsa sei pie khrawa, tsiu kiu kiluo-u saipres la pie khrawa.

¹⁶Siro puoe kiu khietsa thu mepfü chüshü, kiluou mu sozhako sedar la pie chüshü, puoe puonutsa rei chüshü, thechü kemesatho-u la rei sa.

¹⁷Siro kiu, süusü mhodzü keba ruosuokiu puocha thu hiedia.

¹⁸Siro kiu puonutsa nyiepou wekeba mu poukeba rhikecü pete sedar phre zo; ketsie puorei ngu mo.

¹⁹Siro puoe puonutsa rei puonutho-u nunu dietseidiekhobouu khashütuoü di kemesa sie rei mesakecüu keselie.

²⁰Kemesa sie rei mesakecüu mhodzütsa puocha thu mepfü mu puo zha thu mepfü, tsiu puo rükrie thu mepfü, mu puoe suna pie puomho dashü; sidi ruosuoba sedar pie kechüu khrawa.

²¹Siro Solomon-e kiu nutsa suna kemesatho pie dawa, mu puoe kemesa sierei mesakecüu mhodzü suna kedoukecü pie khakekreiwa, sidi puoe süu mho suna pie dawa.

²²Siro puoe kiu pete suna pie dawa, kiu pete chü tseilie kemochie, siro kemesa sierei mesakecü nu keba ruosuobau pete suna pie dawa.

²³Siro kemesa sie rei mesakecüu nu puoe Oliv pie cherub kenie chülie, puo rükrie thu ker phre di.

²⁴Siro cherub puo puoshü thu pengou, mu cherub shü kekreiu thu pengou, puoshü tietsatie puo nu vo puoshü kekreitsa thu ker.

²⁵Siro cherub kekreiu rei thu ker, cherub kenienie rei unie kemejü puo zo mu puo kecü kezha rei puo zo.

²⁶Cherub puo puo rükrie thu ker, mu cherub kekreiu rei sükemhie zo.

²⁷Puoe cherubnie pie kiu kesoutho nu shüshü, sidi cherubnie shü lhashülie, sidi puoshü puo bu vo sozha nyüpfü balie, siro cherub kekreiu shü bu vo sozha kekreitsa nyü balie, siro unie shüe kiu metsuo nu huoniehuo nyüpfü balie.

²⁸Siro puoe suna pie cherubnie gei dashü.

²⁹Siro puoe kiu sozha peteko nu cherubko mu kukuobo mu nyiepou poukeba rhi pie puonutsa tsiu puomhotsa shüshü.

³⁰Tsiu kiu kiluou puo nu tsatie tsiu puomho tsatie puoe suna pie dashü.

³¹Siro puo metsuo nu leketuo la kikhako puoe Oliv sei pie chüshü; kiprüu mu puo tsei conie donu kemeyau sozhau za pengou za puo.

³²Puoe kikha nie rei Oliv sei pie chü; siro puoe sünie gei cherubko mu kukuobo mu nyiepou poukeba rhishü, sidi suna pie süko gei dashü, tsiu suna keza pie cherubko mu kukuoboko gei dashü.

³³Siro puoe ruosuoba kiu kikha coko, sozha za dia za puo Oliv sei pie chü.

³⁴Mu kikha nie saipres sei se chü; kikha puoe puo rükhre kenienie nu kikha kekreiu rei puo rükhre kenienie

³⁵Puoe sügei cherubko mu kukuobo mu nyiepou kepou rhi shülie; sidi sükosü rhikebako mho suna pie dakemethashü.

³⁶Tsiu puoe kikha puo nutsa kebau mu ketsie phrokelie pie cha se chü mu sedar kirieko pie cha puo chü.

³⁷Cie dia cie, Ziv-u khrü Jihova kiu mvüdze dze tseilieta.

³⁸Mu cie kerepuokrü cie, Bul-u khrü süu khrü thethau nu, kiu mha peteko nu mu süu rhiu nu kemhie, chü tseilie. Puoe cie thenie süu chü bata.