Read Angami Naga Kediko Kerieu 7 Bible Online

Kediko Kerieu 7 - Angami Naga bible

Kediko Kerieu 7

¹Siro Solomon cie kerese puo thuo puo kiu chü bata, sidi puoe puo ki pete chü tseilie.

²Puoe Lebanon ketsau nu kiu rei chü, puo cha thu krie puo, mu puo zha thu hiepengou, mu puo rükrie thu ser, sedar co cha dia gei mu co cha dia sedar kirieko coko gei khriepfü ba.

³Siro süu kirieko gei sedar pie khra, mu süko cha puo nu kerepengou di co hiediaepengou gei ba.

⁴Siro sünu khirki cha se chüba, tsiu kezie-e puocha se chü di ler va ba.

⁵Siro kikhako pete mu coko pete puo cha puo zha ketou khirki rei sa, tsiu kezie-e puocha se chü di va ba.

⁶Siro puoe tsiepouko kibou puo chü, süu puocha thu hiepengou, mu puozha ser. Siro süko mho keya puo sa.

⁷Süsie puoe dienya kecüketuo la Kediba Kibou puo chülie, Kethoca Kibou puo rei sa, siro süue kiluo-u tietsatie puo nu vo kekrei tsatie ketso sedar pie khrawa.

⁸Puo thuo keba kiu nu rei kibou kekrei puo ba, süu mhatho kemhie di chü. Süu Solomon-e Faro nuopfü, puo liepie puo kimia chükeliepfü, la rei sa ki puo chü, süu kibou hau kemhie di chü.

⁹Mha hako pete ketsie puoma kere pie chü, ketsie phrokelie kemhiei, seigeizhie pie geikelie tuoi, puonu mu puomho, puo mvüdze nunu vo puo tsüse ketso, sükemhie di chazou nu vo di kibou kezhau ketso.

¹⁰Puo mvüdze ketsie puoma kere se chü, ketsie kezha thu ker, tsiu thu thethatha.

¹¹Siro puo tsü gei ketsie puoma kere, ketsie phro kewapfü tuoikecü, mu sedar tuoikecü ba.

¹²Siro kibou kezhau whikevo-u ketsie phrokecü pie chükecü cha se, siro sedar kirie cha puo, Jihova kiu puo nu, tsiu kifükhro rei sa.

¹³Siro kediu Solomon mia ketseshü di Tur nunu Hiram ze vorlie.

¹⁴Puoe Naftali yiemia thenusamipfü puo nuo, tsiu puo puoe Turmia, merenyi chüyakezhamia puo: mhasi mu kesikele puo tshupfüketuomia puo, mu merenyi mhatho pete chü si. Puoe kediu Solomon ki vor, sidi puo mhatho pete chülie.

¹⁵Merenyi co kenie selie, sünie puo puocha thu kerethetha, mu kero puocha thu kerekenie pie süu whi vo.[4]

¹⁶Co nie tsügei seketuo la merenyi lhopie puo tsüse kenie chülie; puo tsüse puo rükrie thu pengou mu kekreiu tsüse rei thu pengou rükrie.

¹⁷Süsie puoe dorü puokhu kekreikecü, mu rohou kedoukecüko pie co nie tsü seketuo la chülie; puo tsü kese puo la thenie mu kekreiu la rei thenie idi.

¹⁸Tsiu puoe conie pesielie, sidi dorü puo mho gei puocha kenie chüpie whishü, turaü pouko pie pesogei puo tsüseu wheshüketuo la, siro sütuoi puo tsüse kekreiu la rei chülie.

¹⁹Siro kifükhro co tsüko mhogei kebako rhi pie terhuobiepou kemhiei, thu dia idi chülie.

²⁰Siro co nie tsügei turaü rhi sa pie ba, tsiu dorü khieki metou kebau mho ba; tsiu turaü rhiko co kekreiu houpfükeba puo cha chükeba krie kenie ba.

²¹Siro puoe rüsuoki kifükhro co seshü, mu puoe co thezatsa kebau rei seshü, sidi süusü za thopie Jakin chülie, siro puoe co thevi tsatieu seshü sidi süu za thopie Boaz chülie

²²Siro coko mhogei terhuobiepou rhishülie, sümhie di coko chü tseilieta.

²³Süsie puoe mha lhopie dzükezha puo chü, puokhie tietsa puo nu vo kekreitsa ketso thu ker, süusü puokhie houpfü votso, mu puo rükrie thu pengou, siro puocha thu ser pie süu houpfü ba.

²⁴Siro süu houpfükeba puokhieko khro seipie da voshü, sei süko thu kerker, dzükezhau houpfüba; süu dakeshü cha kenie chü.

²⁵Süu pedo kerekenie gei thatha, se-e pesotsa va, mu se-e niakratsa va, mu se-e pekhrotsa meho, mu se-e niathutsa meho ba; sidi dzükezhau pie uko mhogei shüpie ba, siro uko sietsatie-e puonutsa bata.

²⁶Mu süu puo keshü dziezhüne puo merenyi, siro puo khie-e tehie khie kemhiei, süu terhuobiepoupfü rhi, süu dzülou gallon nyie kerekenie balie vi.[5]

²⁷Puo mese pie puoba ker chülie, puoba puoe puo cha thu dia, puo kezha thu dia mu puo rükrie thu se.

²⁸Puo bako hakemhie di chülie; sükoe puo touchako ba, mu puo touchako pie puokhie kehouko nu ba;

²⁹mu puokhieko donu puo touchako gei loshako, thudoko, mu cherubko ba. Puo khieko gei, loshako mu thudoko mho mu puo khro rei kemenuo mhatho huo chü.

³⁰Sizomonyü puoba puo gei mese thuo dia mu merenyi khou ba, mu puoke diako nu dzieteikhou khro phitouko ba, mu phitouko puo khu thupie ba.

³¹Puo tsüseu nu keba puotie kecieu mho thu puo ba; puotie kecieu rei puobau kechü mhiei, merü, thu puo di puotie sou, mu kecieu gei rei puokhie mharhiko puoke dia chü merü mo.

³²Mu süko khro nu mhathuo dia ba, tsiu mhathuoko mengusekeba puo mvüdzeu ze di puochü; mu mhathuo puoe puo rükrie thu puo di puotie.

³³Mhathuoko chüpie guragari thuo ze kemhie, süko keteko, puo thuo houpfü kebako, mhathuo seiko mu puo thuo metsuo nu kebako pete mhathepezha pie chü phre zo.

³⁴Puo bau puopuokecü puo kekheko nu puo keteu dia; puo kete süko puo bau ze kekhie.

³⁵Puo bau mhogei mha kemetou puo thu puotie rükrie, sidi puo mvüdzeu mhogei puo keteko siro kekhrako süu ze keze puo chü.

³⁶Sidi puo keteko siro puo kekhrako mu cherubko, loshako, kukuoboko, donu kemeyau ze di lutsa hatsa miarhi rhi vo.

³⁷Süsie puoe puo ba ker chülie; süko pete rei puozho puo, puo kemejü puo, mu puorhi puo phre.

³⁸Süsie puoe merenyi pie mhabou ker chülie; mhabou puopuokecü nu dzükemejü hiedia[6] baliekevi chü; sidi puo mvüdze kerko gei mhabou puopuo ba.

³⁹Mu puoe puo mvüdzeko pengou pie kiu pekhrotsa shü, siro pengou pie pesotsa shü, siro puoe dzükezhau pie kiu pekhrotsa mu niathutsa donu puoketho nu shü.

⁴⁰Hiram-e galiko, mhakeka vienyako, mu mhakhouko chülie. Sükemhie di Hiram-e Solomon kediu la Jihova kiu mhatho pete chü tseilie.

⁴¹Puo co kenie chükelienie, siro co kenienie mezü gei keba puo khou kenienie, tsiu puo khou kenie chükelie nie wheketuo la dorü kenie.

⁴²Siro dorü nie la turaü krie dia donu puo la turaü cha kenienie, süusü puo co nie gei khou nie wheketuo la;

⁴³Puo mvüdze kerko, siro puo mvüdze gei keba mhabou kerko;

⁴⁴dzükezha puo, siro süu khro pedo kerekenie ba.

⁴⁵Sidi galiko, mhakeka vienyako, mu mhakhouko, mhabou hako pete Hiram-e Solomon kediu la Jihova kiu kechü, merenyi phriephriekecü se chü.

⁴⁶Kediue süko pie Jordan razha nu shüshü, Sukot mu Zarethan nie donu rünyo kijü nu.

⁴⁷Solomon-e mhabou hakoha mejü mo, kekreilamonyü süko krathor zeru; merenyi mesei pfülie kenjüta.

⁴⁸Sidi Solomon-e Jihova kinu keba mhabou pete chülie: Suna pie kechü ruosuoba, mia kepekie niekhrüda la suna pie kechü mizhü.

⁴⁹Suna rüpie pie kechü mitou ba, thezatsa pengou mu thevitsa pengou, kemesa sierei mesakecü mhodzünu, nyiepouko, mibouko, siro suna pie kechü mhakebe nyako,

⁵⁰tehieko, tsübeko, mhakhouko, kecieko siro suna rüpie pie kechü mharekethengu kethe galiko; tsiu suna pie kekhakecü, kilha kepekhretho-u nu la, kemesa sie rei mesakecüu mu thechü kemesau mu rüsuokiu la kikhako.

⁵¹Hakemhie di kediu Solomon-e Jihova kiu chü tseilie. Solomon-e puo puo David-e chükemesa se ketuo, rakachü, suna mu mhakhouko se vorlie sidi süko khapie Jihova kiu nu kinyibou nu shüwa.