Read Angami Naga Kediko Kerieu 8 Bible Online

Kediko Kerieu 8 - Angami Naga bible

Kediko Kerieu 8

¹Süsie Solomon-e Israel pehüko, seyie krütako, tsiu Israel puonuo kinuko krütako pete kiekengu pie Jerusalem nu kediu Solomon mhodzü shülie, süu David rüna nunu Jihova dietseidiekhobouu Zion nu kebau se vortuoü di.

²Sitse Israelmia pete thenyi tei ki Ethanim khrü süusü thekhrü thenieu nu vor kediu Solomon mhodzü ki kengulie.

³Mu Israelmia krütako pete vor tsiu zievoko, dietseidiekhobouu tou pielie.

⁴Siro ukoe Jihova dietseidiekhobouu, tsiu themiako kehoukiu, tsiu kehouki nu keba mhanya kemesako pete se khorlie, sükosü zievoko mu Levikoe se khorlie.

⁵Siro kediu Solomon, mu Israel kro-u, vor puo mhodzünu kengukelieko, puo ze dietseidiekhobou-u mhodzü vorlie, sidi uko tekuo mu pedo kekra rei pie ruosuo chü, süko krathorkecü la pulie morei phrühulie kenjü.

⁶Süsie zievokoe Jihova dietseidiekhobouu pie vor kemesa sie rei kemesa kiu nu, Cherubnie shükhro vorlie.

⁷Kekreilamonyü Cherubnie-e u shü kelha pie dietseidiekhobou thau mho gei shü pie ba, mu Cherubnie-e dietseidiekhobou mu süu mho gei seiko whelie.

⁸Sidi seiko cha phi vo bacü la puotietsatie kemesa sie rei kemesa chüu mhodzü ki nguba, derei we chazou süko ngu mo: mu süko thie ketso rei sünu ba zo.

⁹Dietseidiekhobouu nu Mosae Horeb nunu khakeshü, zhapu tsiekranie sie kekrei ba mo, süusü Israelmia nuonuoko Ijipt kijü nunu parkelie ki, Jihova uko ze dietseidiekhokelie.

¹⁰Siro zievoko kemesa chü nunu parlie tse, kimhou thuo Jihova kiu tshu pfübata.

¹¹Süla zievokoe kimhou la tha di mhachülie kenjüta, kekreilamonyü Jihova zapuzayieu thuo Jihova kiu tshupfü bata.

¹²Süsie Solomon-e sie, “Jihovae pucü puoe kimhou shüde-ikecü nu lhou tuotuo.

¹³Ae n bu kechachie baketuo la, ki kevi puo chü n tsüwate” si.

¹⁴Sitse kediue puo zie kerürei vorlie, sidi ja pie Israel kro-u pete tsü, Israel pete kenguketha chüu nunu.

¹⁵Puo sie, “Israel Kepenuopfü, Jihova bu zapuzayie chüliecie, puoe puo tie pie a puo David ki pu, mu puo dzie üse süu chü tseilie, süu pukecü,

¹⁶‘Ae Ijipt nunu a themia Israelko ze parkelie teisozha nhie yawinu, ae Israel seyie pete donu rei a za bu balieketuo la ki chütuoü rüna puo rei kedashü mo, sirei ae David bu a themia Israel mho di tuoü di puo kedalie.’

¹⁷Siro a puo David ki puo chüpie Jihova, Israelmia Kepenuopfü za nu shütuoü puo nou letuoya.

¹⁸Derei Jihova sü a puo David ki, ‘Noe n nou nu ki puo chüpie a za nu shütuoü letuoya, no n nou letuoyakezha süusü vi zo;

¹⁹sirei noe ki süu chülie lho; derei kiu pie parketuo n nuou bu kiu pie a za nu shütuo ho.’

²⁰Sirei tsie a a puo David sou nu sierliete, mu ae Israelmia kediba nu baliete, Jihova phrakeshü tuoiliete, sidi Jihova Israel Kepenuopfü zau la nu ki puo chüliete.

²¹Mu a sünu dietseidiekho bouu la thechü puo khapie ba, sünusü Jihova ze dietseidiekho kelieu ba, süu u puonuoko, puoe Ijipt kijü nunu uko ze parkeshü ki chülie.”

²²Sitse Solomon-e Israel kro-u pete kehou kebau nu Jihova ruosuo chüu mhodzünu thalie, tsiu puo dzie yhapie teigei petsoulie.

²³Sidi sie, “He-i Jihova, Israelko Kepenuopfü, teigei pesogei rei, morei puo kijü khro rei, n kemhie puo rei tuo molie, noe n kituomia u nou pete se n mhodzünu ketuomia gei n die khapie baya tsiu ngumezhieya;

²⁴noe n kituou a puo David ki phrakeshüu chüshüe; noe n tie rei pie pu, siro n dzie üse thie süu chü tseiliete.

²⁵Süla tsie, Jihova, Israel Kepenuopfü, noe n kituou a puo David ki pukeshü tuoi chüshücie, süu pukeshü, ‘A mhingu ki Israel kediba gei themia balie moketa n gei chülie lho; mhanuü n nuonuoko a cha nu menuolie, sidi noe a mhodzü tuo kevo tuoi uko rei tuo volie ro.’

²⁶Süla tsie, He-i Israel Kepenuopfü n die n kituou a puo David ki pukeshü tuoi, chüshücie.

²⁷“Derei Kepenuopfüe kijü nu ba ketho me? Harie, teigei mu tei kerükrietho-u n sebalie kenjü; siliro a chükelie ki hau kedipfü süki rei mere tie shi!

²⁸Sirei noe n kituou kecha tsiu puo mezhiemelokeshüko rünyücie. He-i a Jihova a Kepenuopfü, n kituou thie n ki chayakezha puo kekra tsiu puo kecha rünyüshücie.

²⁹Sidi n mhi üse teizei gei tsiu teiso gei meho terü balie, noe pukeshü chüu, ‘A za süu nu batuo we’ ikeshü nu shüshülie, sidi n kituou thechü hau la kechakechü rünyüshücie.

³⁰Tsiu no n kituou, siro n themia Israel, ukoe thechü hau la chakeshü rünyücie, sidi n kebachü teigei nu rünyüshücie, mu no rünyükeshü ki, kejovashü tsücie.

³¹“Mhanuü mia puoe puo siezanuomia gei kejo chüwa, sidi puo tepie puo bu rüsewa, tsiu rüseu se ki hau nu n ruosuoba gei vor,

³²sitse no teigeinu rünyüshücie, sidi chüshülie, themia kerüzhüu pejowalie, puo zho-u pie puo tsügei shüwalie; mu kemiatho-u bu mezhülie, puo kemiatho ki ze chüshü puo tsülie.

³³“N themia Israelko ngumvümia mhodzü tetsuta, kekreilamonyü ukoe n gei jowata, sidi rürei la n ki vor, sidi n za phralie, kechachülie mu ki hau nunu u mezhiemelolie.

³⁴Siliro no teigei nu rünyüshücie, sidi n themia Israelmia kejokemou vashü tsücie, sidi no pie uko puonuoko ketsü kijüu nu ze la vorshücie.

³⁵“Teigei khawata, sidi tei-e rüshü mota, kekreilamonyü ukoe n gei jowa, sizoürei ukoe thechü hau nu kechachülie, sidi n za phralie mu uko kephouma nunu rüreilie liro, no uko pechükeshü ki.

³⁶No teigeinu rünyüshücie, sidi n kituou mu n themia Israelko kephouma vashü tsücie, sidi no uko bu voketuo cha keviu thapie kieshücie, sidi tei perüpie n kijüu gei shücie, süu noe uko bu welietuoü khapie n themiako tsüshüwate.

³⁷“Mhanuü kijüu gei pekrieta, mhanüu thepetheruo, teikhrie, thezei, ku morei zope bata; mhanuü uko nadiko nu u ngumvümia uko whuota, thepetheruo kehoupuo vorta rei, kechükenyü kehoupuo vorta rei,

³⁸themia kehoupuo shierei morei n themia Israel pete-e kechachülie mu u mezhiemelolie mu mia puopuokecü puo melou nu mha kesuou silieta di puo dzie yhapie ki hau nu shülie ro.

³⁹Sitse no teigei n kebachü nunu rünyüshücie, sidi kejovashü tsücie, sidi chüshücie, mu mia puopuokecü puo mhatho kheki sü chüshü tsücie, uko melou nu kedipuo ba shikecü noe si ba, (kekreilamonyü noe, no zokecüu ha, themia nuonuo melou nu kedipuo tuo shikecü siya).

⁴⁰Silietse ukoe no khapie uko puonuoko ketsü kijüu nu lhouketuo ki n khrü preilietuo

⁴¹“Sükemhie rüsomia, süu n themia Israelmia kemo, derei n za la rüna kepetsera nu vorta,

⁴²(Kekreilamonyü ukoe n za kemeyieu mu n dzie kemetei, mu n bou yhapie keba silietuo.)

⁴³Puoe vor di ki hau nu kechachüta tse; no n kebachü teigeinu rünyüliecie, sidi chazoumia n ki kedipuo cha shi chüshü tsücie, sitse kijü nu ketuo themia pete n za silietuo, sidi n khrü preilietuo, sidi ukoe ki hau, a chükeshüu, n za üse kieya ükecü silietuo.

⁴⁴“Mhanuü n themiakoe n ngumvümia ze terhü chü ro, noe kehourapuo rei uko ketsekeshüra, sidi no kedakelie nadi petsou di Jihova ki kechachülie ro, mu a n za la chükeshü kiu petsoulie liro,

⁴⁵no teigeinu uko kecha mu uko mezhiemelokecü rünyüshücie, sidi uko yapieshücie.

⁴⁶“Mhanuü uko n gei jowata, kekreilamonyü themia puo rei kejo chükemo ba mo zo, mu no uko gei n nei mo bata, sidi uko khapie ngumvümia dzie nu shüwa di uko ze ngumvümia kijü nu kedie chü vota, kepetsera rei mu kepenuora rei;

⁴⁷sirei ukoe kedie chü voketaranu mhalelie, sidi thenou kedilie, di uko kedie chükeba kijü nunu n ki u mezhiemelo di sie, ‘Hieko jowate tsiu hieneihienyü chütuote, hieko mha kesuo chüwate’ ilie.

⁴⁸Sümhie di u ngumvümia, u ze kedie chüketuora nu u melou pete tsiu u ruopfü pete se rürei n ki vorlie, di uko kiu no khapie uko puonuoko ketsü, no kedakelie nadiu, tsiu a n za la ki chükelieu petsoulie di kechachülie ro,

⁴⁹no teigei n kebachü nunu uko kechakechü tsiu uko mezhiemelokeshü rünyüshücie, sidi uko yapieshücie.

⁵⁰tsiu n themia n gei jowaketako, tsiu uko kemou pete uko n gei moukewa pete vashü tsücie, sidi uko teze kedie chü voketako mhodzünu uko ngumezhieshücie, süusü süko bu uko ngumezhieshülieketuo la;

⁵¹(kekreilamonyü ukoe n themia, tsiu n ka wekelieko zo, no Ijipt nunu thezhü mi tukezhü donunu parkelieko zo.)

⁵²N mhi bu n kituou puo mezhiemelokeshü tsiu n themia Israelko u mezhiemelokeshü meho balie, ukoe n kekie peteko rünyülietuoükecü la.

⁵³Kekreilamonyü noe kijüu gei themia peteko donunu uko kelakreilie, uko bu n ka welietuoü, noe n kituou Mosa ki kepu tuoi, noe Ijipt nunu hie puonuoko ze par, he-i Jihova, hie Kepenuopfü” sishü.

⁵⁴Süsie Solomon-e Jihova ki chakeshü mu puo mezhiemelokeshü tseita tse, puo Jihova ruosuobau mhodzünu nu khoutoupfü di puo dzie yhapie teigei petsou keba nunu sierlie.

⁵⁵Sidi puoe sierthalie, mu diepu puorhiechü di japie Israel kehou pete tsü di sie,

⁵⁶“Jihova bu zapuzayie chüliecie, puoe phrakeshü tuoi, kerülei pie puo themia Israelko tsüshü, puoe mha kevi phrakeshü die yopuo zokecü rei chülie mota mo.

⁵⁷Jihova uko Kepenuopfü bu u zetuokelieu chülie, puoe u puonuoko ze tuokecü tuoi, puo bu u kinu tuo rüdita hie, morei puo bu u khawa hie;

⁵⁸puo bu u nou teshü se puo kitsatie, puo chako pete nu tuolie, tsiu puo die khakeshü mu puo kepetha zhoko, tsiu ahzako puoe pie u puonuoko ketsü chüüzelieketuo la.

⁵⁹A die hakoha, a se Jihova mhodzü a mezhiemelokecüko bu teiso gei mu teizei gei rei Jihova Kepenuopfü penuo balie üthienyü, sidi puo bu puo kituou, tsiu puo themia Israelko puotei pete nu, chüshü morokesuou ze di, yapieshülie üthienyü.

⁶⁰Sitse kijü nu themia pete-e Jihova sü Kepenuopfü zo ükecü tsiu puo sie kekrei tuo mokecü silietuo.

⁶¹Süla nie melou bu Jihova uko Kepenuopfü ze puotou chü baliecie, puo kepethazhoko nu tuo volie, tsiu puo diekhakeshüko chüüzelie, thie hakemhie di” sishü.

⁶²Siro kediu, mu Israel pete puo ze di, Jihova mhodzü ruosuo chü.

⁶³Sidi Solomon-e vitho ruosuo chüpie Jihova ketsü la thudo nyie mepfüekenie mu tekuo nyie krie puo di mepfü se chü, sükemhie di kediu mu Israel pete Jihova kiu chükemesashü.

⁶⁴Teisozha sünhie kediue ki metsuo-u, Jihova kiu mhodzünu kebau chükemesawa; kekreilamonyü puoe sünu kethe ruosuo, mu thoulha ruosuo, mu kesuo pie vitho ruosuo khashü, kekreilamonyü merenyi pie kechü ruosuobau sü Jihova mhodzünu kebaue kethe ruosuo, thoulha ruosuo mu keshuo pie vitho ruosuo kechü la thechü cüthorta.

⁶⁵Süla Solomon-e süteiki Israel pete Lebo-hamath nunu vo Ijipt Guodzüu ketso themia krodi puo ze di thenyi puo Ukepenuopfü Jihova mhodzünu zhathenie balie.[7]

⁶⁶Teisozha thetha nhie puoe themiako ketsewa; mu ukoe japie kediu tsü, sidi Jihova puo kituou David, mu puo themia Israel la chükeshü mha kevi peteko la u nei mu u noumvü phi di u kinu vota.