Read Angami Naga Kediko Kerieu 9 Bible Online

Kediko Kerieu 9 - Angami Naga bible

Kediko Kerieu 9

¹Solomon-e Jihova kiu, kediu kiu mu puo lekeba pete chü tseilie.

²Süki Jihovae va kenieu Solomon pengu lashü, puoe Gibeon nunu puo pengukeshü tuoi di.

³Mu Jihovae sie puo ki, “A mhodzünu no chakeshü mu n mezhiemelokeshü a siliete; a za kechachie khapie balietuoü, no ki chükelie hauha ae chükemesawate ho; mu a mhi tsiu a noue sünu ba sei zotuo.

⁴Mu mhanuü noe n puo David ketuo tuoi, a mhodzünu tuolie ro, thenou mezhü mu miatho, mu a n ki pukeshüko pete chüüzelie, mu a zhoko tsiu ahzako sebalie ro,

⁵ae Israel mho n kediba pesieshütuo, ae n puo David ki phrakeshü, ‘Israel kediba gei balieketuo miapuorei jüketa chüpie n tsülie lho’ idi phrakeshü mhie chüshütuo.

⁶Derei mhanuü noe a siemedzi mo di rürei kekreitsa vota, no morei n nuonuo rei, sidi a pie n mhodzünu keshü dieko tsiu a zhoko mu a khakeshüko chüüzelie mota, di vo terhuo kekrei lie chü tsiu süko rüsuotuota ro,

⁷süsie ae khapie uko ketsü kijüu nunu dathewatuo; mu ki hau la, ae a za la chükemesakelieu a a mhodzünu nu chükelhouwatuo; sidi Israel bu mia pete donu miakremianyü tsiu miadzemiase chü tuotatuo.

⁸Siro ki hauha peruokewa vie puo chütatuo, sidi themia puokhie kevokhe sie: ‘Kiüdi Jihovae kijü hau gei mu ki hau gei haite shi ha?’

⁹Sitse ukoe sie, ‘Kekreilamonyü ukoe Jihova uko Kepenuopfü, Ijipt nunu uko ze parkeshüu khakegewate, tsiu terhuo kekrei zete, sidi süko rüsuote, mu süko lie chütuote, süla Jihova mha kesuo hako se uko gei shü’ situo.”

¹⁰Teicie mepfü tseitaketa ki, Solomon-e ki kenienie Jihova kiu mu kediu kiu chülieta.

¹¹Mu Tur nu kediu Hiram-e sedarko, saipresko mu suna, puoe lie kenyü khe pie Solomon tsüshü, mu kediu Solomon-e Galil kijüu rüna mepfü pie Hiram tsü.

¹²Derei Hiram-e Tur nunu par Solomon-e pie puo ketsü nadiko meho sie, siro süko ngupie puo neilie mota.

¹³Süla puoe sie, “A siezeu, no pie a ketsü nadi hako kicü kro puo mu?” sita. Süla puoe kijü süko üse Kabul[8] üdi kieketa thie rei situoya zo.

¹⁴Siro Hiram-e suna talent krie puo di mepfü ketsepie kediu tsü.

¹⁵Siro kediu Solomon-e khezhanuo khruokecü puoca hako la: Jihova kiu chüketuo la, puo thuo puo kiu la, Millo, Jerusalem dahou, Hazer, Megido mu Gezer la.

¹⁶(Kekreilamonyü Faro Ijipt nu kediu kho di Gezer lielieta di mi pie süu thewa, sidi nadi keba Kananmiako dukhriwa, di süko methuo pie puo nuopfü Solomon kimia tsüwata).

¹⁷Süla Solomon Gezer mu Beth-horon kerünuo nu kebau,

¹⁸Mu Tamar kijü rayha nu Baalath,

¹⁹Mu Solomon-e mhakengukecü nadi pete, siro puo guragari la nadiko mu puo gura kese themia la nadiko, mu Solomon-e Jerusalem nunu ki chükecü pete, mu Lebanon nu, tsiu puo rüvie kijü pete chülalie.

²⁰Siro Amormia, Hitmia, Perizmia, Hivmia, mu Jebusmia, Israelmia nuonuo kemo khawaketako,

²¹kijü nunu uko sietsa khapie bawaketa uko nuosenuoyieko, Israel nuonuokoe peka tseilie kenjüketako, süko gei Solomon-e liethokechü khezhanuo khro, thie ketso rei situo zo.

²²Derei Solomon-e Israelmiako bu we miadiechü mo; derei ukoe terhü themia chü tsiu puo kituomia, puo khruo kezhako mu krie mhokezhako, puo guragari kekhakecüko mu gura themiamia chü.

²³Solomon mhathoko mhokezhako donu pehüko hako, krie pengou di hiepengou, hakoe themia mhakechüko kekha.

²⁴Derei Faro nuopfüe David nadiu nunu par di Solomon-e puo la chükelie puo kiu nu vorlie; sidi puoe Millo chülie.

²⁵Siro teicie puo nu va se Solomon-e kethe ruosuo mu vitho ruosuo, puo ruosuoba chüpie Jihova ketsüu geinu Jihova mhodzü mharekethengu thepie ruosuo chü. Sidi puoe kiu chü tseilie.

²⁶Siro kediu Solomon-e Ezion-geber nu rou kropuo chü, süue Eloth khie ki, Kemerie Dzükezhau[9] khie, Edom kijü nu ba.

²⁷Mu Hiram-e puo kituomia ketsepie rou nu shü, roukethumia dzükezha dze kesimia, Solomon kituoko ze mhachü ketuo la.

²⁸Mu ukoe Ofir nu vo, sidi suna talent krie dia di mepfü pielie, sidi süu se kediu Solomon ki vor.