Read Angami Naga Kediko Kenieu 1 Bible Online

Kediko Kenieu 1 - Angami Naga bible

Kediko Kenieu 1

¹Ahab se sie Moab-e Israel perhie sieta.

²Tsiu Ahazia-e Samaria nu puo kilha peso gei mhaba geinu tetsu di rüzapfüzhüta, süla puo dieliemia ketse di uko ki, “Vocie, sidi Ikronmia rhuou Baal-zebub ki a kechü hanunu shürholietuo mo lho shi ketsocie” sishü.

³Derei Jihovae dielieu Tishbimia Elija ki, “Sieliecie, vo di Samaria kediu dieliemiako ze kesecie, sidi uko ki, ‘Israel nu Ukepenuopfü tuo mota üdi nieko vo Ikronmia rhuou Baal-zebub ketsotuoüya me?’

⁴Süla tsie Jihova hamhiekecü puya, ‘No sie zhüketa zhüu nunu la kerlie lhote, no siata tou zotuo.’ ” Süla Elija-e tuo vota.

⁵Dieliekoe la kediu ki vor tse, puoe uko ki, “Nieko kiüdi la vorta ga?” si.

⁶Sitse ukoe puo ki, “Mia puo vor di hieko ze keselie di sie hieko ki, ‘La nieko ketsekeshü kediu ki voliecie, sidi sie puo ki: Jihova hamhie di puya: Israel nu Ukepenuopfü tuo moketa la nieko vo Ekron rhuou Baal-zebub ketsotuoüya me? Süla no sie zhüketa zhüu nunu la kerlie lhote, mu no siata tou zotuo’ sitelie.”

⁷Sitse puoe uko ki, “Vor nieko ze kese di, die hako pukeshüu kimhiecü puo ga?” si.

⁸Sitse ukoe puo ki, “Themia puomie tsüzhui, siro chüzhü chiepha pie puo chie phalie” si. Sitse puo sie, “Süusü Tishbimia Elija mu sü” si.

⁹Sitse kediue mia hiepengou mhokezha chüyakezhau mu mia hiepengou sa di ketsepie puo ki shü, sitse puoe Elija, kijüthou mezü puo gei kebau ki kho di puo ki, “He-i Kepenuopfü themiau, kediu puyalie, ‘Kerliecie’ ” si.

¹⁰Sitse Elija sie mia hiepengou mhokezha chüyakezhau ki, “A Ukepenuopfü themia üliro, teigei nu mi bu te tsur di no mu mia hiepengouko thewaliecie” sishü. Sitse teigei nu mi tetsur, di puo mu mia hiepengouko thewata.

¹¹Siro puoe mia hiepengou mhokezha chüyakezha kekrei puo mu mia hiepengou sa di ketse lashü mu puoe la kho[1], sidi puo ki, “He-i Kepenuopfü themiau, haue kediu ahza-u te: Mhai kerliecie” sishü.

¹²Sitse Elija-e uko die kela di sie, “Ae Ukepenuopfü themia üliro teigei nu mi bu tetsur no mu mia hiepengouko thewacie” sishü. Sitse Ukepenuopfü mi teigei nu tetsur, sidi puo mu mia hiepengouko thewata.

¹³Süsie rei puoe mia hiepengou mhokezha chüyakezha seu mu mia hiepengou sa di ketse lashü, siru mia hiepengou mhokezha chüyakezha seu tuo kho, sidi phi di Elija mhodzünu khoutoupfü zhüta, sidi puo ki puo mezhiemelo di sie, “Ukepenuopfü themiau, a n ki chaya, a kerheiro mu n kituo mia hiepengou hako kerheiro bu n mhodzü ki puoma rekelieu chülieyi.

¹⁴Harie, teigei nu mi tsur, mia hiepengou mhokezha chüyakezha kenienie, siro u themia hiepengoungou idi thewate; derei tsie we a kerheiro bu n mhodzü ki puoma kereu chülieyi” isi.

¹⁵Sitse Jihovae sie Elija ki, “Puo ze keliecie; puo prei hiecie” sita. Süla puo sielie, sidi puo ze kediu ki vo,

¹⁶di sie puo ki, “Jihova hamhiekecü puya: Noe dieliemia ketsepie Ekronmia rhuo Baal-zebub ketsokecü, süu Israel nu ketsolieketuo Ukepenuopfü tuo motaü di me? Süla no sie zhüketa zhüu nunu la kerlie lhote, derei no siata tou zotuo” sishü.

¹⁷Sidi puoe Elija Jihova die pukeshü tuoi siata. Tsiu Jehoram-e puo sounu kedi chülie, Juda kediu Jehoshafat nuou Jehoram dikelie teicie kenieu tei ki; kekreilamonyü puoe puo nuonuo thepfumia jü.

¹⁸Ahazia mhatho kekreiko puoe chükeshüko süko Israel kediko thedze leshüda nu thupie zhü moü me?