Read Angami Naga Kediko Kenieu 10 Bible Online

Kediko Kenieu 10 - Angami Naga bible

Kediko Kenieu 10

¹Ahab-e Samaria nu puo nuonuo thepfumia hiethenie ba. Süla Jehue leshü thulie, di ketsepie Samaria nu, Jezril mia kekhayakezhako, pehüko, tsiu Ahab nuonuo meho kebako tsü di sie,

²“Nie niepuu nuonuoko nieko ze ba, siro nieko kinu guragari mu gura ba, dahou hu keba nadiu, mu rünyieko ba,

³nie niepuu nuonuoko donu puo kevitho-u kedalie, sidi puo pie puo puo kediba gei shülie, sidi nie niepuu kiu la kegeiliecie” sita.

⁴Derei ukoe michiethorta, di sie, “Harie kedimia kenie thuo zorei puo mhodzü thalie mote; di siro kiüdi hiekoe thalie ta?” sita.

⁵Süla kediki kemeho-u, mu nadiu nu kezhau tsiu pehüko mu nhicuko kemehoko rei sa, mia ketsepie Jehu ki shü di sie, “Hieko sü n kituomia zo; mu noe hie bu chünukeshü pete hie chü zotuo; hiekoe miapuorei bu kedi chü lho; n mhi ki kiu vi shiü chüliecie” sita.

⁶Sitse puoe leshü kenieu ketsepie uko ki shü la di sie, “Mhanuü nieko a kitsa üliro mu a die zetuoü liro, sodu hateiki nieko niepuu nuonuoko tsüko se Jezril nu a ki vorcie” sita. Süla kediu nuonuoko, mia hiethenie, ukoe nadiu nu kezhako uko thekese sierkecüko ze ba.

⁷Sidi leshüu uko tsolie tse, ukoe kediu nuonuoko zelie, di mia hiethenieko dukhriwa, sidi uko tsü ziepie mekho nu shülie di süko ketsepie Jezril nu Jehu ki shü.

⁸Sitse dieliemia puoe vor di puo ki, “Ukoe kediu nuonuoko tsü ziese vorte” sishü. Ru puo sie, “Süko pie kharu nu kele ki pfhe kenie chülie di teisolie kemochie khapie baliecie” sita.

⁹Süsie duü puo vo, thalie, di sie themia peteko ki, “Nieko kejo jü zo, hau a sie a niepuu perhie di puo dukhriwa, derei suomia hako pete dukhriwa ga?

¹⁰Jihovae Ahab kiu dze kepu yopuorei kijü hau nu chü tseilie motalie lhokecü nieko siliecie, kekreilamonyü Jihovae puo kituo Elija ki kepu dieu chü tseishüwate.”

¹¹Sidi Jehue Jezril nu peshapie keba Ahab kinumiako pete, tsiu puo themia kezhako pete, mu puo kicükinumia mu puo zievoko dukhri tseiwa kemochie dukhri zo vo dukhri phrewa.

¹²Süsie puo sielie di Samaria nu vota. Siro chalanu tekuokepfheko tekuomie kebe kiu kiki ba tse,

¹³Jehue Ahazia, Juda kediu kicükinumia ze keselie, sidi sie, “Nieko suomia ga?” si. Ru sükoe sie, “Hiekoe Ahazia kicükinumia lie, mu hiekoe kedimia nuonuo siro kedipfü Jezebel nuonuoko kelutuoü tsurzhülie” sishü.

¹⁴Sitse puoe sie, “Perhei uko teliecie” sita. Sitse ukoe perhei uko telie, sidi tekuo mie kebe kiu kheho nunu dukhriwa, uko mia hiediaekenie; sidi miapuorei lhieshü mo.

¹⁵Sidi puoe sünunu tuota tse, Jehonadad Rekab nuou vor puo zelietuoü zhü di puo dzülie; puoe puo kelushü, di sie puo ki, “A nou n kitsa ketuo mhiei, n nou a gei dietho ba zo mo?”[12] sishü. Sitse Jehonadab-e puo die kela di, “U zo,” sishü. Sitse Jehu sie, “Mhanuü siüliro, n dzie pie a tsücie” sishü. Süla puoe puo dzie chashü. Sitse Jehue puo teshüpie puo guragari gei shülie.

¹⁶Tsiu puoe sie, “A ze vorliecie, sidi Jihova la a shürhei kidepuo ba shi, mehoshücie” sita. Sidi puo bu Jehu guragari gei vota.

¹⁷Sidi unie Samaria nu vorlie tse, Jihova die Elija ki pukeshü tuoi, puo Ahab kinumia Samaria nu lhiepie kebako dukhri tseiwa kemochie dukhri vota.

¹⁸Sitse Jehue themia pete kie kengulie di sie uko üse, “Ahab-e keduo yopuo se Baal liechü; derei Jehue sükezie se chütuo.

¹⁹Süla tsie Baal siedzekesiko pete, puo kerüsuoko pete mu puo zievoko; miapuorei sa mota hie, kekreilamonyü a ruosuo kezha se puo chüpie Baal tsütuo üya; kehoupuorei vor moketamia rheilie lho.” Derei Jehue Baal kerüsuoko pete dukhriwaketuo la puo dovi di haishü.

²⁰Siro Jehue sie, “Baal la kenanyükecü kehou puo pie baliecie” sishü. Süla ukoe süu pesishü.

²¹Tsiu Jehue die ketsepie Israel pete nu shü, sidi Baal rüsuoyakezha pete vor, mu miapuorei vor moketa chü mo sidi ukoe Baal rüsuokiu nu lelie, Baal rüsuokiu tietsa puo nu vo kekreitsa tshulie kemochie.

²²Sitse puoe pfhenei mehoyakezhau ki, “Baal rüsuoyakezhako pete la pfhe se vorliecie” sishü. Ru puoe uko la pfhenei se vorshü.

²³Sitse Jehue Rekab nuou Jehonadab ze di Baal rüsuoki nu le, sidi sie Baal rüsuoyakezhako ki, “Baal kerüsuoko rübei sie Jihova kerüsuo miapuorei bu hanu ba moketuo la pfhü mehowacie” sishü.

²⁴Sidi ukoe le ruosuoko mu kethe ruosuoko chütuoü tuoshü. Tsiu Jehue chazou mia hiethetha kedapie ba, sidi sie, “A se nieko dzie nu kevorko mia puo zorei bu taketa sie, petakewau puo kerheiro pie süu kerheiro souchütuo ho” sita.

²⁵Sidi puoe kethe ruosuo chüwata mumetha Jehue sie kepfheko mu kezhako ki, “Lelie di uko dukhriwacie; miapuorei bu taprata hie” siwa. Sidi ukoe zhiecha pie süko dukhriwa; sitse kepfheko mu kezhako uko mo kelhoupie chazoushüwa, süsie tuo Baal rüsuokiu kesou nu le.

²⁶Ukoe Baal rüsuokiu nu terhuomiarhi se parlie, sidi süko thewata.

²⁷Siro ukoe Baal terhuomiarhiu bierhuowa, tsiu Baal rüsuokiu pekawa, sidi süu chüpie thie ketsorei rhuketa ki puo chüwata.

²⁸Hamhie di Jehue Israel nu Baal pekawa.

²⁹Derei Jehue Nebat nuou Jeroboam Israel chü kephoumakecü Bethel nu keba suna pie kerhi mithunuo mu Dan nu kebako therhielie mo.

³⁰Siro Jihovae sie Jehu ki, “Noe a mhingu ki kemezhüu chü mu a noukele mhie Ahab kiu gei chükeshü pete la, n nuonuo phou diau ketso bu Israel kediba gei batuo” si.

³¹Derei Jehue puo nou pete se Jihova Israel Kepenuopfü zho nu tuo volie mota; puoe Jeroboam kephouma nu, Israel chükephoumakewau therhielie mokecü la.

³²Süteiki Jihovae Israel bie petsawataketuo sedelie. Sidi Hazael-e Israel rüna khie pete nu uko dukhriwa.

³³Jordan niathutsa nu Gilid kijü pete, Gadmia, mu Reubenmia, mu Manassehmia, Aroer nunu Arnon rü kinu, Gilid rei mu Bashan.

³⁴Lasie Jehu mhatho kekreiko, mu puoe chükeshü peteko, tsiu puo kekuo sükosü Israel kediko thedze leshüda nu thupie zhü moü me?

³⁵Sidi Jehue puo puonuoko ze zezhüta; tsiu ukoe Samaria nunu puo khruwa. Sitse puo nuou Jehoahaz puo sou nu kedi chülie.

³⁶Siro Jehue Samaria nu Israel mho dikecü cie mepfüethetha.