Read Angami Naga Kediko Kenieu 11 Bible Online

Kediko Kenieu 11 - Angami Naga bible

Kediko Kenieu 11

¹Siro Ahazianuo zuo Athalia-e puo nuo siaketa ngu tse, puoe kediu kikru pete pekawatuoü sieta.

²Derei Jehosheba, kediu Joram nuopfü, Ahazia üpfüe Ahazia nuou Joash zelie, sidi kediu nuonuo dukhriwatuoü kebako donunu puo rügu zeta; sidi hapfüe puo mu puo thekepfü unie ze vo thezhü bou nu keviewa. Hamhie di Athalia ki nu puo kevielie, di puo dukhriwa molie.

³Puoe Jihova kiu nunu rüshü di cie sorou hapfü ze ba, mu süki Athalia-e kijü süu mho kedipfü chü.

⁴Derei cie thenie cie Jehoiadae mia ketseshü di kriemhokezhako, mia kekhayakezhako mu kepfheko kielie, sidi uko ze Jihova kiu nu puo ki vorlie. Puoe uko ze dietseidiekholie sidi uko bu Jihova kiu nunu rüse, süsie puoe kediu nuou pie uko pekieshü.

⁵Süsie puoe diekhashü di sie, “Nieko mha hau chüliecie: nieko sabat zhanhie rüleiyakezha mu kediu kiu pfheyakezha se za puokoe,

⁶(siro se za kekrei puoe Sur kharu ki baya, mu se za kekreiu bu kharu nu kepfheko sietsa baya,) kediu kiu pfheliecie.

⁷Siro nieko donu za kenie sabat nhie vor Jihova kiu pfheyakezhako,

⁸nieko kediu pfheliecie: Mia puopuokecü puo dzie nu rünyie thezese balie, sidi themia nieko donu kelermia sümia dukhriwalie; siro kediu pa mu lekecü pete nu nieko kediu ze tuoliecie” sishü.

⁹Siro kriemhokezhakoe Jehoiada zievo-u diekhakeshü pete chülie; sidi ukoe u themia sabat nhie rüleiketuoko mu Sabat nhie vorketuoko zelie, ukoe Jehoiada zievo-u ki vor.

¹⁰Siro zievo-ue kediu David rüngou mu pezhü, Jihova rüsuoki nu kebako khapie kriemhokezhako tsüshü,

¹¹sidi kepfhekoe thalie, mia puopuokecü puo dzie nu rünyie se di kediu houpfü tha, rüsuokiu puoke pekhrotsa nu vo rüsuokiu ke pesotsa ketso, ruosuobau tsiu rüsuokiu houpfü tha, lutsahatsa kediu pfhelieketuo la.

¹²Sidi puoe kediu nuou ze parshü, tsiu keditsüre pie puo tsü gei shüshü, sidi dietseidiekho-u[13] pie puo tsüshü, sidi ukoe puo chüpie puo bu kedi chülie, tsiu puo kenheshülie; mu ukoe dzieda di sie, “Kediu bu rhei kechau chücie” sita.

¹³Siro Athalia-e kepfhemiako mu themiako pfhe si tse, hapfüe Jihova rüsuokiu nu themiako ki vor;

¹⁴sidi puoe mehoshü ru, kediu zho ki ze puo khro kezhako mu ketsükekhouko co puo khie ki tha, tsiu kijü süu nu themia pete-e u nei se di ketsü khou keba nguta, sitse Athalia puo pfhe cierha mu kra di sie, “Ngumvümia mhatho puote, ngumvümia mhatho puote” sita.

¹⁵Sitse Jehoiada zievo-ue rüpfhünuo kekhayakezha kriemhokezhako ki diekhashü di sie, “Hapfü ze chazou prawaliecie, siro zhiecha pie hapfü siemedzi kephir kehoupuorei dukhriwaliecie” si. Kekreilamonyü zievo-ue, “Jihova kiu nunu puo dukhrishü hie” sicü la.

¹⁶Süla ukoe hapfü telie, sidi hapfü ze gura bu kediu kinu keler chau ze prata, sidi sünunu hapfü dukhriwata.

¹⁷Siro Jehoiadae Jihova mu kediu tsiu themiako donu dietseidiekho chülie, uko bu Jihova themia chüketuo la; siro kediu mu themiako donu rei chülie.

¹⁸Siro kijü nu themia peteko Baal kiu nu vo, sidi süu bierhuowa; puo ruosuobako mu puo miarhiko bietshebietshawa, sidi ruosuoba mhodzünu nu Baal zievo-u Matan dukhriwa. Siro zievo-ue Jihova kiu mehoketuo la kepfhemia kedashüwa.

¹⁹Sidi puoe kriemhokezhamia, themia kekhayakezhako mu kepfheko, mu kijü themia pete zelie, sidi ukoe Jihova kiu nunu kediu ze kerlie, sidi puo ze kepfhemia ketha careu ze di kediu kiu nu vorlie. Siro puoe kediko kedibau gei balie.

²⁰Sidi kijüu nu themia pete u nei phi, siro ukoe kediu kiu nu zhiechau pie Athalia dukhrikewa sie nadiu tshüimhiei bata.

²¹Jehoash[14] puo kelhouzha cie thenieketa ki kedi chü sedelie.