Read Angami Naga Kediko Kenieu 12 Bible Online

Kediko Kenieu 12 - Angami Naga bible

Kediko Kenieu 12

¹Jehu dikelie cie thenie cie Jehoash-e kedi chülie; mu puoe cie hiedia Jerusalem nu di. Siro puo zuo zae Zibia, Beershebamia pfü.

²Siro Jehoash-e puo kerheichie Jehoiada zievo-u puo pethakeshü nu lhou di Jihova mhodzü ki puotoukecüu chü di lhou.

³Derei thechü kerükrieko biewa mo, mu themiakoe thechü kerükrieko geinu ruosuo khashü tsiu kethe ruosuo chü tuo zo.

⁴Siro Jehoash sie zievoko ki, “Raka se kemesa vie chü di khakeshü Jihova kinu kevorko mia puopuokecü raka phrükelie peteko, mia puopuokecü raka kha kreipie kezhü, siro raka se Jihova ki nu vortuoü di unou lekelie peteko.

⁵zievoko bu themia khakeshü kehoupuo kinu rei lieliecie, sidi uko bu kiu kehourapuorei suoketa ngukeliera ketsowaliecie” si.

⁶Derei kediu Jehoash dikelie cie mepfüese cie zorei zievokoe kiu suoketako ketsolie mo.

⁷Sitse kediu Jehoash-e Jehoiada zievo-u mu puo zievo kekreiko kielie di sie uko ki, “Nieko kiüdi kiu suoketako ketsolie mo ga? Tsie we themiako ki nu raka lie sa motalie, derei ngukelieko pie kiu suoketa ketsoketuo la khashüwaliecie” sita.

⁸Sidi zievoko themiako kinu raka lie sa lhoü mu kiu suoketa rei ketso lhoü kepfhekhowa.

⁹Derei Jehoiada zievo-u labou puo chülie, sidi puo kege nu puo ki geshülie, di süu pie Jihova kinu keler uza tsatie ruosuoba ki khapie balie, tsiu zievokoe mia raka se Jihova kinu kevor pete pie sünu shüshülie.

¹⁰Sidi ukoe labou nu raka ba seketa ngulie tse, kediue kinu kethu-u mu phichükezhau unie-e Jihova kinu raka ngukelieko phrülie di süu pie likhuo nunu phawaya.

¹¹Sidi ukoe rakako mejükewa sie, pie Jihova kiu nu lietho chü kebako dzie nu shüwa; süsie ukoe Jihova kiu kechü seimistirimia mu mhakechüko zha chüwaya.

¹²Siro Jihova kiu ketsoketuo la mela mu ketsie jopie keba khrütuoü di pie ketsie se mhachüyakezhamia siro ketsie kephromia tsüwata.

¹³Derei raka se Jihova kiu nu kevor nunu, raka hiebou, mitulo kebe ba, tehie, ketsü, suna pie kechü tehiemekhou kehoupuo shierei, morei rakachü pie kechü tehie mekhou chü mo.

¹⁴Kekreilamonyü süko pie liethomia tsüwa di Jihova kiu ketsokewa la.

¹⁵Siro ukoe raka pie liethomia tsünu di khakeshüko ki uko kedipuo mhie di pevowa shikecü pekienukecü cha mo, ukoe dietho di mhachükeshü la.

¹⁶Kejokemou mu kephouma ruosuo la khakeshü rakako se Jihova kinu vor mo. Sükoe zievomia vie.

¹⁷Sitse Siriamia kediu Hazael kho Gath perhie, di süu penyülie. Derei Hazael-e Jerusalem perhietuoü rhülie tse,

¹⁸Juda kediu Jehoash-e puo puotsanuoko Jehoshafat, mu Jehoram mu Ahazia, Juda kediko chü kemesapie keba mhanyako, tsiu puo thuo puo vie chü kemesapie keba nyako, siro Jihova kinu nu ngukelie suna peteko, mu kediu kinu ketuoko chülie, sidi ketsepie Siria kediu Hazael tsüwa. Sitse Hazael Jerusalem nunu tuota.

¹⁹Siro Joash mhatho kekreiko, tsiu puoe chükeshü peteko, süko Juda kediko thedze leshüda nu thupie zhü moü me?

²⁰Siro puo kituoko sielie di thedo pie puo vata, sidi Silla nu keke chau nu keba Millo kiu nunu Joash dukhriwa.

²¹Süu puo kituonie Shimeath nuou Jozakor, mu Shomer nuou Jehozabad, unie-e puo biewa di puo bu siata. Sidi uko David nadi nunu puo pfutsanuoko sa di khruwa; sitse Amazia puo nuou puo sou nu kedi chülie.