Read Angami Naga Kediko Kenieu 13 Bible Online

Kediko Kenieu 13 - Angami Naga bible

Kediko Kenieu 13

¹Ahazia nuou Joash Juda kediu dikelie cie mepfüese cie Jehu nuou Jehoahaz Samaria nu Israel mho dilie, mu cie kerethetha di.

²Siro puoe Jihova mhodzünu mha kesuo shüüko chü, tsiu Nebat nuou Jeroboam Israel bie kephoumakewa kephoumako medzi, sidi puoe süko therhielie mo.

³Tsiu Jihovae Israel gei puo noumeyieta, sidi puoe uko khapie Siria kediu Hazael mu Hazael nuou Ben-hadad dzie nu shü.

⁴Derei Jehoahaz-e Jihova ki chalie, ru Jihova puo pfhe rünyülie, puoe Siria kediu kimhie di Israel pechüpenyü ba shicü mezhieko ngu bakecü la.

⁵Süla Jihovae kelakelie puo pie Israel tsü, sidi ukoe Siriamia dzie nunu talie, tsiu Israelmiakoe thiedzü tuoi uko kiko nu lhou.

⁶Sishierei ukoe Jeroboam kiu, Israel bie kephoumakewa kephoumako therhielie mo, derei süko nu tuo vota, siro Ashera terhuorhi bako Samaria nu ba zo.

⁷Süla puoe Jehoahaz bu puo rüpfhünuo gura themia hiepengou, guragari ker, mu u phi pie ketuo mia nyie ker zie mota, kekreilamonyü Siria kediu süko pekawa, sidi süko kedepie nyophe kemhiewaketa la.

⁸Siro Jehoahaz mhatho kekreiko, tsiu puo chükeshü peteko, tsiu puo kekuo, sükosü Israel kediko thedze leshüda nu thupie zhü moü me?

⁹Sidi Jehoahaz-e puo puonuoko ze zezhüta; tsiu ukoe Samaria nunu puo khruwa, sitse Joash nuou puo sou nu kedi chülie.

¹⁰Joash Juda kediu dikelie cie serethetha cie Jehoahaz nuou Jehoash Samaria nu Israel mho dilie, mu puoe cie keresorou kedi chülie.

¹¹Siro puoe Jihova mhodzü ki mha kesuo shüüko chü; puoe Nebat nuou Jeroboam Israel bie kephoumakewa kephouma therhielie mo, derei puoe sünu tuo zo vota.

¹²Siro Joash mhatho kekreiko, tsiu puoe chükeshü peteko, tsiu puoe Juda kediu Amazia ze kegeikecü puo kekuo, süko Israel thedze leshüda nu thupie zhü moü me?

¹³Sidi Joash-e puo puonuoko ze zezhüta; sitse Jeroboam-e puo kediba gei balie, mu Joash-e Samaria nu Israel kediko sa di puo khruwa.

¹⁴Süki Elishae siataketuo kechüu pfü di suolie tse Israel kediu Joash-e puo ki tsur, sidi puo mhodzünu krata, di sie, “A puo, a puo! Israel guragariko mu gurathemiako sü” sita.

¹⁵Sitse Elishae puo ki, “Theü mu theütsieko kro puo seliecie” si. Sitse puoe theü mu theütsie se puo ki vor.

¹⁶Tsiu puoe sie Israel kediu ki, “Theü galie” si, siru puoe süu galie sitse Elishae puo dzie pie kediu dzie gei shüshü.

¹⁷Süsie puoe sie, “Khirki khrüpie niathutsa shüshülie” sita. Sitse puoe süu khrüshü, Sitse Elishae sie, “Cieshücie” si. Siru puoe cieshü. Sitse puoe sie, “Jihova kuokelie theütsieu, Siria mho kuolieketuo theütsieu! kekreilamonyü noe Afek nu Siriamia peka lotsowa kemochie uko bietuo” si.

¹⁸Mu puoe sie, “Theütsieko chüliecie” si. Sitse puoe süko chülie. Mu puoe sie Israel kediu ki, “Süko pie kijü vashücie” sita. Siru puoe va se vashü, sidi khawa.

¹⁹Sitse Kepenuopfü themiau puo gei puo nei mota, di sie “No va pengou morei va sorou vakeshü mese; sishü tse no Siria peka lotsowa kemochie perhietuo muru, derei tsiewe no va se rübei Siria perhietuo” sita.

²⁰Sidi Elishae siata, sitse ukoe puo khruwa. Siro teicie therie ki Moabmia vor rünau perhierhieya.

²¹Khunhie ukoe themia puo khru baluokecü nu terhü whuoketuomia kro puo ngushü tse ukoe themiau kelhoupie Elisha mekhru nu shüwa; ru themiau tetsu di Elisha ruu nyü shütse, puoe rheilieta, sidi sietha thata.

²²Derei Hazael Siria kediue Jehoahaz kerhei chie Israel pesetuo tso.

²³Derei Jihovae uko ngumezhieshü, mu uko khruohi tsiu uko dze leshü, puoe Abraham, Isak mu Jakob ze dietseidiekhokelieu la, sidi uko pekawa molie, morei puoe tsie rei puo mhodzünu nu uko whuowa mo.

²⁴Siro Siria kediu Hazael-e siaketa sie, puo nuou Ben-hadad-e puo sou nu kedi chülie.

²⁵Süsie Jehoahaz nuou Jehoash-e Hazael nuou Ben-hadad dzie nunu thiedzü süunuo puoe terhü chü di Jehoahaz dzie nunu liekelie rünako lie lalie. Va se Joash-e puo penyüwa, tsiu Israel rünako lie lalieta.