Read Angami Naga Kediko Kenieu 14 Bible Online

Kediko Kenieu 14 - Angami Naga bible

Kediko Kenieu 14

¹Jehoahaz nuou Joash Israel nu dikelie cie kenie cie Juda kediu Amazia, Joash nuou rei Juda mho dilie.

²Puoe kedi chükelie ki puo kelhouzha cie mepfüepengouta, mu Jerusalem nu cie mepfüethepfü di. Siro puo zuo zae Jehoadin, Jerusalemmiapfü.

³Siro Jihova mhodzünu kemezhüu chü, sirei puo puo David we kemhie mo, puoe puo puo Joash kechü pete chü.

⁴Derei thechü kerükrieko chüwa mo, themiakoe thechü kerükrieko gei ruosuo khashü mu thepie ruosuo chüba zo.

⁵Sidi kedibau puo dzie nu balie mumetha puo kituomia puo puo dukhrikewako dukhriwa.

⁶Derei kedukhrimia nuonuoko we dukhriwa mo; Mosa thezho leshüda nu thupie ketuo tuoi, sünu Jihova diekhakeshü hamhie, “U nuonuoko la u puonuo bu sialie lho, morei u puonuo la u nuonuo bu sialie lho; derei themia kehoupuorei u thuo u kephouma la siatuo” si.

⁷Puoe Metsie Kijü thezha nu Edommia mia nyie ker dukhriwa, süu terhü kere se chü di Sela lielie, sidi süu za pie Jokthe-el chükelie thie rei situoya zo.

⁸Sitse Amazia-e dieliemia ketsepie Jehu nuou Jehoahaz nuou Joash Israel kediu ki shü di sie, “Vorlie, avu mhotsou keziengutuo mu” sishü.

⁹Sitse Jehoash Israel kediu mia ketsepie Amazia Juda kediu ki shü di sie, “Kikhahubo puoe Lebanon nu keba sedar seibo-u ki, ‘N nuopfü pie a nuou ki nyicie’ si, derei Lebanon nu khunuo kekhriekezei puoe par di kikhahubo-u menyüwata.

¹⁰Noe Edom penyüwata ketho zo, tsie n noue kemiako bate, n zayieu se n nei di kinu baliecie, noe kiüdi n thuo n kere pfhü, di no mu Juda rei sa tetsutuo ga?” sita.

¹¹Derei Amazia-e rünyü mvüta, süla Israel kediu Jehoash-e kho, sidi puo mu Juda kediu Amazia unie-e Juda nu keba Beth-shemesh nunu huoniehuo petsou di terhüchü.

¹²Ru Israel-e Juda penyüwa; mu mia pete ta u ki nu vota.

¹³Sitse Jehoash Israel kediue Beth-shemesh nunu Ahazia nuou süu Jehoash nuou Amazia Juda kediu telie, sidi puo Jerusalem nu vor di Jerusalem dahou Efraim nunu vo Puoke nu Kharu-u ketso, thu krie dia biemewa.

¹⁴Mu puoe Jihova kinu, mu kediu kiu kinyibou nunu suna, raka, mu mhabou ngukelie pete pielie, siro kedie tekeliemia rei sa, sidi puoe Samaria nu vorta.

¹⁵Jehoash mhatho kekreiko puoe chükeshüko siro puo kekuo, mu puoe kedipuo mhie di Juda kediu Amazia ze kegei shikecüko Israel kediko thedze leshüda nu thupie zhü moü me?

¹⁶Sidi Jehoash-e puo pfutsanuoko ze zhüta, sidi Samaria nu Israel kediko sa di khruwa, sitse Jeroboam puo nuou puo sou nu kedi chülie.

¹⁷Siro Joash nuou Amazia, Juda kediue, Israel kediu Jehoahaz nuou Jehoash se sie cie kerepengou lhou salie.

¹⁸Mu Amazia mhatho kekreiko, sükosü Juda kediko thedze leshüda nu thupie zhü moü me?

¹⁹Siro ukoe kedova di Jerusalem nunu puo ngumvüta, sidi puoe tase Lakish nu vota. Derei ukoe mia ketsepie Lakish nu shü, sidi sünunu puo dukhriwa.

²⁰Siro ukoe gura geinu puo pfü vor, sidi Jerusalem nu David nadi nunu puo puonuoko sa di khruwa.

²¹Judako pete Azaria zelie, puo kelhouzha cie keresorouta, sidi puo chüpie puo bu puo puo Amazia sou nu kedi chülie.

²²Puoe Elath chü lalie, sidi süu khapie, Amazia puo pfutsanuoko ze zhüketa sie Juda tsüwata.

²³Joash nuou Amazia Juda kediu dikelie cie kerepengou cie Joash nuou Jeroboam Israel kediu Samaria nu di sedelie, tsiu puo cie hiediaepuo di.

²⁴Siru puoe Jihova mhodzüki mha kesuo shüüko chü, puoe Nebat nuou Jeroboam Israel bie kephoumakewau kephouma therhielie mo.

²⁵Puoe Israel tierie Lebo-hamath nunu vo Araba Dzükezha ketso, Jihova Israel Kepenuopfü die tuoi, puoe puo kituo Jona, Amitai nuou, siedzekesiu, Gath-hefer nu siedzekesiu ki kepu nunu kevor tuoi süko chü tseilie.

²⁶Jihova Israel kemezhie se baketa ngu, kedie kechümia rei morei kedie chükemomia rei, morei Israel khruohiketuo miapuorei jüketa la.

²⁷Derei Jihova tei khro Israel za chü pejüwatuoü mo zo; süla puoe Joash nuou Jeroboam dzie se uko kelashü.

²⁸Siro Jeroboam mhatho kekreiko tsiu puoe chükeshü peteko, mu puo kekuo, puo kedipuo mhie di terhü chü shikecü, siro kedipuo mhie di Damaska mu Hamath, Juda vie chüketau lie lapie Israel tsüshü shikecü, süko Israel kediko thedze leshüda nu thupie zhü moü me?

²⁹Siro Jeroboam-e puo pfutsanuoko, Israel kediko ze zhüta, sitse puo nuou Zakaria puo sou nu kedi chülie.