Read Angami Naga Kediko Kenieu 15 Bible Online

Kediko Kenieu 15 - Angami Naga bible

Kediko Kenieu 15

¹Israel kediu Jeroboam dikelie cie mepfüethenie cie Amazia nuou Juda kediu Azaria di sedelie.

²Puoe kedi chükelie ki cie keresorouta, mu puoe cie hiepengouekenie Jerusalem nu di. Puo zuo za Jekolia, Jerusalemmiapfü.

³Puoe Jihova mhingu ki kemezhüu chü, puo puo Amazia kemhiei chü phre.

⁴Sirei thechü kerükrieko bie kediwa mo; themiakoe süki rei thechü kerükrieko gei ruosuo chü mu ruosuo khashü tuoya zo.

⁵Tsiu Jihova kediu bieshü, sidi puoe kesia ketso mpa chü, sidi puoe ki kekreira puo nu lhou, siro kediu nuou Jonathan bu kedikiu meho, sidi kijü nu themia kekhakecü chü.

⁶Mu Azaria mhatho kekreiko, tsiu puoe chükeshü peteko sükosü Juda kediko thedze leshüda nu thupie zhü moü me?

⁷Sidi Azaria-e puo pfutsanuoko ze zhüta; sitse ukoe David nadiu nunu puo puonuoko sa di puo khruwa, süsie Jotham puo nuou puo sou nu dilie.

⁸Juda kediu Azaria dikelie cie serethetha cie Jeroboam nuou Zakaria Samaria nu Israel mho khrü sorou di.

⁹Tsiu puoe puo puonuoko tuoi Jihova mhodzüki mha kesuo shüüko chü. Puo Jeroboam Nebat Israel chü kephoumakewau kephouma therhielie mo.

¹⁰Siro Jabesh nuou Shalum sie puo ngumvüta, sidi themiako mhodzü puo vü di puo vükhriwa, sidi puo sou nu kedi chülie.

¹¹Mu Zakaria mhatho kekreiko süko Israel kediko thedze leshüda nu thupie zhüwate.

¹²Hau Jihova Jehu ki phrakeshüu, “N nuonuoko Israel kediba gei nuolhou diau ketso ba votuo” sikecüu tseilie.

¹³Jabesh nuou Shalum-e Uzia Juda kediu Uzia dikelie cie serethepfü cie di sedelie; puoe Samaria nu thekhrü puo kedi chü.

¹⁴Siro Gadi nuou Menahem-e Tirza nunu khor di Samaria nu vor, sidi Samaria nunu Jabesh nuou Shalum vüshü di puo vükhriwa, sidi puo sou nu kedi chülie.

¹⁵Mu Shalum mhatho kekreiko, puoe mia ngumvükecü, sükosü Israel kediko thedze leshüda nu thupiezhüwa.

¹⁶Süteiki puoe Tifsa, mu sünu keba pete siro Tirza nunu vo puo tierie ketso pekawa; kekreilamonyü ukoe süu khrüshü puo tsü mvüketa la puoe süu pekawa. Siro puoe thenumia phoupiemo ketuoko pete va rhielawa.

¹⁷Juda kediu Azaria dikelie cie serethepfü cie, Gadi nuou Menahem-e Israel mho kedi chü sedelie, puoe teicie ker Samaria nu di.

¹⁸Puoe Jihova mhodzü ki mha kesuo shüüko chü; puoe puo kerhei chie Nebat nuou Jeroboam Israel chü kephoumakewa kephoumako therhielie mo.

¹⁹Asiria kediu Pul-e vor kijüu perhie; sitse Menahem-e raka talent nyie puo pie Pul tsü, puo bu puo kedibau chü kemeteiketuo la.

²⁰Menahem-e Israel ki raka khruo, süu mhakenyimia pete kinu ta zo, mia puopuokecü bu raka shekel hiepengoungou pie Asiria kediu tsütuoü di khruo. Süla Asiria kediue kijüu nu ba sa mo di lata.

²¹Mu Menahem mhatho kekreiko, tsiu puoe chükeshü peteko, süko Israel kediko thedze leshüda nu thupie zhü moü me?

²²Tsiu Menahem-e puo pfutsanuoko ze zhüta, sitse puo nuou Pekahia-e puo sou nu kedi chülie.

²³Juda kediu Azaria dikelie cie hiepengou cie Menahem nuou Pekahia-e Samaria nu Israel mho di sedelie di cie kenie di.

²⁴Puoe Jihova mhodzü ki suoücüko pete chü; puoe Jeroboam Nebat nuou, Israel chü kephoumakewa kephoumako therhielie mo.

²⁵Derei Remalia nuou Peka, puo khrokezha puo sier puo ngumvüta, sidi Samaria nu, kediu kiu nunu Argob mu Arieh, mu Gilidmia mia hiepengou se puo salie di puo ze kegei, sidi puo dukhriwa, di puo sou nu kedi chülie.

²⁶Mu Pekahia mhatho kekreiko, tsiu puoe chükeshü peteko, süko Israel kediko thedze leshüda nu thupiezhüwate.

²⁷Juda kediu Azaria dikelie cie hiepengouekenie cie Remalia nuou Peka-e Samaria nu Israel mho di, mu teicie mepfü di.

²⁸Sitse puoe Jihova mhodzü ki suoücüko chü; puoe Nebat nuou Jeroboam Israel chü kephoumakewa kephoumako therhielie mo.

²⁹Israel kediu Peka teiki Asiria kediu Tiglath-pileser vor di Ijon mu Abel-beth-maka, Janoa, Kedesh, Hazor, Gilid mu Galil, Naftali kijü pete lielie, sidi themiako tepie Asiriamia diechü vota.

³⁰Süsie Ela nuou Hoshea sie di Remalia nuou Peka ngumvüta, sidi puo dukhriwa, sidi puo sou nu kedi chülie, süusü Uzia nuou Jotham teicie mepfüketa ki chü.

³¹Mu Peka mhatho kekreiko, tsiu puoe chükeshü peteko, süko Israel kediko thedze leshüda nu thupie zhüwate.

³²Remalia nuou Peka Israel kediu dikelie cie kenie cie Uzia nuou Jotham Juda kediu di sedelie.

³³Puoe di sedekelie ki puo kelhouzha cie mepfüepengou ta mu puoe Jerusalem nu cie keresorou di. Tsiu puo zuo zae Jerusha, Zadok nuopfü.

³⁴Puo Jihova mhodzü ki kemezhüu chü, puo puo Uzia mhie di.

³⁵Sishierei thechü kerükrieko biekediwa mo; themiako tsie rei thechü kerükrieko geinu ruosuo chü tsiu mhare kethengu the tuoya zo. Puoe Jihova kiu nu care peso-u chüshü.

³⁶Mu Jotham mhatho kekreiko tsiu puoe chükeshü peteko, süko Juda kediko thedze leshüda nu thupie zhü moü me?

³⁷Süteiki Jihovae Siria kediu Rezin mu Remalia nuou Peka ketseshü di Juda perhie.

³⁸Tsiu Jotham puo pfutsanuoko ze zhüta, sidi puo puo David rüna nunu puo khruwa; tsiu puo nuou Ahaz puo sou nu kedi chülie.