Read Angami Naga Kediko Kenieu 16 Bible Online

Kediko Kenieu 16 - Angami Naga bible

Kediko Kenieu 16

¹Remalia nuou Peka dikelie cie kerethenie cie Jotham nuou Ahaz-e Juda mho dilie.

²Ahaz-e di sedekelie ki puo kelhouzha cie mepfüta, sidi Jerusalem nu cie keresorou di, mu Jihova puo Kepenuopfü mhodzünu puo puo David tuoi kemezhüu chü mo.

³Derei puo Israel kediko zho nu lhou Jihova Israel mhodzünu nu whuokewa pele kemo seyieko chüyakezha mhiei puo nuou rei thepie ruosuo chü.

⁴Siro puoe thechü kerükrieko gei, kijüthouko gei, tsiu seibo kepejo pete khro nu ruosuo tsiu mhare kethengu the.

⁵Sitse Siria kediu Rezin mu Remalia nuou Peka Israel kediu unie vor Ahaz ze terhü chü di Jerusalem re, derei puo penyülie kenjüta.

⁶Süki Siria kediu Rezin[15] Elath lie lalie, sidi Elath nunu Judako whuowa; sidi Siriamia bu Elath nu vorta, mu thie ketso rei uko sünu lhou tuote.

⁷Ahaz-e dieliemia ketsepie Tiglath-pileser Asiria kediu ki shü di, “Ae n kituou mu n nuou zo, khorliecie, sidi Siria kediu mu Israel kediu dzie nunu a kelashücie, unie-e a perhie bate” si.

⁸Siro Ahaz-e Jihova kiu nu mu kediu kinyibou nunu rakachü mu suna ngukelieko chülie, sidi süko methuo ketsepie Asiria kediu tsüshü.

⁹Siru Asiria kediue puo pfhe rünyülie; sidi Asiria kediu khor di Damaska re di süu lielie, tsiu themia sünu kebako teze kediechü Kir nu vota, mu puoe Rezin dukhriwa.

¹⁰Siro Ahaz kediu Tiglath-pileser-e Asiria kediu ze kesetuoü Damaska nu vo tse puoe Damaska nu ruosuoba kebau ngushü. Sitse Ahaz kediue mia ketsepie Uria zievo-u ki shü di, ruosuoba dze, puo rhi kedipuo mhie shikecü, kedipuo mhie di chü shikecü dzeko pesi phreshü.

¹¹Sitse Uria zievo-ue Ahaz kediu Damaska nunu ketsekeshü mhiecü ruosuoba puo chülie, Uria zievo-ue süu mhie tou di chülie, süu Ahaz kediu Damaska nunu kevor mhodzü chüwa.

¹²Siro kediu Damaska nunu vor tse, kediu ruosuobau ngulie, sitse kediu ruosuobau penuo phir di sügei pfülie.

¹³Sidi puo kethe ruosuo mu lhacülhale ruosuo-u khashü, siro puo kekrie ruosuou rushü, tsiu kezekevi ruosuo thezieu kegepie ruosuoba gei shü.

¹⁴Siro puoe merenyi ruosuobau Jihova mhodzü ki kebau kiu mhodzütsa nu se vor lie, puo ruosuobau mu Jihova kiu unie donu kebau, sidi süu khapie puo ruosuoba pesotsa shüpie bawa.

¹⁵Sitse kediu Ahaz-e Uria zievo-u ki, “Ruosuoba kezhau gei khise ruosuo-u, mu thevatie ruosuou, mu kediu ruosuou, mu lhacülhale ruosuou mu kijü nu themiako kethe ruosuou sa, uko lhacülhale ruosuo mu uko kekrie ruosuo khashülie; süsie süu geinu kethe ruosuo zieu pete mu ruosuo zie pete kegepie vashülie; derei merenyi piekechü ruosuobau we Ukepenuopfü ki ketsoketuo la a la khapie batuo” sita.

¹⁶Uria zievo-u Ahaz kediu diekhakeshü mhie pete chülie.

¹⁷Siro Ahaz kediu ruosuo kechü rako durhuo phrewa. Süko nunu dzieteikhouko chüwa; sidi sükhro merenyi thudoko keba dzübou-u se kerwa mu süu pie ketsie pfhepie keba gei shüwa.

¹⁸Tsiu sabat zha nhie la careu kediu kinu, mu kediu bu keler cha chüpie kebau, puoe Asiria kediu prei di Jihova kinu kebau biekediwa.

¹⁹Süsie Ahaz mhatho kekreiko puoe chükeshüko, sükosü Juda kediko thedze leshüda nu thupie zhü moü me?

²⁰Tsiu Ahaz-e puo pfutsanuoko ze zhüta. Sidi puo puo David nadiu nunu puo pfutsanuoko sa di khruwa; tsiu puo nuou Hezekia puo sou nu kedi chülie.