Read Angami Naga Kediko Kenieu 17 Bible Online

Kediko Kenieu 17 - Angami Naga bible

Kediko Kenieu 17

¹Juda kediu Ahaz dikelie cie kerekenie cie Ela nuou Hoshea-e Samaria nu Israel mho dilie di cie mepfü kedi chü.

²Puoe Jihova mhodzü ki mha kesuo shüüko chü, sirei puo mhodzü ketuo Israel kediko mhie zota mo.

³Asiria kediu Shalmaneser-e vor di puo perhie; sitse Hoshea puo khro leta, sidi khezhanuo pie puo tsüta.

⁴Derei Asiria kediu Hoshea kelhiekecü ngulie, puoe dieliemia ketsepie Ijipt kedi-u So ki shü sidi khezhanuo pie Asiria kediu tsü moketa la, puoe teicie kepra chüyakezhau chülie mota; süla Asiria kediue puo khapie kedieki nu bawa.

⁵Sitse Asiria kediue kijüko pete penyü vo di Samaria nu vorlie, puoe teicie se süu recü la.

⁶Hoshea dikelie cie thepfü cie Asiria kediue Samaria lielie; sidi puoe Israelko teze Asiria nu vota, sidi uko khapie Gozan rüu Habor khie Hala nu mu Medes nadiko nu shüwa.

⁷Mha hau chüketa Israelmiakoe Jihova uko Kepenuopfü, Ijipt kijü nu Ijipt kediu Faro dzie nunu uko ze parkeshüu gei phouma tuotakecü la. Ukoe terhuo kekreiko rüsuota,

⁸mu Jihovae uko mhodzünu nu whuokewa pele kemo seyieko zho ze, tsiu Israel kediko thuo chükeshü zhoko zeketa la.

⁹Siro Israelmiakoe pekhre di Jihova uko Kepenuopfü mhodzünu puotou kemoko chü tuota. Siro ukoe thechü pete nu, rükhouba nunu vo nadi dahou ketso thechü kerükrie ruosuoba chülieta;

¹⁰mu ukoe kijükhru kerükrie kheko nu, siro seibo kepejo kheko khro nu ketsie mu nanyü sei[16] selie;

¹¹mu thechü kerükrie kheko nu, Jihova uko mhodzünu nu whuokewa pele kemo seyieko tuoi ukoe ruosuo chü, uko mha kesuo chü di Jihova nou chü kemeyiewa;

¹²ukoe terhuorhiko rüsuota, süu dze Jihova uko ki, “Nieko mha hako chü suo” ishü zo.

¹³Sirei Jihovae siedzekesiko mu kepethako geinu Israel tsiu Juda petha di sie, “Nieko mha kesuo nunu rüreilie di a diekhakeshüko mu a zhoko a khapie nieko ki keshü thezho-u tuoi, tsiu a kituo siedzekesimia geinu khakeshü tuoi chüüzeliecie” ishü.

¹⁴Ukoe uko puonuoko tuoi, Jihova uko Kepenuopfü pele moketa tuoi rünyü mvü di uko nou rete.

¹⁵Sidi ukoe puo zhoko, puoe u puonuoko ze dietseidiekhokelieu, mu uko ruo di pethakeshü rütsete. Ukoe ketho kemo terhuorhiko medzi di kekrüte; ukoe uko khieümhou keba seyieko, Jihova uko bu süko mhiekecü chü hienukecüko medzi tuote.

¹⁶Uko Jihova uko Kepenuopfü diekhakeshüko pete kha kegewa di u thuo u la mha lhopie mithunuo kenie rhilie, tsiu terhuomiarhi sei se puo chülie, sidi teigei ketuo krodiko pete rüsuo, mu Baal lie chü.

¹⁷Ukoe u nuonuo thepfuko mu thenumia khapie mi nu the; siro ukoe mha kethemou vie mu thuophi vie se; sidi uko thuo uko pie Jihova mhodzünu mha kesuo chü, sidi puo nou chü kemeyie.

¹⁸Süla Jihovae Israel gei puo nei mota di puo mhodzünu nu uko chü kelhouwa; seyie kekrei sa mota di Juda yiemia rübei keba zota.

¹⁹Juda rei Jihova uko Kepenuopfü diekhakeshüko chüüzelie mota, derei Israel thuo chükelie zhoko nu lhou tuota.

²⁰Siro Jihovae Israel seyie pete meliewa, sidi uko pechü, mu uko khapie mha pekayakezhako dzie nu shüwa, puoe puo mhodzünu uko peka lotsowa kemochie siwa.

²¹Puoe David kiu nunu Israel cierha kreiwa tse, ukoe Nebat nuou Jeroboam bu kedi chülie, Jeroboam-e Israel Jihova siemedzi ketuo nunu whuowa, sidi uko bu phouma da mota.

²²Israelmiakoe Jeroboam kechü pete chü di kephouma nu lhou, uko süko therhielie mo;

²³Jihovae puo mhingu nu Israel chü kediwata kemochie, puoe puo kituoko siedzekesi peteko geinu pukeshüu chüshü. Süla Israel-e puo thuo puo kijü nunu teze Asiria nu voketa thie ketso rei situo zo.

²⁴Siro Asiria kediu Babilon, Kutha, Ava, Hamath mu Sefarvaim nunu themia ze vor di, khapie Samaria nadiko nu Israelmiako sounu shüwa; sidi ukoe Samaria lielie, di nadiko nu lhou bata.

²⁵Siro ukoe sünu lhou therieki, ukoe Jihova rüsuo mo, süla Jihovae losha ketsepie uko donu shü, sidi uko huomia tewa.

²⁶Sitse ukoe sie Asiria kediu ki, “Noe seyie chüse vo Samaria nadiko nu shükewa kijüu rhuo zho-u si molie, süla puoe losha ketsepie uko donu shü, sidi uko tewate; kekreilamonyü ukoe kijüu rhuo zho si mokecü la” si.

²⁷Sitse Asiria kediu diekhashü di, “Nieko sünunu ze kevor zievoko mia puo ze Samaria nu vorliecie, sidi puo bu sünu lhoulie, sidi puo bu themiako ki kijüu rhuo zho-u pethashülie” sishü.

²⁸Sitse zievoko Samaria nunu kevor mia puo bu vor Bethel nu lhou balie, sidi kedipuo mhie di uko bu Jihova rüsuolie morosuo shicüko pethashü.

²⁹Derei seyie pete rei u thuo u medo nunu terhuo rhilie, sidi süko khapie Samariamia chükeshü thechü kerükrie kiko nu shülie, seyie pete rei ue lhou keba nadiko nu sükemhie chülie;

³⁰siru Babilonmiakoe Sukot-benoth chüshü, Kuthmiakoe Nergal chüshü, mu Hamathmiakoe Ashima chüshü;

³¹Avitmiakoe Nibhaz mu Tartak chüshü, mu Sefarvitmiakoe uko nuonuo thepie Adramelek mu Anamelek, Sefarviam rhuoko tsü.

³²Ukoe Jihova rei rüsuo, sidi uko donu themia miahoumia kedapie uko bu thechü kerükrieko gei zievochü, sükoe uko la thechü kerükrieko gei kiko nunu uko la ruosuo chü.

³³Sidi ukoe Jihova rüsuo derei u thuo u rhuoko lie rei chü, uko thuo u seyie nu vorkecü zhoko mhie di.

³⁴Thie ha ketso rei ukoe thiedzü chü vorkecü zhoko ze tuoya zo. Ukoe Jihova rüsuo mo mu puo zhoko medzi mo, mu Jihovae Jakob za thopie Israel chükeshüu nuonuoko ki diekhakeshüko chüüzelie mo.

³⁵Jihova süko ze dietseidiekholie mu uko ki diekhakeshü, “Nieko terhuo kekrei rüsuo hie morei nie süko mhodzü nuketsu hie morei süko lie chü morei ruosuo chüpie süko tsü hie,

³⁶derei nie Jihova, Ijipt kijü nunu kuo se mu puo bou yhapie nieko ze parkeshüu, rüsuolie mu nieko puo rüsuolie, mu nie ruosuo chüpie puo tsülie.

³⁷Siro chünukeshüko mu thezhoko mu diekhakeshüko, puoe nieko la thukeshüko, nieko menuo di chü sei tuolie, mu nieko terhuo kekrei rüsuo hie;

³⁸tsiu a nieko ze dietseidiekhokelieu nieko rükra mota hie, nieko terhuo kekrei rüsuo hie,

³⁹derei nieko Jihova nie Kepenuopfü rüsuolie; siro puoe nie ngumvümia pete dzie nunu nieko kelashütuo” si.

⁴⁰Derei ukoe rünyülie mo; di uko thuo thiedzü zho tuoi chüta.

⁴¹Siro seyie hako Jihova rüsuo derei uko terhuomiarhi rhikelieko rei lie chü, uko nuonuoko, tsiu u tsunuoko rei uko krünuoko tuoi thie ketso rei situoya zo.