Read Angami Naga Kediko Kenieu 18 Bible Online

Kediko Kenieu 18 - Angami Naga bible

Kediko Kenieu 18

¹Ela nuou Hoshea Israel kediu dikelie cie se cie, Ahaz nuou Hezekia Juda kediu di sedelie.

²Puoe di sedekelie ki cie mepfüepengouta; mu cie mepfüethepfü Jerusalem mho di. Puo zuo za Abi, Zekaria nuopfü.

³Siro puoe Jihova mhodzü ki, puo puo David kechü tuoi, kemezhüu chü.

⁴Puoe thechü kerükrieko chü kelhouwa, mu nanyü tsieko bietshebietshawa, siro nanyü seiko[17] rhuowa, puoe Mosa chükeshü merenyi pie kechü tinyhüu bietshebietsha phaphawa, süteiki ketso rei Israel nuonuokoe ruosuo chüpie süu tsüyacü la; mu süu pie Nehushtan üdi kie.

⁵Puoe Jihova Israel Kepenuopfü pele, süla puo sietsa morei puo mhodzütsa Juda kediko pete donu miapuorei puo kemhie jü.

⁶Kekreilamonyü puoe Jihova penuotei tuo; tsiu puo siemedzi di puo therhieta mo; siro Jihova Mosa geinu puo diekhakeshüko chüüzelie.

⁷Siro Jihovae puo zetuo; sidi puo kehourapuo vo shierei puo bu vikehielie. Puoe sie Asiria kediu perhie di puo lie chü molie.

⁸Puoe Filistinmia bie zo vo Gaza mu puo tierie ketsowa, rükhouba nunu vo dahou houpie keba nadiu ketso.

⁹Kediu Hezekia dikelie cie dia cie, süu Ela nuou Hoshea Israel kediu dikelie cie thenie cie, Shalmaneser Asiria kediu vor Samaria re,

¹⁰sidi cie se tseiketa ki ukoe süu lielieta. Hezekia dikelie cie sorou cie, süu Israel kediu Hoshea dikelie teicie thepfü cie, Samaria lielieta.

¹¹Sitse Asiria kediu Israelko teze Asiria nu vota, sidi süko khapie Gozan nu kezhü Hala rü khie Habor nu, mu Medes nadiko nu shüwa;

¹²kekreilamonyü ukoe Jihova uko Kepenuopfü die ze mo, mu puo ze dietseidiekhokelieko, siro Jihova kituou Mosa diekhakeshüko varhuo siro süko rünyü mo mu chüüzelie mo.

¹³Kediu Hezekia dikelie cie keredia cie Asiria kediu Senacherib vor Juda dahou houpie keba nadiko pete perhie di süko lielie.

¹⁴Siro Juda kediu Hezekia mia ketsepie Lakish nu Asiria kediu ki shü di sie, “A kekrüwate; a ki nu tuotaliecie; no mhakehoupuorei pie a gei shü rei a toupfülietuo” sita. Sitse Asiria kediue rakachü talent krie se mu suna talent ser Juda kediu Hezekia ki chata.

¹⁵Siro Hezekia-e Jihova kinu, mu kediu kinyibou nunu ngukelie pete pie puo tsüwa.

¹⁶Süteiki Hezekia Jihova rüsuokiu nu kikhako nu, mu kikha coko gei suna se kenhepie kebako Juda kediu Hezekia-e bielie di pie Asiria kediu tsüwa.

¹⁷Asiria kediu Lakish nunu Tartan mu Rabsari-u mu Rabashake-u ze chüpahi kekra salie di ketsepie Jerusalem nu Hezekia kediu ki shü. Ukoe sünunu kho, mu Jerusalem nu kho tsolie. Ukoe khotsolie tse vo pesotsa rüzieu dzüyie cha ki, süusü Pfhekemenyiu Lieu chaü ki thalie.

¹⁸Sidi uko kediu kieshü tse, Hilkia nuou Eliakim kediu kinu mhokezhau, siro Shebna kethu-u, mu Asaf nuou Joah mhadze thuse tuoyakezhau tuo par.

¹⁹Sitse Rabshake-u sie uko ki, “Hezekia ki pushücie: Asiria nu kedi kezhau hakemhie puya: No kedipuo pele di thepfu ba ga?

²⁰N kele ki die-e terhü nu thedo mu kekuoü ba me? No supuo pele di a petsou ba ga?

²¹Noe Ijipt pele batuo, derei puoe tekhrie tsaketapfü puo zo, kehoupuorei puo gei vakhriekezhamia dzie ze phawatuo. Kehoupuorei Ijipt kediu merü kebamia hai zotuo.

²²Derei mhanuü nieko sie a ki, ‘Hiekoe Jihova hieko Kepenuopfü peleya’ iliro, Hezekia thuo thechü kerükrieko, mu puo ruosuobako biewata mo me? Tsiu Juda mu Jerusalem ki, ‘Nieko Jerusalem nu ruosuoba hau mhodzünu nu rüsuotuo’ si mo me?

²³Süla tsie vorlie, sidi a niepuu Asiria kediu ki die phrashülie, silie liro a gura nyie kenie khashütuowe, noe süko kese themia khashülie vi üro.

²⁴Noe Ijipt guragari mu gurathemia pele di, kedipuo mhie di a niepuu kituoko donu kriemhokezha kecütho-u rei whuolietuo mu?

²⁵Sümhorei, a Jihova sa mo di thechü hau pekawatuoü vor üba me? Jihova a ki, Kijü hau whuo volie di süu pekawaliecie” si.

²⁶Sitse Hilkia nuou Eliakim, mu Shebna, mu Joah sie Rabshake-u ki, “N kituoko ki Aramaik die nunu pushüthie; süu hiekoe silieya; mu dahou nu keba themia nyieto ki nu Judamia die nu hie ki puta hiecie” sita.

²⁷Derei Rabshake sie uko ki, “A niepuu a bu n niepuu mu n ki rübei die hako punu di ketseshü üba me? Mu dahou nu kebako bu nieko ze di u thuo u buoüzou cüükrietuoü di ketse uko ki shü moü me?” sita.

²⁸Sitse Rabshake-e siethalie di Judamia die nunu shiekhoui di, “Kedi kezha, Asiriamia kedi pfhe rünyüliecie!

²⁹Kediu hakemhie puya: ‘Hezekia bu nie sewa hiecie, puoe a dzie nunu nieko kelalie lho zo.

³⁰Hezekia bu, Jihova u kelashü tou zotuo, sidi nadiu khapie Asiria kediu dzienu shüwalie lho zo’ ikecü pu di nieko bu Jihova peletakecü chü hiecie.

³¹Hezekia pfhe rünyü hie, kekreilamonyü Asiria kediu hakemhiekecü puya: ‘A ze kezevilie sidi parliecie; sitse nie kehoupuorei nie thuo nie khube si cü mu nie chiede si cü, mu nie thuo nie dzükhou nunu krietuo.

³²Ae vor di nieko ze vo nieko kijü kemhiekecü puo, telha mu khubedzü kijü, telha mu khubelie kijü, Oliv tier mu mepfhidzü kijü nu, nieko bu rhei mu siata moketuo puo nu shüshü kemochie. Nieko Hezekia nieko chatha kekrü di pukeshü, Jihova u kelashütuo ikecü pfhe rünyü hiecie.

³³Seyie kehoupuo rhuo rei Asiria kediu dzie nunu u kelashü me?

³⁴Hamath mu Arpad rhuoko kirapuo tuote ga? Serfarvaim, Hena, mu Iva rhuoko kirapuo tuote ga? Süko a dzie nunu Samaria kelashüü ba me?

³⁵Rünako nu, terhuoko donu a dzie nunu u rüna kelashükecü suomia ga? Jihovae a dzie nunu Jerusalem kelashütieya me?’ ”

³⁶Derei themiakoe kemekrie zeita sidi die yopuorei se puo die kela mo, kekreilamonyü kediue diekhakeshüu, “Puo die kela hiecie” sikecü la.

³⁷Sitse Hilkia nuou Eliakim kediu kinu mha kemeho-u mu Shebna kethu-u, mu Joah Asaf nuou mhadze thuse tuoyakezhau, Hezekia ki vor di u pfhe cierha di puo ki Rabshake-u dieko pushü.