Read Angami Naga Kediko Kenieu 19 Bible Online

Kediko Kenieu 19 - Angami Naga bible

Kediko Kenieu 19

¹Siro kediu Hezekia-e süu si tse puoe puo pfhe cierhata, tsiu gakhropfhe pie puo whelie, sidi Jihova kinu vo.

²Siro puoe Eliakim, kediki mhokezhau mu Shebna kethu-u, mu zievoko donu pehüko bu gakhropfhe dzielie di ketsepie Amoz nuou Isaya siedzekesiu ki shü.

³Siru ukoe sie puo ki, “Hezekia hakemhie puya: Teisozha hauha kemezhiekecü, mia kerhiekecü mu thenga teisozha puote; nhicumia penuokeshü teite, sirei uko penuoshüketuo kekuo tuo mote.

⁴Jihova n Kepenuopfü, Rabshake-u, Asiria kediu, puo niepuue a ketseshü di rheituoyakezha Ukepenuopfü pesekecü dieko rünyülie di batatuo, sidi Jihova n Kepenuopfüe sikelie dieko kerhie lashülie vikecü la; süla lhiepie kebako la kecha chüshücie” sita.

⁵Siro kediu Hezekia kituoko Isaya ki vor.

⁶Sitse Isaya sie uko ki, “N niepuu ki, Jihova hamhiekecü puya: Asiria kediu kituoko a thakecü dieko sikecü la, michieta hie.

⁷A ruopfü puo pie puo gei shüshütuo, sitse puoe diekrie puo silietuo, sidi puo ra la votatuo, sidi ae puo bu puo ra nu zhiecha geinu tetsutatuo ho” sita.

⁸Siro Rabshake-u la vor tse, Asiria kediue Libna ze terhü chü keba ngulie; kekreilamonyü kediu Lakish khawa di tuoketa sikelie la.

⁹Mu kediue Ethiopia[18] kediu Tirhaka dze silie tse sie “Harie, puoe n ze terhü chütuoü di vorte ho” ikeshü si tse, puoe dieliemia ketsepie Hezekia ki shü la di sie,

¹⁰“Hakemhie di se Juda kediu Hezekia ki pushücie: N Kepenuopfü, no puo peleyakezhau bu n sewa di Jerusalem khapie Asiria kediu dzie nu shüwalie lhowe.

¹¹Harie, niekoe Asiria kedikoe kijü pete gei kedipuo chüshü shikecü, peka lotsowaya zokecü sishüte. Mu siliro nieko kelashütuo me?

¹²Seyieko rhuokoe uko kelashü me? A mhodzü pekakewa seyieko sü Gozan, Haran, Rezef mu Eden themia Telasar nu kebako.

¹³Hamath kediu, Arpad kediu, Sefarvaim rüna kediu, Hena kediu morei Iva kediu kirapuo tuote ga?” sita.

¹⁴Hezekia-e dielieko dzie nunu leshüu ngulie di süu phrüshü; sitse Hezekia Jihova kiu nu kho di süu kelhapie Jihova mhodzünu shü.

¹⁵Siro Hezekia Jihova mhodzünu kechachü di, “He-i Jihova Israel Kepenuopfü, cherubnie mhogei di kebau noe Ukepenuopfü, n rübei zo, kijü nu kedirüvie pete mho kebau, noe tei mu kijü chüshü.

¹⁶He-i Jihova, n nyie kedeipie rünyüshücie, he-i Jihova, mhirhoshü di mehoshücie; sidi Senacherib-e rheituoyakezha Ukepenuopfü krenyü di ketsekeshü dieko rünyüshücie.

¹⁷Ketho zo, Jihova, Asiria kedikoe seyieko mu uko kijüko pekawata ketho zo,

¹⁸mu uko rhuoko kelhoupie mi nu shüwate, sükoe terhuo ketho mo zo, u dzie mhatho zo, sei mu ketsie zo, mu süla süko kata zo.

¹⁹Süla tsie he-i Jihova hie Kepenuopfü, a n ki chaya, kediba pete bu rei noe Ukepenuopfü Jihova zo, n rübei zo ükecü silieketuo la, puo dzie nunu hieko kelashücie.”

²⁰Sitse Amoz nuou Isaya mia ketsepie Hezekia ki shü di, “Jihova, Israel Kepenuopfü hakemhiekecü puya: Ae no a ki Asiria kediu Senacherib dze pu chakeshü sishüte.

²¹Puo dze Jihovae hamhiekecü puya: ‘Hapfü n rütsete, hapfü n krete, Zion nuo phousepfü; hapfü puo tsü tsügete, n sietsa nu, Jerusalem nuopfü.

²²‘No supuo krenyü mu thaya ga? No supuo petsoukecü die puya, mu supuo gei meyiemehüya ga? Israel Kemesau ngumvü bate!

²³N dielieko geinu noe Jihova krenyü bate, sidi no pucü, “A guragari kekra selie di, a kijüthou mezü gei ketso, tsiu Lebanon ketsekethou ketso khowate; ae sedar kerükrieko tsiu saipresbo kevithoko wiwatuo, ae süu thelatho, mu süu kitsa kesoutho nunu letuo.

²⁴A dzükhouko thie, mu seyie kekreimia dzüu kriewate, a phizhü üse Ijipt nu kerüko pete pra pesowate.”

²⁵‘A thiedzütho nu le medo tuoketa no si mo me? Thiedzütho nu rhüse ketuou tsie chükelieute, n bu dahou houpie keba nadiko pie phera chüwaketuo la,

²⁶uko lhou kebako, u kekuo bie petsawatuo, thenousuo mu theziekejü chütatuo; ukoe lie nu nha tuoi, tsiu nha kemene kepejo tuoi, ki mhogei nha tuoi, lhou toulie mo di rüwitatuo.

²⁷“ ‘Derei a no siethakelie mu bakelie, n kepra mu keler, siro a gei n noupfhünouyie si ba zo.

²⁸Kekreilamonyü no sier a kechükede mu no mha keboukecü a nyie nu vorte, süla a cawi pie n nyhüca nu goushütuo; mu a n teshü kereilieketuo nya pie n me nu shü di, n bu no cha kiu ze vor shi süra ze votatuo.

²⁹“ ‘Siro hau bu n la zasi puo tuo, nie bu ciethie puo thuo parkelieu cütuo, siro süsie cie rei sükemhie lhou kepar-u cütuo; derei cie seu nu we nieko tsia prushülie di relie, tsiu khubeko pelhoushülie, sidi süu si cüliecie.

³⁰Mu Juda kiu nu lhieshü di rheikelieko umie kre pesoulietuo, mu pesotsa u si vülietuo.

³¹Kekreilamonyü Jerusalem nunu uko lhieshütuo, mu sükoe Zion nunu tapralietuo, Krodiko Jihova puo rhie kechüu thuo hau chüshütuo.

³²“ ‘Süla Jihovae Asiria kediu dze hamhiekecü puya: Puoe nadiu nu lerlie lho, sünu theütsie yopuo zokecü rei cieshülie lho, pezhü pfü di süu mhodzü rei vorlie lho morei süu whuoketuo la u keyaba rei chülie lho zo.

³³Puoe cha kiu ze vor shi, süu ze di latatuo; puoe nadi nu vorlie lho, Jihovae sidi puya.

³⁴Kekreilamonyü ae a za lanu, mu a kituou David la nu, nadi hau yalietuo’ ” sita.

³⁵Süzhü Jihova dielieu vor di Asiriamia razhüchü nu keba donu mia nyie krie puo di hiethethaepengou dukhriwata; sidi teisolie tse, sükosü pete kesiamo phreta.

³⁶Süsie Asiria kediu Senacherib-e tuo kinu vota di vo Ninevi nu lhou bata.

³⁷Mu puoe puo rhuou Nisrok rüsuoki nu puo rüsuo keba ki, puo nuonie Adramelek mu Sharezer zhiecha pie puo dukhriwa; sidi unie ta Ararat kijü nu vota. Sitse Esar-hadon puo nuou puo sou nu kedi chülie.