Read Angami Naga Kediko Kenieu 2 Bible Online

Kediko Kenieu 2 - Angami Naga bible

Kediko Kenieu 2

¹Jihova teikhrie khriedi nunu Elija ze teigei khotaketuo tei vorketa ki, Elija mu Elisha unie-e Gilgal cha nu vorzhü.

²Sitse Elija-e sie Elisha ki, “A n ki chaya, no haki pfhe baliecie; kekreilamonyü Jihovae a ketsepie Bethel nu shütelie” si. Derei Elishae sie puo ki, “Jihova rhei ketuo mhiei, siro no rei rhei ketuo mhiei a n khawalie lho” silie. Süla unie keze Bethel nu ke.

³Sitse Bethel nu keba siedzekesimiako[2] Elisha ki vor di sie puo ki, “Thie Jihova n ki nu n niepuu zetatuo ükecü no si ba mo?” si. Sitse puoe sie, “A süu si ba; nieko kemekrietacie” sita.

⁴Elija sie puo ki, “Elisha, a n ki chaya, no hakiha nu pfhe baliecie; kekreilamonyü Jihova a ketsepie Jeriko nu shütelie” si. Derei puoe sie, “Jihova rheiketuo tuoi, siro no rei rhei ketuo tuoi a n khawa lho” silie. Süla unie Jeriko nu ke.

⁵Sitse Jeriko nu keba siedzekesikoe Elisha ki vor di sie puo ki, “Thie Jihova n ki nu n niepuu zetatuo ükecü no si ba mo?” si. Sitse puoe sie, “U, a si ba, nieko kemekrie bataliecie” sishü.

⁶Sitse Elija sie puo ki, “A n ki chayalie, haki nu pfhe baliecie; kekreilamonyü Jihova a ketsepie Jordan nu shütelie” si. Sitse puoe sie, “Jihova rhei ketuo mhiei, siro no rei rhei ketuo mhiei, a n khawa lho zo” silie. Süla unie kenienie keze vo.

⁷Tsiu siedzekesimia mia hiepengou[3] rei vo, sidi kepetse nunu mehotuoü tha, tsiu unie Jordan khie tha.

⁸Sitse Elija-e puo pfhe rhuopie kezilie di süu se dzü vüshü, sidi unie kijü keso nu parlie kemochie, dzüko kezapie lutsahatsa shüwa.

⁹Siro unie lutsakhie pfülie tse, Elija sie Elisha ki, “N kinu a zeketa mhodzü, a bu kedipuo chüshü n tsünu shiü chaliecie” si. Sitse Elisha sie, “A n ki chaya, n kekuo de kenie bu a gei balieyi” ishü.

¹⁰Siru puoe sie, “No mha kere puo chate, sishierei, n ki nu a zeketa ki a ngu ro, süu pie n tsütuo, derei no a ngu mota tse, silie motatuo” sishü.

¹¹Sidi unie kerüchü di tuo vokezhü ki, harie, miü guragari puo mu miü gura puo par di unie pfükhowa, sitse Elija-e khriewhi puo nunu teigei khota.

¹²Elishae süu mehoho di kra di sie, “A puo, a puo! Israel guragari mu gura themiako!” ita. Mu puoe puo ngu sa mota; sitse puoe puo puo pfhe lhelie di cierha kenie chüwa.

¹³Siro puoe Elija geinu rülheketa pfheu chüpielie, sidi la vo Jordan rü khie thalie.

¹⁴Sidi puoe Elija geinu rülheketa pfheu pie dzü vüshü di sie, “Jihova, Elija Ukepenuopfü kirapuo tuo ga?” si. Süsie puoe dzü vüshü tse, khopie lutsahatsa vawata; sidi Elisha tuo philie.

¹⁵Mu siedzekesimiako[4] Jeriko nunu meho kethako puo ngu tse, ukoe sie, “Elija kekuo Elisha gei bate” sita. Sidi ukoe puo ze kesetuoü vor, sidi puo mhodzü zeretsu kijü zhüta.

¹⁶Sitse ukoe sie puo ki, “Harie, tsie, n kituomia ze keba khriesa kevi mia hiepengou ba, hieko chaya, uko bu vo n kepethau pfhücie, Jihova Ruopfüue puo toupie sie di puo petepie kijüthou huo gei, morei razha huo nu shüwa rei silie lho mu” sita. Sitse puoe sie, “Nieko uko ketseshü hie” siwa.

¹⁷Derei ukoe puo mengata kemochie pu zo bata, süla puoe sie, “Ketseshücie” sita. Süla ukoe mia hiepengou ketseshü, sidi ukoe zha se puo pfhü derei puo ngulie mota.

¹⁸Süsie uko puo ki la vor, kekreilamonyü puo tsie rei Jeriko nu ba zo, puoe sie uko üse, “A nieko bu vo hie, idi pushü moü me?” sita.

¹⁹Siro nadiu themiakoe sie Elisha ki, “Harie, a niepuu rei ngu keba tuoi, nadiu thechü kevi puo nu ba, derei dzüue suo, siro kijü kro molie” si.

²⁰Ru puoe sie, “Lepou kesa puo se a ki vorlie, sidi metsie pie sünu shülie” sishü. Süla ukoe süu se vor puo tsüshü.

²¹Sitse puoe dzüluoki nu vo, sidi metsie kelhoupie sünu shüshü, sidi sie, “Jihova hakemhie puya, ae dzü hako chü kemesawate ho; hasietsa hanunu kesia morei kijü kro moketa parlie lho” sishü.

²²Sidi Elisha kepu mhie dzü chükemesakelie thie ketso rei situoya zo.

²³Puoe sünunu Bethel nu kho, sidi puoe cha nu khozhü ru nadiu nunu nhicumia kro puo par, sidi puo kre di sie, “Tsüpieu; tuotacie! Tsüpieu, tuotacie” ita.

²⁴Sitse puoe rürei vor, sidi süko mehoshü di uko rüsewa, sitse ketsa nunu thega krü kenie par, sidi thepfunuoko mia hiediaekenie ciechücierhawa.

²⁵Tsiu puoe sünu nu tuo Karmel kijüthou gei khota, sidi sünu nu puoe la Samaria nu vorlie.