Read Angami Naga Kediko Kenieu 20 Bible Online

Kediko Kenieu 20 - Angami Naga bible

Kediko Kenieu 20

¹Sükisü Hezekia-e mhachülie di siatatuoü bata. Sitse Amoz nuou Isaya siedzekesiu puo ki vor di puo ki, “Jihova hakemhie puya; N kiu kese menuopie bawalie no siatatuocü la; no shürho lalie kenjüte” sita.

²Sitse Hezekia puo zie kerei pie sozhatsa shülie di Jihova ki cha di sie,

³“He-i Jihova, a n ki chaya, a kimhie di a nou ketho se n mhodzünu tuo shicü, mu n mhingu ki mezhüükecüu chü shicü tsie rükrashüyi” sita. Sidi Hezekia kra phita.

⁴Sitse Isayae kiluo nunu praketa mhodzü, Jihova die puo ki vor di sie,

⁵“Rürei la vo di Hezekia a themiako mhokezhau ki pushücie, Jihova, n puo David Kepenuopfüe hakemhiecü puya: A n kecha rünyüliete, n mhidzü ngushüte; a n chü keshürho toushütuo; zha se nhie noe Jihova kinu khotatuo.

⁶Siro a n kelhouzha cie kerepengou sa pekrashütuo; ae Asiria kediu dzie nunu no mu nadi hau kelashütuo; ae a thuo a la nu mu a kituou David la nadi hau yalietuo” sita.

⁷Sitse Isayae sie, “Chiedesi phro puo se vorliecie, uko bu süu chülie di se vo tichüpfüu kenheshülie, sitse puo shürholietuo” sishü.

⁸Sitse Hezekia-e sie Isaya ki, “Jihova a chü keshürhoshüketuo mu a zha se nhie Jihova kinu khotatuoükecü zasi kikecüpuo chüshü ta?” sita.

⁹Sitse Isaya sie, “Jihova ki nu kevor zasiu hau, Jihovae phrakeshüu chüshütuo: mhakhrüu bu tsie phicha ker pedzü vo tuote; süu bu phicha ker pesiela votuo me?” sita.

¹⁰Sitse Hezekia-e sie, “Mhakhrüu bu phicha ker pedzü vokelie-e kethekhrü mo, mhakhrüu bu phicha ker pesie voshücie” sita.

¹¹Sitse Isaya siedzekesiu Jihova ki chashü, siru puoe niaki kele kemejü rieu nunu mhakhrüu phicha ker pesie se la vorshü.

¹²Süki Merodak-baladan, Baladan nuou, Babilon kediu, leshü tsiu mha methuo ketsepie Hezekia tsü, kekreilamonyü puoe Hezekia mhachükecü dze sishü.

¹³Hezekia-e puo nei di uko zelie, puoe puo kinyi kiu nu mhanya puoma kere pete, rakachü, suna, mhare kethengu, tier puoma kere, puo rünyieko, mu puo mha kengupie keba kiu nu mha ngukelie pete pie uko pekieshü, Hezekia-e puo kinu morei puo kediba nu mhapuorei pie uko pekie kemo jü zo.

¹⁴Sitse Isaya siedzekesiu kediu Hezekia ki vor di puo ki, “Themia hako kedipuo puya ga? Uko kirapuo nu n ki vor ga?” sita. Sitse Hezekia sie, “Ukoe kepetsera nu, Babilon nunu vor” si.

¹⁵Puo sie, “Uko n kinu kedipuopuo nguwa ga?” si. Sitse Hezekia sie, “Ukoe a kinu mha keba pete nguwate, a kinyi puorei uko pekie kemo ba mote” sita.

¹⁶Sitse Isaya sie Hezekia ki, “Jihova die rünyüliecie;

¹⁷puotei vorzhie, n kinu keba pete, tsiu n puonuoko vor di thie ha ketso kengupie ketuoko toupfü Babilon nu votatuo; mha yopuorei peshashülie lho sidi Jihova puya.

¹⁸Tsiu n geinu penuoshüketuo n nuonuoko tezetatuo, ukoe Babilon kediu kinu dzücümia chü di lhoutuo” sita.

¹⁹Sitse Hezekia sie Isaya ki, “No Jihova die pukeshü viwe,” sita. Kekreilamonyü puoe lecü, “Mhanuü a teiki noune mu khrukhrekecü bakelie ha vi moü me?” sita.

²⁰Siro Hezekia mhatho kekreiko, mu puo kekuo pete, tsiu puoe kedipuo mhie di rüzie chü shikecü, tsiu dzüyie dou di dzü se nadi nu vor shikecü, süko Juda kediko thedze leshüda nu thupie zhü moü me?

²¹Siro Hezekia-e puo pfutsanuoko ze zhüta; sidi Manasseh puo nuou puo sou nu kedi chülie.