Read Angami Naga Kediko Kenieu 21 Bible Online

Kediko Kenieu 21 - Angami Naga bible

Kediko Kenieu 21

¹Manasseh-e di sedekelie ki puo kelhouzha cie kerekenie ta, mu puoe Jerusalem nu cie hiepengouepengou di. Puo zuo zae Hefziba.

²Puoe Jihova mhodzüki mha kesuo shüüko chü, pele kemo seyieko Jihovae Israelmiako mhodzünu nu whuokewako kemhiekecü chü.

³Kekreilamonyü puoe, puo puo Hezekia thechü kerükrie biepesuokewako chü lalie; tsiu Baal la ruosuobako chülie, siro nanyü seiko[19] chülie, Israel kediu Ahab tuoikecü chü di, sidi teigei ketuo pete rüsuo mu süko lie chü.

⁴Puoe Jihova kinu ruosuoba chülie, süu dze Jihovae pukecü, “A a za pie Jerusalem nu shütuo” si.

⁵Tsiu puoe Jihova kinu teigei krodi la ruosuoba chü.

⁶Siro puoe puo nuou pie mi nu the, tsiu puoe siedze pukecü mu thuophiko se mu siamiakemeikecüko siro themou rüsa, siro puo Jihova mhodzü ki kesuo shüüko chü di puo nou chü kemeyie.

⁷Siro puo terhuorhiba puo nu terhuorhi chükelieko dou shülie, süu dze Jihovae David ki, mu puo nuou Solomon ki, “Ki hau nu, mu Jerusalem, Israel seyieko donunu a kedakelieu, ae kechachie a za khapie batuo,

⁸a khapie uko puonuoko ketsü kijü nunu Israel chü kediwalie lho, mhanuü ae diekhakeshüko mu a kituou Mosae khakeshü thezho-u chüüzelie liro” sita.

⁹Derei ukoe rünyülie mota; mu Manasseh-e uko chatha kekrüpie Jihova Israel mhodzü pekakewa seyieko ki rei mha kesuo chü sakuote.

¹⁰Sitse Jihovae puo kituo siedzekesiko geinu pu di sie,

¹¹“Manasseh Juda kediu mha kerütsekecü hako chükecü, tsiu puo mhodzü ketuo Ammonmia pete ki rei mha kesuo chükuokecü la, siro puo terhuorhi pie Juda chü kephoumawakecü la;

¹²Jihova, Israel Kepenuopfü hakemhie puya: Ae themia kehoupuorei süu sikecü ki unyieto kemesochü zoketuo mha kesuo sikecü pie Jerusalem mu Juda gei se vorzhie ho.

¹³Sidi ae süu keyiepie Jerusalem mho Samaria kemejüu chau, tsiu Ahab kikru gei shütuo, mia puoe mekhou süwayakezha tuoi, a Jerusalem chüwatuo, süu chüwa, tsiu süu phou pekhegewatuo.

¹⁴Siro ae a kayie lhiepie kebau khawatatuo, sidi süko pie uko ngumvümia dzie nu shüwatuo; sidi ukoe uko ngumvümia chüte mu mha pekakewa vie chütatuo.

¹⁵Kekreilamonyü ukoe a mhingu ki mha kesuo shüüko chü tuote, sidi a nou chü kemeyie, uko puonuoko Ijipt nunu parkelie yawinu vor thie ketso si tuota zo.”

¹⁶Sizomoü Manasseh-e kemezhümia zie pekruthorwate, Jerusalem tietsatie puo nu vo kekreitsa tsota kemochie siwate, puoe Juda chü kephoumakewa sierei, Jihova mhodzü mha kesuo shüüko chü.

¹⁷Mu Manasseh mhatho kekreiko, tsiu puoe chükeshü peteko, siro puo phoumawaketa kephouma, süko Juda kediko thedze leshüda nu thupie zhü moü me?

¹⁸Sidi Manasseh puo pfutsanuoko ze zhüta, sidi puo thuo puo zie, Uza zie nunu puo khruwa. Sitse puo nuo Amon puo sou nu kedichülie.

¹⁹Amon-e di sedekelie ki puo kelhouzha cie mepfüekenie ta, mu puoe Jerusalem nu teicie kenie di. Siro puo zuo zae Meshulemet, Jotbamia Haruz nuopfü.

²⁰Tsiu puoe Jihova mhodzü ki mha kesuo shüüko puo puo Manasseh tuoi chü.

²¹Siro puoe puo puo kevo cha pete nu vo, puo puo terhuorhi lie kechüko lie chü mu süko rüsuo zo.

²²Puoe puo puonuoko Kepenuopfü khawa, tsiu Jihova cha nu tuolie mota.

²³Siro Amon kituoko sie puo perhieta, sidi kediu kiu nunu puo dukhriwa.

²⁴Derei kijüu nu themiako Amon kediu ngumvükecü pete dukhriwa. Sidi kijüu nu themiakoe puo nuou Josia chüpie puo sou nu kedi chülie.

²⁵Mu Amon mhatho kekreiko puoe chükeshüko, sükosü Juda kediko thedze leshüda nu thupie zhü moü me?

²⁶Mu Uza tezieu nu puo mekhru nunu puo khruwa: Sitse Josia puo nuou puo sou nu kedi chülie.