Read Angami Naga Kediko Kenieu 22 Bible Online

Kediko Kenieu 22 - Angami Naga bible

Kediko Kenieu 22

¹Josia-e dikelie ki puo kelhouzha cie thethata, mu puoe cie serepuo Jerusalem nu di. Puo zuo zae Jedida, Boskatmia Adaia nuopfü.

²Tsiu puoe Jihova mhodzü ki mha kemezhüu chü, mu puo puo David kevo cha pete nu tuo, sidi rürei thezatsa morei thevitsa vata mo.

³Josia dikelie cie kerethetha cie, Azalia nuou kediu Shafan, Meshulam nuou, kethu-u, ketsepie Jihova kinu shü di sie,

⁴“Hilkia phichükezhau ki khocie, sidi puo bu Jihova kinu se kevor rakako, kikha kepfhekoe themiako kinu kenguse keba phrü kenguliecie.

⁵Sidi süko khapie mhakechüko, Jihova ki mehoyakezhako dzie nu shücie, Jihova kiu nu mhachüyakezhako, kiu kemiekezhako tsüshülie.

⁶Kiu ketsoketuo, sei mu ketsie jokelie khrüketuo la pie seimistiriko, ki kechümiako, mu ketsie kechüko tsüwacie.

⁷Derei raka kedithede puo khapie uko dzie nu shüwa shiü uko ketso la hie, kekreilamonyü ukoe u mhatho nu diethoya” sishü.

⁸Sitse Hilkia phichükezhaue sie kethu-u Shafan ki, “A Jihova kiu nu thezho leshüdau nguliete” si. Sitse Hilkia-e leshüdau pie Shafan tsüshü ru, puoe süu phrüshü.

⁹Süsie kethu-u Shafan kediu ki vor thedzeu pu di, “N kituoko kinu raka nguliete, sidi süu khapie mhachüyakezhako, Jihova kiu mehoyakezhako dzie nu shü phrewate ho” sishü.

¹⁰Siro kethu-u Shafan kediu pekie di sie, “Hilkia phichükezhau leshüda puo pie a tsüshülie” si. Sidi Shafan-e kediu mhodzünu süu phrüshü.

¹¹Siro kediue thezho leshüdau nu dieko sishü tse, puoe puo pfheko cierhata.

¹²Süsie kediue die khapie zievo-u Hilkia, Shafan nuou Ahikam, Mikaia nuou Akbor mu kethu-u Shafan, tsiu Asaia kediu kituou tsü di sie,

¹³“Volie, di a la mu themiako la, mu Juda pete la, leshüda ngukelie hau nu dieko dze Jihova ki ketsocie, kekreilamonyü Jihovae u gei puo nei mo phi bate, kekreilamonyü u puonuokoe leshüda hau nu dieko, u bu chünu di thupie ketuoko chüüze tuo mote” sita.

¹⁴Süla Hilkia zievo-u, Ahikam, Akbor, Shafan, mu Asaia tuose Hulda siedzekesipfü, Tikva nuou Shalum kimiapfü, Harhas nuou, rüsuoki pfhenei mehoyakezhapfü ki vo; hateiki süpfüe Jerusalem nu kibou kenieu nu baya, sidi uko süpfü ze kerüchü.

¹⁵Sitse hapfüe sie uko ki, “Jihova, Israel Kepenuopfü hamhiekecü puya; nieko ketsepie a ki keshüu ki pushücie,

¹⁶Jihova hamhiekecü puya, a mha kesuo pie thechü hau nu, mu sünu keba themiako gei, Juda kediu phrükelie die pete se vorshütuo.

¹⁷Kekreilamonyü uko a khawate, sidi mhare kethengu the pie terhuo kekrei tsü, sidi uko dzie mhatho pete se a nou chü kemeyie, süla a noupfhünouyie pie thechü hau gei shütuo, mu süu chü pejüwalie kenjütatuo.

¹⁸Derei Juda kediu, Jihova ki ketsonu di nieko ketsekeshüu ki we haikecü se pushücie, Jihova, Israel Kepenuopfü hakemhiekecü puya: No sikelie dieko la we,

¹⁹a thechü hau, mu sünu themiako theziekejü chüketuo tsiu rüse pfütatuo ükecü dze nie sikelie ki, n nousuolie, mu noe Jihova mhodzünu n thuo n chü kerünuolie, sidi n pfhe cierhata, tsiu a mhodzü kralie, süla a rei n pfhe silietewe, idi Jihova puya.

²⁰Süla a n ze vo n puonuoko ki shüwatuo, sidi noe thenou mene di n mekhru nu tsutatuo tsiu ae mha kesuo pete se kijü hau gei vorshüketuo noe ngulie lho” sishü. Siru ukoe die se la kediu ki vor.