Read Angami Naga Kediko Kenieu 23 Bible Online

Kediko Kenieu 23 - Angami Naga bible

Kediko Kenieu 23

¹Siro kediue mia ketsepie Juda mu Jerusalem pehüko kie kengupie puo ki shülie.

²Sitse kediue Jihova ki nu kho, mu Juda themia pete mu Jerusalem nu lhou keba pete, zievoko mu siedzekesiko, siro themia kecü kezha pete puo ze kho; sidi puoe Jihova kiu nunu ngukelie dietseidiekhokelie leshüdau nu dieko pete phrüpie uko nyie nu shü.

³Siru kediue tsiepou puo khieki thalie, sidi u melou pete se mu u kerheiro pete se leshüda hau nu ngukelieko chüüzelieketuo la, Jihova siemedzituoü mu puo die khakeshüko, puo zhapuko, siro chü nukeshüko chüüzelietuoü themia pete Jihova mhodzünu dietseidiekholie.

⁴Sitse kediue die khapie Hilkia phichükezhau, mu zievo-u, siro kikha kepfheu tsü di, Jihova rüsuokiu nunu Baal la siro Ashera la, siro teigei ketuo krodi pete la chükelie tehie mekhou pete se chazou parta nushü, sidi puoe süko Jerusalem khie Kidron lie nunu thewa, tsiu süko migeko toupfü Bethel nu vota.

⁵Siro puoe terhuo kerüsuo zievoko Juda rünako nu mu Jerusalem khieümhou thechüko nu, thechü kerükrieko nu Juda kedikoe ruosuo chütuoü di kedakelieko ruosuo chüpie Baal, mu niaki mu khrü themvüko mu teigei krodiko pete tsüyakezha pete kha phrewa.

⁶Siro puoe Jihova kiu nunu Ashera-u se Jerusalem khie, Kidron rücüu nu vorlie, sidi süu Kidron rücüu ki nu thewa, sidi süu bietshephaphawa, tsiu puo nyophe süko kelhoupie themiako mekhru nu shüwa.

⁷Puoe rüsuokinu thepfumia thuo thepfumia ze mha kesuo kechü kiko, Jihova kinu kebako, sünu thenumia bu Ashera pfhe doyakezha bierhuowata.

⁸Tsiu puoe Juda rünako nunu zievoko pete ze vorlie, sidi zievoko ruosuo chüyakecü thechü kerükrieko, Geba nunu vo Beersheba ketso pekawa, tsiu nadiu nu Joshua care ki, nadiu nu care u vitsa keba careko nu thechü kerükrieko bierhuowa.

⁹Sirei thechü kerükrieko nu zievoko Jerusalem nu ruosuobau nu khor mota, derei ukoe u siezedzürie donunu khreiüshü kemo niekhrüda cü.

¹⁰Siro puoe Tofet, süu Ben-hinom razhau nu miapuorei bu puo nuo thepfumia morei thenumia thepie Molek rüsuo motuoü pekawa.

¹¹Puoe Juda kedikoe Jihova kinu kele ki, iunok Nathan-melek kebau ki, süu rünau khie bakecüu ki nu gura niaki rüsuokecüko biewa, sidi niaki guragari-u mi pie thewata.

¹²Tsiu Ahaz ki peso gei keba ruosuobako, Juda kediko thuo chükelieko, siro Manasseh-e Jihova kitiezha nie nu ruosuoba chükelieko, kediue bierhuowa mu süko biephrowa, sidi puoe nyophe süko kelhoupie Kidron rücü nu shüwata.

¹³Siro Jerusalem mhodzü keba thechü kerükrieko, biepesuokewa kijüthou-u zatsatie kebako, Solomon kediu Sidonmia kerütsekecüu Ashtoret la, mu Moabmia kerütsekecüu Khemosh la, mu Ammonmia kerütsekecüu Milkom la, chükeshü kediue pekawa.

¹⁴Sidi puoe terhuorhiko biephro phaphawa, siro nanyü seiko[20], sidi thechü süko nu themia ru thuo tshuta.

¹⁵Sütsü gei rei Bethel nu ruosuobau, Nebat nuou Jeroboam chükeshü thechü kerükrieu Israel bie kephoumakeshüu, puoe ruosuobau mu thechü kerükrieu kenienie rei bierhuowa. Puoe thechü kerükrieu thewa, sidi pie nyophe chüwata, tsiu terhuorhibau thewata.

¹⁶Sidi Josia-e rüreishü tse, puoe kijüthou gei kezhü mekhruko ngulie, sitse puoe mia ketseshü, sidi mekhru nunu theruko chülie, sidi süko pie ruosuoba geinu thewa, sidi süu perhuwata, süu Jihova die Kepenuopfü themiau pukeshü tuoi, die hako pukeshü chü tseiwa.

¹⁷Sitse puoe sie, “A ngu ketha tsiese luu kedipuo ga?” sita. Sitse nadi nu themiakoe sie puo ki, “Süusü Kepenuopfü themiau, Juda nunu vorkecüu no Bethel ruosuobau petsou di chükewako pukeshüu mekhrulie” si.

¹⁸Siru puoe sie, “Puo bu rüleilie; miapuorei bu puo ru bie hiecie” sita. Süla ukoe puo ruko bu sizhüta, Samaria nu kevor siedzekesiu ru sa zhüta.

¹⁹Süsie rei Josia-e Samaria rünako nu thechü kerükrieko kiko, Israel kediko chüpie Jihova nou chü kemeyiekecüko chüseta, sidi puoe Bethel nunu chükeshü mhie süko gei chüwa.

²⁰Mu puoe ruosuobako gei thechü kerükrieko nu zievoko pete dukhriwa, sidi themia ru pie uko geinu theshü, sidi la Jerusalem nu vota.

²¹Sitse kediu themia peteko ki die khashü di sie, “Dietseidiekhokelie leshüdau nu thupie kezhü mhiei di nieko Jihova nie Kepenuopfü ze ciekevo nyiliecie” sishü.

²²Israel capimiako capi kechü teiki morei Israel kediko teiki nu vor tsie ketso sükemhie ciekevo nyishü mo zoluo.

²³Derei Josia dikelie cie kerethetha cie Jerusalem nunu ciekevo nyilie.

²⁴Sizomoü terhuo zeyakezhako, themoumiako, miarhiko, mu terafim[21], siro Juda mu Jerusalem nu mha kerütsekecü ngukelie khe, Josia-e chü kelhouwa, süusü Hilkia-e Jihova kiu nunu ngukelie thezho leshüu dieko chüüzelietuoükecü la zo.

²⁵Puo mhodzü kedi puorei puo nou pete se, mu puo kerheiro pete se mu puo kekuo pete se, Mosa thezho khakeshüu chü tseituoü Jihova tsükeshü puo kemhie tuo mo; tsiu puo sietsa rei puo kemhiekecü sielie mo.

²⁶Sirei Jihovae puo nou meyie pie kemerie chüketa nunu rüdi lalie mota, süusü puoe Juda gei puo nou meyieta, kekreilamonyü Manasseh-e puo nou chükemeyiekeshü la.

²⁷Süla Jihova sie, “Ae Israel chükewa tuoi a mhingu kinu Juda hauha, siro kiu dze a kepu-u, a zae sünu batuoükecüu khawatatuo” sita.

²⁸Siro Josia mhatho kekreiko, tsiu puoe chükeshü peteko, süko Juda kediko thedze leshüda nu thupie zhü moü me?

²⁹Puo teiki Faro Neko Ijipt kediue Asiria kediu ki kho di Eufrat rüu nu vo, siru Josia kediue vo puo ze kese, derei Faro Nekoe Megido nunu puo ngulie tse, puoe puo dukhriwa.

³⁰Sitse puo kituokoe guragari geinu puo mo-u pfülie, di puo pfü Jerusalem nu vor, sidi puo thuo puo mekhru nunu puo khruwa. Sitse kijüu nu themiakoe Jehoahaz, Josia nuou zelie, di tier pie puo kenheshü, sidi puo bu puo sou nu kedi chülie.

³¹Jehoahaz-e kedi chü sedekelie ki puo kelhouzha cie mepfüese ta; mu puoe Jerusalem nu khrü se kedi chü, siro puo zuo zae Hamutal, Libnamia Jeremia nuopfü.

³²Tsiu puoe Jihova mhodzüki puo puonuoko tuoi, mha kesuo shüüko chü.

³³Faro Nekoe puo pha pie puo bu Hamath kijü nu Ribla nu bata, süusü puo bu Jerusalem nu kedichülie lhoü; sidi rünau kemvüchü di khezhanuo rakachü krie puo, mu suna talent puo khruo.

³⁴Tsiu Faro Nekoe Eliakim Josia nuou chüpie puo bu puo puo Josia sou nu kedi chü, siro puo za thopie Jehoiakim chüwa, sidi Jehoahaz ze tuota, siru puoe Ijipt nu vor, sidi sünunu siata.

³⁵Jehoiakim-e rakachü mu suna pie Faro tsü, derei puoe Faro die khakeshü mhiei raka khashütuoü di kijüu bu khezhanuo khruo; puoe mia puopuokecü puo khezhanuou ze di, pie Faro Neko tsütuoü di kijü ki nu rakachü mu suna lielie.

³⁶Jehoiakim di sedekelie ki puo kelhouzha cie mepfüepengou ta, tsiu puoe Jerusalem nu cie kerepuokrü di. Siro puo zuo za Zebida, Rumamia Pedaia nuopfü.

³⁷Tsiu puoe Jihova mhodzü puo pfutsanuoko pete kechü tuoi mha kesuo shüüko chü.