Read Angami Naga Kediko Kenieu 24 Bible Online

Kediko Kenieu 24 - Angami Naga bible

Kediko Kenieu 24

¹Puo teiki Nebukadnezar, Babilon kediu vor; mu Jehoiakim-e cie se puo kituo chü; süsie puoe la vorlie. Sidi sie puo perhieta.

²Tsiu Jihovae Chaldianmia rüpfhünuo, Siriamia rüpfhünuo, Moabmia rüpfhünuo mu Ammonmia rüpfhünuo ketsepie puo perhie, siro süko ketsepie Juda perhie, puo pekawatuoü di, süusü Jihova die, puo kituo siedzekesiko geinu pukeshü tuoi di chüshü.

³Manasseh kephouma la, puo chükewa pete la, Jihova die geinu, puo mhingu ki nu uko chü kelhouwatuoü mha hau Juda ki vor tou zo.

⁴Puoe kejo kejümia zie kepekru la; puoe kejo kejü zie pie Jerusalem ketshu chükewa la, Jihovae vashüketuo puo medo mota.

⁵Mu Jehoiakim mhatho kekreiko, tsiu puoe chükeshü peteko, süko Juda kediko thedze leshüda nu thupie zhü moü me?

⁶Sidi Jehoiakim puo pfutsanuoko ze zhüta; süsie Jehoiakim puo nuou puo sounu kedi chülie.

⁷Ijipt kediu mhakipuorei puo kijü nunu la vor mota, kekreilamonyü Babilon kediue Ijipt kerüu nunu vo Eufrat rüu ketso Ijipt kediu vie kheko lielieketa la.

⁸Jehoiakin-e di sedekelie ki puo kelhouzha cie kerethetha ta, tsiu puo Jerusalem nu khrü se di. Siro puo zuo zae Nehushta, Jerusalemmia Elnathan nuopfü.

⁹Puoe puo puo kechü tuoi Jihova mhodzünu mha kesuo shüüko chü.

¹⁰Süteiki Nebukadnezar kediu kituoko khor di Jerusalem perhie, sidi nadiu whuowata.

¹¹Siro Nebukadnezar Babilon kediue puo kituoko nadiu whuo keba ki puoe nadiu nu vor.

¹²Sitse Jehoiakin, Juda kediue puo mu puo zuo, puo kituoko, puo kezhako mu puo kedikiu nu kezhako khapie Babilon kediu tsüwa. Babilon kediue puo kedi chükelie cie thetha cie puo bu kedie chüta.

¹³Sitse puoe Jihova kinu kinyi pete, siro kediu kinu kinyi pete toupfüta, mu puo Israel kediu Solomon-e Jihova rüsuo kinu chükeshü suna tehie mekhou pete dathe phaphawa, Jihova pukeshü tuoikecü chüwa.

¹⁴Sidi puoe Jerusalem pete, kezhamia pete, kethepfumia pete, kediemia nyie ker, siro mhachükesimia mu rükreimia pete tezeta, kijüu nu mhakejüthomiako zo kemosie, miapuorei ba mota.

¹⁵Tsiu Jehoiakin ze Babilon nu vota, tsiu kediu nuo zuo, mu kediu kimianuoko, puo kezhako, mu kijüu nu themia kevimiako puoe Jerusalem nunu süko teze Babilon nu vota.

¹⁶Siro themia kekuomia nyie thenie, mhachükesimia mu rükreimia mia nyie puo, themia kuo ükecü khe mu terhü chülie kevi khe, süko Babilon kediue teze kedie chü Babilon nu vota.

¹⁷Babilon kediue puo siezeu Matania chüpie puo bu puo sou nu kedi chülie, siro puo zatho kedipie Zedekia chüwa.

¹⁸Zedekia-e di sedekelie ki puo kelhouzha cie mepfüepuo ta, tsiu puoe cie kerepuo Jerusalem nu di. Puo zuo zae Hamutal, Libnamia Jeremia nuopfü.

¹⁹Puoe Jehoiakim kechü kemhie, Jihova mhodzü ki mha kesuo shüüko chü.

²⁰Süla Jihova noupfhüu Jerusalem nu mu Juda nu vor di puo mhodzünu nu uko whuo phrewata. Siro Zedekia-e sie Babilon perhieta.