Read Angami Naga Kediko Kenieu 25 Bible Online

Kediko Kenieu 25 - Angami Naga bible

Kediko Kenieu 25

¹Siro puoe kedi chükelie cie thepfü cie, khrü ker-u nu zha ker nhie, Nebukadnezar Babilon kediue puo rüpfhünuo pete ze vor Jerusalem perhie di süu khieümhou pfhe bata; tsiu ukoe süu khieümhoura dahou chülieta.

²Sidi nadiu whuo zo ba kediu Zedekia dikechü cie kerepuokrüu tso.

³Siro khrü diau nu zha thepfü nhie nadiu nu pekrie re se vorta, süla kijüu nu themiako kecüca puorei jüta.

⁴Sidi nadiu pfüphawata, siru terhü themia pete teizei ze kediu zie khieki, kuda kenie donu kharu puo ze di tata, Chaldianmia thuo nadiu houpfü ba zo shierei, ukoe Araba tsatie nu vota.

⁵Derei Chaldianmia chüpahikoe kediu whuo vo, sidi Jeriko razha nunu puo tsolie; tsiu puo chüpahi pete puo khawa di ta cüreta.

⁶Sidi ukoe kediu telie di puo ze Ribla nu Babilon kediu ki vorshü; sidi ukoe puo dienya kecü.

⁷Siru ukoe Zedekia mhingu nunu puo nuonuoko dukhriwa, siro Zedekia mhi kerülawa sidi thegi dziekha pie puo phalie di puo ze Babilon nu vota.

⁸Siro khrü pengou nu, zha thenie nhie, Nebukadnezar Babilon kediu dikelie cie kerethepfü cie, kepfhe kezhau, Babilon kediu kituomia puoe Jerusalem nu vor.

⁹Sidi puoe Jihova kiu, kediu kiu mu Jerusalem ki pete thewa, tsiu themia kezhako pete ki mi pie thewa.

¹⁰Tsiu Chaldianmia chüpahi, kezha ze keba pete, Jerusalem khieümhoura dahouko biemewata.

¹¹Süteiki kepfhe kezhau Nebuzaradan-e nadiu nu keba themiako siro Babilonmia dzie nu kediechü leketako, themia kro-u donu lhiepie kebako zeta.

¹²Derei kepfhe kezhaue themia mhakejümiako bu khubebo keleimia tsiu lieciemia chütuoü di khapie bawa.

¹³Siro Jihova kinu keba merenyi pie kechü coko, mu puo phiko, tsiu merenyi pie kechü dzükezhau, Chaldianmiae bietshebietsha phaphawa, sidi merenyi kebako toupfü Babilon nu vota.

¹⁴Siro galiko, mekhouko mu mitulo kebeko mu kecieko, siro merenyi vienya se mha chüyakezha pete seta,

¹⁵tsiu shüthuoli, seikhou mu sükemhie suna pie kechü, suna keba mu rakachü pie kechü, rakachü keba, kepfhe kezhaue seta.

¹⁶Co kenienie rei, dzükezhau, tsiu Solomon-e Jihova kiu la chükeshü coko, mhanya hako merenyi pie kechü puo mesi mejü tsokelie pfü mo.

¹⁷Co puo puo rükrie thu kerethethatha, siro co süu gei keba merenyi se chü; tsiu puo rükrie thu se, siro co khieümhoura houpfü keba dorüko, mu turaü kerhiko, pete merenyi se chü.

¹⁸Siro kepfhe kezhaue, zievo kezhau Seraia, mu süsieso zievo Zefania, siro kikha kepfhe seko zeta,

¹⁹tsiu nadiu nunu puoe terhü mho kezhau, siro kediu mhodzünu bayakezha mia pengou nadi nunu ngukelieko, rüpfhünuoko mho kezhau donu kethu-u nadi nu mia kie kengushüyakezhau, tsiu nadiu nu ngukelie mia hiesorou zeta.

²⁰Nebuzaradan kepfhe kezhau hako zeta, sidi ze vor Ribla nu Babilon kediu ki shüwa.

²¹Ru Babilon kediue Hamath kijü nu Ribla nunu uko vü di uko pesiawa. Sükemhie di Judae puo kijü nunu teze mia die chü vota.

²²Siro puoe Gedalia Ahikam nuou Shafan bu Juda nu peshakeshü themiako, Nebukadnezar Babilon kediu khakewako mho ahgn-u chü.

²³Sidi chüpahi mhokezhako pete, uko mu uko themiakoe, Babilon kediue Gedalia bu kezha chüketa silie tse, Nethania nuou Ishmael, mu Karia nuou Johanan, mu Seraia Tanhumeth nuou Netofatmia, mu Jazania Makhath nuou, uko mu uko themiako, Mizpa nu Gedalia ki vor.

²⁴Gedalia-e uko mu uko themiako ki rüse di sie, “Chaldianmia kezhamiako prei hiecie, kijüu nu lhou balie, Babilon kediu liechülie, silie liro nie la vituo” sita.

²⁵Derei khrü thenieu nu, Ishmael Nethania nuou Elishama nuou, kediu seyieu, mia se puo ze vor, sidi Gedalia biewa, sidi puo siata, siro Judamia mu Chaldianmia puo ze ketuoko Mizpa nu ba.

²⁶Sitse themia pete, kecü rei kezha rei[22], mu chüpahi mhokezhako sielie di Ijipt nu vor; ukoe Chaldianmia prei batakecü la.

²⁷Juda kediu Jehoiakin mia diekechü cie serethenie cie, khrü kerekenieu khrü, zha mepfüethenie nhie, Babilon kediu Evil-merodak di sedekelie cie, kedieki nunu Juda kediu Jehoiakin khashüwa.

²⁸Tsiu puoe menuo di puo ki mha pu; siro puo kediko chüpie Babilon nu puo ze kebako mho shü.

²⁹Siro Jehoiakin-e puo kedie pfheneiko kediwa. Siro puoe puo kerheichie kediu mizhü geinu mhacümhakrie bata.

³⁰Mu puo meza la, teisonhie ngulie kezhü de kediu ki nu ngulie seiya mu puo kerhei chie si vota.