Read Angami Naga Kediko Kenieu 4 Bible Online

Kediko Kenieu 4 - Angami Naga bible

Kediko Kenieu 4

¹Siro siedzekesimiako[5] mia puo kimiapfüe kra di sie Elisha ki, “N kituou a nupfue siate; mu n kituou Jihova preiyakezha puokecü noe si ba. Mha pie mia thepuyakezhamia puoe a nuonie pie puo diemia chütatuoü di zetuoü vorte” sita.

²Sitse Elishae sie puo ki, “A bu n la kedipuo chünu ga? N kinu kedipuo ba ga? se a ki pushücie?” sishü. Sitse hapfüe sie, “N kituopfüe kinu mhapuorei ba mo, tier pou puo rübei keba zo” sishü.

³Sitse puoe sie, “Vo di n siezanuomia pete ki mhabou kemethuo lukihaki nu thepuliecie mu kengu petsawa hie.

⁴Sidi vorlie tse, kikha khapie no mu n nuonuoko khalie, sidi tier lapie mhabou süko pete nu shüshülie, siro tshuketako kela kreipie bawalie” sishü.

⁵Süla hapfüe puo kinu nu tuota, sidi kikhapie puo mu puo nuonuoko khalie, puo nuonuoko mhabouko se vor mu puoe lapie süko nu shü ba zo.

⁶Mhabouko tshuta tse, hapfüe puo nuou ki, “Mhabou puo se sa vorcie” si. Siru puoe sie, “Mhabou ba sa motelie” sita. Sitse tier kru sa par mota.

⁷Sitse hapfüe vor di Ukepenuopfü themiau ki pushü ru puoe sie, “Vo di tier-u zeliecie, sidi n puko suwalie, sidi no mu n nuonuoko mia pu chü kepeshako se di lhoulie” sishüwa.

⁸Khunhie puo Elishae Shunem nu vo, sünu mhakenyimiapfü puo ba, ru süpfüe puo bu puo kinu mhacünu beita, süla puoe cha süu pfüthe kevo metsei, puoe sünu ler di mhacücüya.

⁹Sitse hapfüe sie puo nupfu ki, “Harie, tsiemelie avu pfüthe vovoyakezha hau Ukepenuopfü themia kemesamia puokecü a si bate.

¹⁰Avu kibou kecüyo puo chülie khe, sidi puo la thezhü puo, mizhü puo, mu mitubou puo khapie balie, sitse puoe avu ki vor tse puoe sünu balietuo” sishü.

¹¹Khunhie puo puoe sünu vor, siru puoe kibouyo nu lelie di sünu zhülie.

¹²Sitse puoe puo kituou Gehazi ki, “Shunampfü kieshücie” si. Puoe hapfü kieshü tse, hapfüe vor puo mhodzünu thalie.

¹³Sitse puoe puo kituou ki, “Hapfü ki, kedipuo chüpie n tsütuo ga? Noe kemezhie di hie la mha hako keseshü. Hie bu n sounu vo kediu morei rüpfhünuoko mhokezhau ki putuo me?” idi pushülie. Siru hapfüe sie, “A a thuo a themia donu lhou ba ze?” sita,

¹⁴Sitse puoe sie, “Di siliro kedipuo chü pie hapfü tsüta?” sita. Sitse Gehazi-e sie, “Puoe puo nuo jü, siro puo nupfu rei tsate” sita.

¹⁵Sitse puoe sie, “Thenupfü kieshücie,” sita. Sitse puoe hapfü kieshü ru puoe kikha ki thalie.

¹⁶Siru puoe sie, “Thecie hateiki, noe n nuo thepfumiayo puo ciepie batatuo” sishü. Sitse hapfüe sie, “Silie lho, a niepuu, he-i Kepenuopfü themiau, n kituopfü sewa hieyi” sita.

¹⁷Thenupfüe nuonipfülie di Elisha puo ki pukeshü teiu vor tse thepfunuomia yopuo penuolie.

¹⁸Mu unuoyo phichülie tse, khunhie puo, puoe lie kereko donu puo puo ki tsu.

¹⁹Ru puoe puo puo ki melo di sie, “He-i, a tsü, a tsülie” ita. Sitse puo puo kituomia puo ki, “Puo pfü vo puo zuo ki shücie” sita.

²⁰Sitse puoe puo pfü puo zuo ki vorshü, ru unuoyo puo zuo do gei thehe ketso balie, sidi siata.

²¹Sitse hapfüe sielie di puo khapie Kepenuopfü themiau zhü gei zhüwa, sidi kikhapie puo khawa sidi chazou prata.

²²Süsie puoe puo nupfu kielie di sie, “Kituomia puo mu gada puo ketseshü a tsücie, sitse a rükri Kepenuopfü themiau ki vo di vortuolie” si.

²³Puoe sie, “No thie kiüdi votieya mu? Thie khrü kesa mo morei Sabat rei moe?” si. Sitse hapfüe sie, “Kevi puo la zolie” sita.

²⁴Sitse puoe gadau gei balie di puo kituou ki, “Gadau whuo zo volie; a n ki pu zo kemosie a la üdi rüleita hie” sishü.

²⁵Sidi puoe tuoshü, sidi Karmel kijüthou gei Kepenuopfü themiau ki vorlie. Süki Ukepenuopfü themiau kepetse nunu hapfü ngu tse, puo kituou Gehazi ki, “Mehoshücie, lutsakhie Shunampfü vorzhie.

²⁶Ta mhai vo puo ze kesecie, sidi sie puo ki, No vi ba zo mo? N nupfu vi ba zo mo? N nuoyo vi ba zo mo? ishülie” sishü. Siru hapfüe sie, “Vi ba zowe” sishü.

²⁷Siro hapfüe kijüthou gei Ukepenuopfü themiau ki vorlie tse, puoe puo phi thezelie, sitse Gehazi-e puo newatuoü phi. Derei Ukepenuopfü themiau sie, “Puo bu ci bacie, kekreilamonyü puo thenou kemezhie secü nu bate, Jihova süu a kinu keviewate tsiu a ki pushü mote” sita.

²⁸Sitse hapfüe sie, “A niepuu bu thepfumia puo a tsünu cha me? Ae sie, a se hiecie, imo me?” sita.

²⁹Sitse puoe sie Gehazi ki, “N chie phalie, tsiu n dzie pie a the thezelie di tuoshülie. Mhanuü no mia ze kese zorei, mia kelu hie, mu mhanuü mia n kelu zorei, mia die kela hie, sidi a thepie u nuoyo zie gei shücie” sita.

³⁰Sitse unuoyonuo zuoe sie, “Jihova rhei ketuo mhiei, mu no rei rhei ketuo mhiei, a n sa mo di vo lho” sita. Siru puoe sielie, sidi hapfü siemedzi vota.

³¹Siro Gehazi vo rielie, sidi ketheu pie unuoyo zie gei bashü, derei mhapfhe morei rheikelie puorei chülie mo, süla puo la vor di sie puo ki, “Unuoyo colie molie” sishü.

³²Elishae kinu lelie tse, unuoyo puo zhü geinu siazhü ngulie.

³³Süla puoe lelie mu kikhapie unie khalie, di Jihova ki chashü.

³⁴Süsie puoe sie unuoyo gei zhülie, sidi puo tie pie puo tie merelie, puo mhipie puo mhi relie, siro puo dzienie pie puo dzienie ba shülie, sidi unuoyo gei zhüshü tse, unuoyo mo le parta.

³⁵Sidi puo la kerlie, di kinu tuo phi mu phishü, süsie lasie puo gei zhü lashü, sitse unuoyo va thenie rüthieshü, sidi unuoyo mhirho parta.

³⁶Sitse Elisha Gehazi kie di sie, “Shunampfü kieshücie” si. Sitse puoe puo kieshü. Hapfüe puo ki vor tse, puoe sie, “N nuo zeliecie” si.

³⁷Sitse hapfüe vor di tsu puo phi nu zhüta, sidi kijü zerepfü zhüta; süsie puo puo nuoyo pielie di tuota.

³⁸Siro Elishae Gilgal nunu la kevor ki, kijüu gei pekrie bata. Siro siedzekesimiakoe[6] puo mhodzü ki ba; ru puoe sie puo kituou ki, “Gali kezhau peleshülie, sidi siedzekesimiako[7] la ga chaliecie” sishü.

³⁹Sitse mia puoe gadatuoü lie nu vo, sitse nhaga puoro chükezhü puo ngulie, sidi puoe süu si puo pfhethula ketshu rielie, sidi vor, dapie gali nu chashü, kekreilamonyü ukoe süu kedipuo shi si mo.

⁴⁰Sidi ukoe kapie themiako bu cütuoü sie derei ukoe gau cü ba tse, ukoe sie, “He-i no Kepenuopfü themiau, gali nu kesia batelie” sita.

⁴¹Sitse puoe sie, “Siro thou huo se vorlie” sishü. Sidi puoe süu kelhoupie galiu nu shü, di sie, “Kapie themiako bu cüliecie” sita. Sidi gali nu mhapuorei u va pesuo mo.

⁴²Mia puoe Baal-shalisha nunu vor, mu puo lieyie kerieu chieshü se vor, niekhrüda mepfü, tsiu telha icü se vor Kepenuopfü themiau tsü, siru puoe sie, “Se themiako tsüshü di uko bu cüliecie” sita.

⁴³Puo kituou sie, “A kimhie di hakoyo pie mia krie puo mhodzü shülie ta?” sita. Puoe la sie, “Themiako tsüshü di uko bu cüliecie, kekreilamonyü Jihova hamhiekecü puya, ‘Ukoe cülietuo, tsiu pesha reilietuo’ ” sita.

⁴⁴Süla puoe süko pie uko mhodzünu shüshü, mu ukoe süu cülie, tsiu Jihova die tuoi huo peshalieta.