Read Angami Naga Kediko Kenieu 5 Bible Online

Kediko Kenieu 5 - Angami Naga bible

Kediko Kenieu 5

¹Naman, Siria kediu rüpfhünuo mhokezhaue themia kezha puo mu puo niepuu mhodzünu therhu pfü phi, kekreilamonyü Jihovae puo la kuokelie Siriamia ketsü la. Puoe thepfu phikecü puo, derei puo mpa kechümia puo.

²Siriamiakoe terhü whuo kepra tei puo nu, Israelmia kijü nunu kediemia yopuo ze vor; mu hapfüe Naman kimia theke chü baya.

³Siro hayoe sie puo niepupfü ki, “A niepuu bu Samaria nu siedzekesiu ze ba ücüwe! Puoe mpa kechüu chü kemeneshüwatuo mu ru” sishü.

⁴Süla Naman-e le di puo niepuu ki Israel kijü nu kevor kituoyo kepu die pushü.

⁵Sitse Siria kediu sie, “Tsie volie, mu a leshü puo pie Israel kediu tsüshütuo” sishü. Süla puoe rakachü talent nyie ker, suna shekel nyie sorou mu pfhenei thuli ker sa selie di tuo vota.

⁶Sidi puoe leshüu se Israel kediu ki vor, sünu thupie ketuo hamhie, “A leshü hau vor n tsolie ro, a a kituou Naman ketseshüzhücü siliecie, süusü n bu puo mpa kechü chü kemeneshünukecü la” si.

⁷Siro Israel kediu leshüu phrüshü tse, puo pfhenei cierha di sie, “A Ukepenuopfü üme, dukhriwa mu perheilie vi üdi, themia hau mpa kechümia puo chü kemeneshünu ketse a ki shüya me? Leshücie, puoe kimhie di a ze kezesuolietuo shicü cha pfü bate” sita.

⁸Elisha, Kepenuopfü themiaue kediu puo pfhenei cierhakewa silie tse, mia ketsepie kediu ki shü di sie, “No kiüdi n pfhenei cierhata ga? Puo bu a ki vorcie, thie puo bu Israel nu siedzekesi puo ba ükecü silietuo,” sita.

⁹Süla Naman-e puo gura tsiu puo guragari ze vor, Elisha kikha ki thalie.

¹⁰Sitse Elishae dieliemia puo ketseshü di sie, “Tuo vo di Jordan rü nunu va thenie n khrüwaliecie, sitse n chüu vi lalietuo, mu no mesalietuo ho” sishü.

¹¹Derei Naman puo noumeyie di tuota, sidi puoe, “Harie, ae puo tuo par thalie di Jihova puo Kepenuopfü za kieshü, sidi puo dzie kegepie kechüpfü mhogei shü sidi mpa kechüu chü kemeneshükecü le.

¹²Damaska nu kerü Abana[8] mu Farpar-e Israel nu dzü pete ki rei vikuo moü me? Sünie nunu a khrüwa di mesalie lhoü me?” sita. Sidi puo rüreilie di puo nei mo se di tuota.

¹³Derei puo kituou puo penuo phir di sie puo ki, “A puo, mhanuü siedzekesiue n bu mhakere huo chünu ro, no chü motatuo me? Puo n ki, ‘Khrüwa di mesatacie,’ ikeshü chülie lhoü me?” sita.

¹⁴Sitse puoe tuo ke, sidi Kepenuopfü themiau die tuoi va thenie Jordan nunu petseshü, sitse puo chü nuoranuomia chü tuoi parta, di puoe mesalieta.

¹⁵Süsie puo mu puo ze ketuo pete Kepenuopfü themiau ki vorlie, sidi puoe vor puo mhodzünu thalie, di sie, “Harie, a tsie we, Israel nu zo kemosie kijü pete nu Ukepenuopfü tuo mokecü siliete, süla tsie n kituou ki nu mha hako lieliecie” sita.

¹⁶Derei puoe sie, “Jihova, a puo lie chüyakezhau rhei ketuo tuoi a mhapuorei lielie lho” sishü. Sitse puoe puo bu lielienu beita, derei puoe mvüta.

¹⁷Sitse Naman-e sie, “Siüliro, a n ki chaya rünyo gura thepie kenie pie n kituou tsüwacie, kekreilamonyü thie yawinu n kituoue Jihova rübei sie kethe ruosuo morei ruosuo chüpie terhuo kekrei tsü salie lhote.

¹⁸Mha hau la Jihova bu n kituou kejo vashücümu: a niepuue a dzie mengupie rüsuotuoü Rimmon ki nu kele ki, Rimon ki nu nuketsuya, mu ae Rimmon kinu nuketsu kecü ki, Jihova bu hanunu n kituou kejo vashücümu” sita.

¹⁹Sitse puoe sie puo ki, “N nou mene di tuo votaliecie” siwa. Derei Naman-e tuo za votazhü tse,

²⁰Gehazi, Kepenuopfü themiau Elisha kituou sie, “A niepuu Siria-u Naman mha se kevor puo dzie nunu lielie mo di kelawate, Jihova rhei ketuo mhiei, a ta puo sie whuo votuo, sidi puo kinu mha huo lielietuo” sita.

²¹Sidi Gehazi-e Naman siemedzi vo. Tsiu Naman-e mia puo ta puo sie whuo kevor ngu tse, puo ze kesetuoü guragari geinu kerlie, sidi sie, “Mhapuo ta mo nhie?” si.

²²Ru puoe sie, “Mhapuorei ta mo. A niepuue a ketseshü di a bu, ‘Tsie kinu Efraim kijüthou geinu siedzekesimia nuonuo khriesamia kenie a ki vorte; a n ki chaya, rakachü talent puo mu pfhenei thuli kenie pie unie tsüyi’ idi pushünulie” silie.

²³Sitse Naman sie, “N pezie rei talent kenie rei lieliecie” sita. Sidi puo bu lielienu beita, di likhuo kenie nu rakachü talent kenie phashü, pfhe thuli kenie sashü, sidi süko pie puo kituomia kenie bu pielie, sidi unie-e Gehazi mhodzünu toupie vota.

²⁴Sidi puoe dahou penuo vorlie tse, puoe unie dzie nunu pielie, sidi pie kinu shüwa, sidi puoe unie ketsewa, tsiu unie-e tuota.

²⁵Puoe le puo niepuu mhodzünu thalie, siru Elishae puo ki, “Gehazi no kirapuo vo ga?” si. Sitse puoe sie, “N kituou mhakipuorei vo molie” sita.

²⁶Derei puoe sie puo ki, “Themia puo guragari geinu ker n ze kesekecü ki a ruopfü nunu n ze tuo moü me? Puotei haue raka mu pfhenei, siro Oliv lie nu khubelie, siro tekuo mu thudo, tsiu kituo thepfumia mu thenumia liekecü teiu üba me?

²⁷Süla Naman mpa kechüu n gei mu n nuonuoko gei kechachie tuotatuo” si. Sitse puoe puo mhodzünu nu mpa chü di krapie pekrie mhiei parta.