Read Angami Naga Kediko Kenieu 6 Bible Online

Kediko Kenieu 6 - Angami Naga bible

Kediko Kenieu 6

¹Sitse siedzekesimiakoe[9] Elisha ki, “Harie, hieko n ze lhou keba thechü hau hieko la merethortelie.

²Hieko bu Jordan nu vo di, sünunu mia puo sei puopuo toupielie, sidi sünunu thechü puo keselie di lhou batacie” sita. Sitse puoe sie, “Siliecie” sishü.

³Sitse uko mia puoe sie, “N pezie rei n kituoko mia puo ze vocie” sita. Sitse puoe sie, “A rei votuowe” silie.

⁴Sidi puoe süko ze vo siro ukoe Jordan nu vorlie tse, ukoe sei wilie.

⁵Derei mia puoe seibo puo wi keba ki, seidurü rüzu dzü nu leta; siru puoe kra di sie, “Cie, chüwate, a niepuu hau thepukelie puo muru” sita.

⁶Sitse Kepenuopfü themiaue sie, “Süu te kirapuo tsute ga?” si. Sitse puoe thechü thashü puo kie, sitse puoe seico puo talie, di süu kelhoupie sünu shü; sitse thegiu rüdza sierta.

⁷Süla puoe sie, “Cüu chüliecie” si, süla puoe puo dzie yhashü di süu chülie.

⁸Siro Siria kediue Israel ze terhü chü, puoe puo kezhako ze kerüchülie di sie, “Thechü sünunu a razhüchü chütuowe” sita.

⁹Derei Kepenuopfü themiau die ketsepie Israel kediu ki shü di sie, “No thechü hau nu vo moketuo leliecie, kekreilamonyü sünu Siriamiako tsur bate ho” sishü.

¹⁰Süla Israel kediue mia ketsepie Kepenuopfü themiau pukeshü thechüu nu shü. Puoe va puo kenie zie thechü sünu kemichie baketa pu, süla sünu menuo bata.

¹¹Haha la Siria kediue puo nou kemezhie philie, puoe puo kezhako kielie, di sie uko ki, “Uko donu supuonie Israel kediu yapie bate shi tsie a ki pushücie” sita.

¹²Sitse puo kezhako mia puoe, “Miapuorei mowe, a niepuu kediu, süue Elisha, Israel nu siedzekesiuwe, no n zhübou nunu pukeshü dieko puoe pie Israel kediu ki puwaya,” sita.

¹³Sitse puoe sie, “Vo di puo kirapuo ba shiü pfhücie, sitse a mia ketsepie puo telietuo mu” sita. Sitse miae puo ki, “Puo Dothan nu ba,” sishü.

¹⁴Süla puoe gura mu guragari, mu rüpfhünuo kekra ketsepie sünu shü, ukoe theva nu vor, di nadiu houpfülie.

¹⁵Siro Ukepenuopfü kituou khiserüna sielie di kitie pra ru, rüpfhünuokoe gura mu guragari se vor nadiu houpfü ba ngulie, Sitse puo kituoue sie, “Ce, a niepuu! Avu kedipuo chü ro vitie shi?” sita.

¹⁶Sitse puoe sie, “Michie hiecie, kekreilamonyü avu ze kethakoe uko kitsatie kethako ki krakuo” sishü.

¹⁷Süsie Elishae kechachü di sie, “He-i Jihova, puo mhi bu mhirho parliecie, puo bu ngulieketuo la” sishü. Süla Jihovae puo kituou mhi bie kemhirhoshü, sidi puo bu mha ngulie, kijüthou gei gura mu miü guragari thuo Elisha houpfü tha.

¹⁸Sidi Siriakoe puo ki tsur puo petsou sie tse, Elishae Jihova ki cha di sie, “Themia hako bu u mhicietacie” sishü. Mu puoe Elisha chakeshü kemhie uko bu uko mhicieta.

¹⁹Sitse Elishae sie uko ki, “Hau chau mo, morei hau nadiu rei mo, a siemedziliecie, sitse ae nieko ze vo themia pfhü ketuou ki shütuo” sishü. Sidi puoe uko ze Samaria nu vowa.

²⁰Ukoe Samaria nu kelie mumetha, Elishae sie, “He-i Jihova, themia hako mhi bu mhirholiecie uko bu mhangulieketuo la” sishü. Jihovae uko mhi bu mhirholie, mu ukoe Samaria nu baketa ngulie.

²¹Sitse Israel kediue uko ngu tse, puoe sie Elisha ki, “A puo, a bu uko dukhriwatuo me? A bu uko dukhriwatuo me?” sita.

²²Puoe sie, “Mo! No n zhiecha mu n theü pie uko telie di uko dukhriwa nyüya me? Niekhrüda mu dzü se vor uko mhodzünu shülie, sidi uko bu cüükrielie, sidi uko bu uko niepuu ki votacie” sita.

²³Sidi puoe uko la thehe kezha puo keseshü, sidi ukoe cüükrielieta tse, puoe uko ketsewa, mu ukoe uko niepuu ki vota. Süsie Siriamiae vor Israel kijü whuo la sa mota.

²⁴Puotei huo sie Siriamia kediu Ben-hadad-e puo rüpfhünuoko pete kie kengulie; sidi Samaria whuo vor süu bolieta.

²⁵Sidi Samaria perhie ba zoketa la sünu pekriepie mhapuo chüta, sidi gada tsü puo rakachü shekel hiethetha, siro mekhrubuo kab dia za puo rakachü shekel pengoungou nunu zeta.

²⁶Tsiu Israel kediue nadi dahou gei tuo vozhü tse, thenumiapfü puo sie puo ki, “A khruohishücie, a niepuu kediu!” sita.

²⁷Sitse puoe sie, “Mo! Jihova bu n khruohishülie. A kimhie di n khruohilie ta? Shie nunu, morei khubedzü kethe nunu tuoü me?”

²⁸Derei süsie kediu hapfü ketso di sie, “N mezhie kikecüpuo ga?” si. Hapfüe puo die kela di sie, “Thenu hapfü a ki, ‘N nuo khashülie, avu thie puo cülie, mu sodu avu a nuo cütuo’ site.

²⁹Süla hienie a nuou cha cülie, siru süsienhie a puo ki ‘N nuou khashü di avu cütuo,’ si. Derei hapfü puo nuou keviewatelie” sita.

³⁰Kediu thenu hapfü die silie tse, puo pfhenei cierhata, puoe tsie nadi dahou-u gei tuo vokezhü la, themiakoe puo gakhropfhe pie puo whepfü ketuo nguta.

³¹Sitse puoe sie, “Mhanuü thie Shafat nuou Elisha tsüu puo bouka gei tuo üliro, Ukepenuopfü bu a gei sükemhie tsiu sükezie rei chüshücie” sita.

³²Sidi puoe puo mhodzünu nu mia puo ketseshü. Elisha tsie rei puo kinu ba, mu phichüko puo ze ba. Dielieu kevor mhodzü, Elishae sie phichüko ki, “Mia kedukhriue mia bu a tsü zielietuoükecü la mia ketse shüwaketa si ba mo? Dielieu vor tse, kikha khalie, di süu nepie thata, puo niepuu phicha pfhe puo sietsa tuo moü me?” sita.

³³Puoe uko ki diepu thaluocü nu, dielieu puo ki tsur di sie, “Mha kesuo hau Jihova kinu vorwe, a kimhie di Jihova gei a kemerü ba salie ta?” sita.