Read Angami Naga Kediko Kenieu 7 Bible Online

Kediko Kenieu 7 - Angami Naga bible

Kediko Kenieu 7

¹Derei Elisha sie, “Jihova pfhe rünyüshücie: Jihova hakemhie puya, sodu tsie mese ki Samaria kharu nu thoulha kevithopfü kemejü puo shekel puo, mu Barli kemejü kenie la shekel puo idi zeshütuo” sita.

²Sitse kediu peleyakezha chüpahi mhokezhau sie, “Mhanuü Jihovae teigei nu khirki chülie zorei, sükemhie chülie vi me?” sita. Derei puoe sie, “No n thuo n mhi se süu ngutuo, derei süu cülie lho” sishü.

³Siro kharu sie ki mpa kechümia dia baya, ukoe huoniehuo ki, “Kiüdi we haki ba di siata ta?

⁴Mhanuü ukoe sie, ‘Uko nadiu nu le khe’; irei nadiu nu rei pekriekecü ba, mu uko sünunu siatatie, derei uko hanu ba zorei khesiata zotie. Süla, uko Siriamia rüpfhünuoko razhüchü nu vota khe, mhanuü ukoe u perheishü ro ukoe rheilietuo; mu mhanuü ukoe uko dukhriwa ro, ukoe siata zotie” sita.

⁵Sidi ukoe teizeitie ki sie di Siriako razhüchü nu le, sidi ukoe Siriako razhüchü nu vo, derei miapuorei sünu ba mota.

⁶Kekreilamonyü Jihovae Siriako rüpfhünuo bu guragari pfhe, mu gurapfhe, siro rüpfhünuo kekra pfhe sita, sidi ukoe huoniehuo ki, “Israel kediue Hitmia kediko, mu Ijiptmiako kediko bu u perhietuoü di uko zha khrüliete” ibata.

⁷Süla ukoe teizeitie ki sie tata, sidi u pfheki chüpie keba, u gurako u gadako, u kebachü chüpie kebako khawa di, u kerheiro kelalietuoü tata.

⁸Tsiu mpa kechü hako uko razhüchü nu vorlie tse, ukoe süko pfheki puo nu le, sidi cüükrielie, sidi rakachü, suna mu pfhemenei ketalie di se vo keviewa. Süsie ukoe la vor pfheki chüpie keba kekrei puo nu le, di sünu rei mha ketalie sidi se vo keviewa.

⁹Süsie ukoe sie huoniehuo üse, “Úko puotou kemo chü bate. Thie ha dieliekevi teisozha; mhanuü úko kemekrie di khise teikezie pfheta ro, kejo úko gei pfütuo; süla úko vo di kediu kinumiako ki pu khe” sita.

¹⁰Süla ukoe vor di nadiu care kepfheko kieshü, di sie uko ki, “Hieko Siriako razhüchü nu vo, derei sünu miapuorei ngu mo morei mhapfhe puorei si mote, mhapuorei ba mo derei gura khepie tha, gada khepie tha, mu pfhekiko chüpie keba tou-u ba zo” sishü.

¹¹Sitse care kepfhekoe phieshie di süu se kediu kinu kebako ki pushü.

¹²Sitse kediu theva sielie, di puo kituoko ki, “Siriamia kedipuo mhie di uko petsou ba shikecü a nieko ki pushütuo, ukoe we khe keba si ba, süla ukoe razhüchü nunu prata di vo phouyo nu rüshü bate, mu ukoe lecü, ‘Úko nadiu nunu par ro, we perhei uko telietuo sidi nadiu lielietuo’ ibate” sishü.

¹³Sitse puo kituoko mia puoe sie, “Huomia bu peshapie keba gura pengou selie, kekreilamonyü peshapie keba süko rei bie pejükewa Israel krodiu kemhie kemezhieta zotuo, süla uko ketseshü di meho khe” silie.

¹⁴Sidi ukoe guragari kenie selie, mu kediue uko ketse pie Siriako rüpfhünuo siepie di sie, “Tuo vo di mehoshücie” sishü.

¹⁵Ukoe süko siepie Jordan nu tsu, siru cha pete nu Siriamia rükri di vakewa pfhemenei mu mhanyako thuo tshupfhü zhü, süla dieliemiako la vor di pie kediu ki pushü.

¹⁶Sitse themiakoe tuo pra, sidi Siriako razhüchü valie, sidi Jihova die kemhie thoulha kevithopfü kemejü puo la shekel puo, mu barli kemejü kenie la shekel puo idi zeshü.

¹⁷Siro kediue peleyakezha chüpahi kezhau bu care kepfheu chü tha, sitse themiakoe kharu nunu puo kedekhriwa, Kepenuopfü themiau kediu puo ki ketsur ki pukeshü mhiei di.

¹⁸Kekreilamonyü Kepenuopfü themiau kediu ki “Sodu hateiki barli kemejü kenie la shekel puo, mu thoulha kevithopfü kemejü puo la shekel puo, Samaria kharu nu zeshütuo” ikeshü ki,

¹⁹kezha süue Kepenuopfü themiau die kela di sie, “Mhanuü Jihova teigei nu khirki chüshü zorei sükemhie chülie viü me?” si. Ru puoe süu die kela di, “No n thuo n mhi üse süu ngutuo, derei no süu cülie lho” ikeshü la.

²⁰Mu puo gei sükemhie chüta zo, themiakoe care nunu puo kede khriwa.