Read Angami Naga Kediko Kenieu 8 Bible Online

Kediko Kenieu 8 - Angami Naga bible

Kediko Kenieu 8

¹Siro Elishae puo nuou chü perheikeshü thenupfü ki, “Sielie, sidi n kikru ze volie kevira vo lhoulie, Jihova pekriekecü kieshüte, mu süue kijü gei cie thenie batatuocü la” sita.

²Süla thenupfüe sielie di Kepenuopfü themiau die kemhie chülie; sidi hapfüe puo kinumiako ze tuota mu Filistinmia kijü nu cie thenie tuota.

³Siro cie thenie tseita tse, thenupfüe Filistinmia kijü nunu la vorta, sidi puo kinumiako mu puo kijü la kediu ki puo mezhiemelotuoü vo.

⁴Sitse kediue Kepenuopfü themiau kituou Gehazi ze kerüchü di sie, “Elisha chükeshü mhatho kezhako pete a ki pushücie” si.

⁵Sidi puo kediu ki kedipuo mhie di kesiamia puo chü perheilie shikecü puthaluocü nu, harie puoe puo nuo chü perheikeshü thenupfüe puo nuou ze di puo kinumiako mu puo kijü la kediu ki puo mezhiemelotuoü vor. Sitse Gehazi-e sie, “A niepuu kediu, thenu hapfüha lie, mu hau puo nuou, Elishae chüperhei lakeshüulie” sishü.

⁶Siro kediue thenupfü ketso tse, hapfüe pushü, süla kediue hapfü la kezhamia puo petholie di sie, “Hapfü vie ükecü peteko, puo kijü vawa di tuoketa yawinu vor thie ketso lie nu puo si rüchükelie pete pie puo tsüwacie” siwa.

⁷Siro Elishae Damaska nu vor, siru Siria kediu Ben-hadad-e mhachü zhü, sitse mia puo ki, “Kepenuopfü themiau haki vor ba ho” sishü.

⁸Sitse kediu sie Hazael ki, “Mha methuo khashüketuo selie di vo Kepenuopfü themiau ze kesecie, sidi Jihova ki a kechü hanunu shürholietuo mo lho shiü ketsocie” si.

⁹Süla Hazael-e mha methuo khashüketuo la, puo ze kesetuoü vo, sükoe Damaska nu mha viükecü khe, mu ut hiedia pie keselie. Sidi vor puo mhodzünu thalie, di sie, “N nuou Ben-hadad Siria kediu a ketsepie n ki shüya, puo pukecü, ‘A kechü hanunu shürholietuo mo mo ga?’ ” iyalie.

¹⁰Sitse Elishae sie puo ki, “Tuo volie, di puo ki, ‘No shürholie tou zotuo,’ siliecie, derei Jihova puo siata tou zoketuo thashü a kiewate” si.

¹¹Sitse Hazael-e mengata kemochie, Elishae puo meho terü thata. Süsie Kepenuopfü themiau krata.

¹²Sitse Hazael sie, “A niepuu kiüdi kraya ga?” si, ru puoe puo die kela di sie, “Kekreilamonyü noe Israelmiako gei mha kesuo chüshüketuo a si bate, uko dahou kemeteiko noe mi pie thewatuo, mu uko khriesako noe zhiecha se dukhriwatuo, siro uko nuonuoko kepfhütshie phaphawatuo, siro phoupiemo ketuoko va rhielawatuo;” sishü.

¹³Sitse Hazael-e sie, “N kituou sü kedipuo ümu, puoe tefü yopuo ze, puoe mhakezha haikecü chülietuo me?” si. Elishae puo die kela di sie, “Jihova thashü a kiecü noe Siria mho kedi chütuo” sishü.

¹⁴Süsie puoe Elisha ki nu tuota, sidi puo niepuu Ben-hadad ki vor, ru puoe sie puo ki, “Elisha n ki, kedipuo pu ga?” si. Sitse puoe puo die kela di sie, “Puoe a ki noe shürholie tou zotuoüyalie” si.

¹⁵Derei süsie nhie puoe zhükhrapfhe puo chüpie dzü nu selie, di pie kediu zie wheshü, sitse puoe siata. Sitse Hazael-e puo sou nu kedi chülie.

¹⁶Joram, Ahab nuou Israel kediu dikelie cie pengou cie[10], Jehoshafat nuou Jehoram-e Juda nu kedi chü sedelie.

¹⁷Puoe kedi chükelie ki puo kelhouzha cie serekenie ta; mu puoe Jerusalem nu teicie thetha di.

¹⁸Siro puoe Israel kediko zho nu tuo, Ahab kinumiako kemhiecü chü; Ahab nuopfüe puo kimiacü la; mu puoe Jihova mhodzünu mha kesuo shüüko chü.

¹⁹Sizoürei Jihovae David puo kituou la, puoe kezie puo khapie puo mu puo nuosenuoyieko tsü seituoükeshü la, Juda pekawa lho ülie.

²⁰Puo teiki nu Edom-e sie di Juda perhieta, sidi uko thuo u kedi puo khapie balie.

²¹Sitse Joram-e puo guragari pete zelie di Zair ki vo. Puoe theva geinu sielie di Edommia puo houpfü kebako, mu guragari mhokezhako perhie, derei puo chüpahiko ta u kinu vota.

²²Süla Edom-e Juda dzie nunu thie ketso rei mia perhie tuoya zo, siro sükisü Libna rei sie mia perhieta.

²³Siro Joram mhatho kekreiko mu puoe chükeshü pete, sükosü Juda kediko thedze leshüda nu thupie zhü moü me?

²⁴Sidi Joram-e puo puonuoko ze zezhüta, sidi David nadiu nunu puo puonuoko ze khruwa mu puo nuou Ahazia puo sounu kedi chülie.

²⁵Ahab nuou Joram Israel mho dikelie cie kerekenie cie, Ahazia Jehoram nuou Juda nu di sedelie.

²⁶Ahazia kedi chükelie ki puo kelhouzha cie mepfüekenie ta; puoe cie puo Jerusalem nu di. Mu puo zuo zae Athalia, Israel kediu Omri nuopfü.

²⁷Puo rei Ahab zho nu tuo, sidi Jihova mhodzü ki mha kesuo shüüko chü, Ahab kinumiako mhiekecü chü, puoe Ahab nuo kinumia nyaucü la.

²⁸Siro puoe Ahab nuou Joram ze terhü nu vo di Ramoth-gilid nu Siria kediu Hazael ze kegei, ru Arammiae Joram bie kerüzawa.

²⁹Sitse kediu Joram-e Siria kediu ze terhü kechü ki, Rama nunu Siriamia dzie nunu rüzakelie chü kemenelietuoü di Jezril nu la vo, siru Jehoram nuou Ahazia Juda kediu tsu di Joram Ahab nuou meho, puoe rüzapfü baketa la.