Read Angami Naga Kediko Kenieu 9 Bible Online

Kediko Kenieu 9 - Angami Naga bible

Kediko Kenieu 9

¹Siro Elisha siedzekesiue siedzekesimiako[11] mia puo kielie, di sie puo ki, “N chieca phaliecie, sidi n dzie nu tierbou hau pielie sidi Ramoth-gilid nu vocie.

²No sünu volie tse, Nimshi nuo Jehoshafat nuou Jehu pfhüliecie, sidi tuo lelie, di puo zeko donunu puo ze tuotalie, mu puo ze kinu kesou nu leliecie.

³Süsie tierbou-u chülie, di ru pie puo tsü gei shücie, sidi sie, ‘Jihova hakemhie puya: Ae n kenhepie Israel mho kedi chüwate ho,’ silie. Süsie kikha khrülie di tataliecie mu ge bata hie” sita.

⁴Süla khriesau, siedzekesiu tuo Ramoth-gilid nu vo.

⁵Puoe rüpfhünuoko mhokezhakoe kehou keba teiki vorlie, ru puoe sie, “Kezhau, a dielie puo n la se tuolie,” sishü. Sitse Jehue sie, “Hieko supuo la ga?” sishü. Sitse puoe sie, “N lalie, kezhau” sishü.

⁶Sitse puoe sielie, sidi kinu leta, tsiu puoe tier rupie puo tsü gei shüshü di sie, “Jihova Israel Kepenuopfü hakemhie puya; ae n kenhepie n bu Jihova themiako, Israel pete mho kedi chüliete ho.

⁷Mu noe n niepuu Ahab kinumia pekawalie, sidi a bu a kituo siedzekesiko zie, tsiu Jihova kituo pete zie Jezebel geinu khepu lieliecie.

⁸Kekreilamonyü Ahab kinumiako pete katatuo: ae Israel nu Ahab kinumia thepfumia ükecü kheko kediemia rei morei kedie kemomia rei pekawatuo.

⁹Ae Ahab chüpie Nebat nuou Jeroboam ki, siro Ahija nuou Basha ki kemhiewatuo.

¹⁰Tefükoe Jezril kijüko nunu Jezebel cütuo, tsiu miapuorei hapfü khrulie lho” sita. Süsie puoe kikha khrülie di tata.

¹¹Siro Jehue puo niepuu kezhako ki la vor tse, uko sie puo ki, “Mha pete puotou zo nhie? Kiüdi themia kenya cüu n ki vor ga?” sita. Sitse puoe sie uko ki, “Nieko themiau mu puo kedipuo puya shi siba” sishü.

¹²Sitse ukoe sie, “Kecürüu! Vor di hieko ki pushücie!” sita. Süla puoe sie, “Puo hau se a ki pushülie: ‘Jihova hakemhie puya, a n kenhepie n bu Israel mho kedi chüliete’ ” sishü.

¹³Sitse uko rükri sie u pfheneiko chülie, sidi puo la kelhapie chaprako khrashü, sidi ketsü khoushü di sie, “Jehu kedi chüte ho” sita.

¹⁴Sükemhie di Nimshi tsuu Jehu Jehoshafat nuou sie di Joram perhieta. Joram mu Israel pete Asiria kediu Hazael perhietuoü di Ramoth-gilid nu pfhe bata.

¹⁵Derei Joram kediu Siria kediu Hazael ze kegeikecü ki Siriamia puo bie kerüzakewa la puo chü kemenelietuoü di Jezril nu vota. Süla Jehue sie, “Mhanuü hau nieko medoü liro, thedzeu pie Jezril nu putuoü di nadiu nunu prata hie” sita.

¹⁶Sidi Jehue guragari gei sielie, di Jezril nu vota, Joram-e sünunu mhachü zhü, mu Juda kediu Ahazia-e Joram mehotuoü ker.

¹⁷Siro Jezril tsiepfhe gei rükhoumia puo tha, mu puoe Jehu puo kro-u ze vorkezhü ngu di sie, “A themia kro puo ngute,” si. Sitse Joram-e sie, “Gurathemia puo pfhülie, di puo ketsepie uko ze kesecie, di puo bu, ‘Kezekevi la zo mo?’ siliecie,” sita.

¹⁸Süla gurathemiau vo puo ze kese di sie, “Kediue hakemhiekecü puya, ‘Kezekevi la zo mo?’ ” Sitse Jehue sie, “No kezekevi se kedipuo chütieya ga? No a sietsatie votaliecie” sishü. Sitse rükhou-ue süu dze pu di sie, “Dielieue uko tsoliete, derei puo la vor mote,” sita.

¹⁹Sitse puoe va kenie gura geinu mia puo ketse lashü, süue uko ki vor di sie, “Kediu hakemhiecü puya, ‘Kezekevi la zo mo?’ ” si. Sitse Jehue puo kela di sie, “No kezekevi se kedipuo chütieya ga? No a sietsatie votaliecie” sita.

²⁰Siru rükhou-u süu dze pu di sie, “Puoe uko tsoliete, derei la vor motelie, siro Nimshi nuou Jehu gura kese mhietalie, kekreilamonyü puoe se ta vipie kenyamia mhie tuote” sita.

²¹Sitse Joram-e sie, “Dojüliecie” sita. Sitse ukoe puo gura-u dojüshü, sidi Israel kediu Joram mu Juda kediu Ahazia unie u thuo u guragari nunu Jehu ze kesetuoü pra, mu unie Naboth Jezril-u lie nunu puo selie.

²²Joram-e Jehu ngu tse, sie, “Jehu, kezekevi la zo mo?” si. Ru puoe puo die kela di sie, “N zuo Jezebel pieü kechü mu themouko si ba zo di kiüdi kezekevi balietuo mu?” sita

²³Sitse Joram-e puo dzie kereilie di tata, di sie Ahazia ki, “Ahazia, kengukemvü bate ho” sita.

²⁴Sitse Jehue puo kekuo pete se puo theü gashü, sitse Joram boukanie donu pewa, tsiu theütsieu puo melou vakhropfü pata, sidi puoe puo guragari geinu tetsuta.

²⁵Sitse Jehue sie puo khro kezhau Bidkar ki, “Puo chüliecie, sidi puo kelhoupie Naboth Jezril-u lie nu shüwacie: kekreilamonyü rükrashücie, a mu no puo puo Ahab siewhuo vokezhü ki, Jihovae puo perhielie nukecü hau pie a noushüshüte.

²⁶Kekreilamonyü ndu ae Naboth zie, siro puo nuonuoko zie, nguwata tou zo, Jihova puya; mu ae thechü hau nunu zhakhra chüshütuo. Süla tsie Jihova die tuoi puo kelhoupie Naboth lieu nu shüwacie,” sita.

²⁷Siro Juda kediu Ahazia-e hau ngu tse puoe Beth-hagantsa ta vota. Siru Jehue puo siewhuo vo di sie, “Puo rei pekawaliecie,” sitse ukoe puo guragari geinu puo peshü, süu Gur kekhotsa Iblim nunu. Sitse puoe ta se Megido nu vota, sidi sünunu siata.

²⁸Sidi puoe kezhako guragari geinu puo toupfü Jerusalem nu volie, mu David rüna nu puo puonuoko mekhru nunu puo khruwa.

²⁹Tsiu Ahab nuo Joram dikelie cie kerepuokrü cie Ahazia-e Juda nu dilie.

³⁰Siro Jehue Jezril nu vorlie tse, Jezebel-e süu dze silie, puoe puo mhi kenhelie, mu puo tsü kezilie, di khirki nunu mehoshü.

³¹Sitse Jehue care nu ler tse, hapfüe sie, “Zimri, n niepuu dukhrikewau, n nou mene bate mo?” sishü.

³²Sitse puoe khirki mehoshü di sie, “Supuo a kitsa ba ga? Supuo ga?” si. Süsie dzücümia mia kenie kese-e puo mehoshü.

³³Ru puoe sie, “Cüpfü chü kelhoushücie” sishü. Süla ukoe hapfü chü kelhoushü; sitse süpfü zie huoe sozha gei mu huo gura gei dawata mu puoe puo phi pie süpfü kedewa.

³⁴Süsie puo ler di mhacümhakrielie di sie, “Rüsekewa thenu hapfü mehoshüi, sidi puo khruwalie, kekreilamonyü hapfüe kedimia nuonuo ze eru” si.

³⁵Derei ukoe puo khruwatuoü vo tse, hapfü tsütsoru, puo phi, tsiu puo dziezhü sie mha kekrei ngu salie mota.

³⁶Süla ukoe la vor di puo ki pushü, sitse puo sie, “Hauha Jihova die puo kituou Tishbi-u Elija ki pukeshüu zo, ‘Jezril lie nunu tefükoe Jezebel chü cütuo.

³⁷Siro Jezebel kesia mo-u Jezril lieu nu thubuo kemhieta zotuo; süla miapuorei sie, hauha Jezebel we’ sikecü pulie lho” ishü zo.