Read Angami Naga Seyiedze Kerieu 10 Bible Online

Seyiedze Kerieu 10 - Angami Naga bible

Seyiedze Kerieu 10

¹Filistinkoe Israel ze kegei mu Israel themiako Filistinko mhodzünu nu tata, mu Gilboa kijüthou geinu mia bu uko geiwata.

²Siro Filistinko Saul mu puo nuonuoko tsolieta, sidi Filistinko bu Saul nuonuoko Jonathan, Abinadab, Malkishua dukhriwata.

³Terhüu Saul no seta; mu theü bu puo vata, sidi puoe theütsie puo keva geinu rüzalieta.

⁴Sitse Saul sie puo rünyie kepfüu ki, “N zhiecha zulie di se a zewatacie, sidi u zhürekemo hako bu vor a pie kethekrekecü chü molietuo” sita. Derei puo rünyiekepieu chü mvüta, puo michie phiketa la. Süla Saul puo thuo puo zhiecha zulie di te sügei tsuta.

⁵Siro puo zhiecha kepieu Saul siaketa ngu tse puorei te puo zhiecha gei tsu di siata.

⁶Hamhie di Saul siata, puo mu puo nuo mia se, mu puo kinuko pete keze siata.

⁷Siru Israel themia razha nu keba pete chüpahiko taketa mu Saul tsiu puo nuonuoko siaketa ngu tse, u rünako khawa di tata; mu Filistinko vor di sünu bata.

⁸Siüderei Filistinkoe geikelieko nya rhuolietuoü vor tse ukoe Saul mu puo nuonuoko Gilid kijüthougei nu siakezhü ngulie.

⁹Ukoe puo nyako rhuolie mu puo tsü zielie mu puo rünyieko pielie, sidi Filistin kijü pete nu kenei dielieu se uko rhuoko mu u themiako pesishütuoü di dieliemia ketseshü.

¹⁰Ukoe puo rünyieko pie uko rhuoko rüsuoki nu khashülie mu puo tsüu pie Dagon rüsuochü nu zhiepie zha.

¹¹Derei Jabesh-Gilid pete Filistinmia Saul gei kechü mhathoko dze silie tse,

¹²terhü miavimia pete sie di Saul mu puo nuonuoko mo pie Jabesh nu vorta. Sidi uko theruko pie Jabesh nu phriebo khro nu khruwa, mu zha thenie mevo.

¹³Süla Saul-e puo miatholiekemo la siata; puo Jihova gei dietholie mo di Jihova diekhakeshüko ze mo, sizomonyü chatha pfü di themou puo rei rüsa,

¹⁴di Jihova chatha pfhü mo; süla Jihova puo dukhriwa mu kedibau pie Jese nuo David tsüwa.