Read Angami Naga Seyiedze Kerieu 11 Bible Online

Seyiedze Kerieu 11 - Angami Naga bible

Seyiedze Kerieu 11

¹Siro Israel pete Hebron nu David mhodzü kengulie di sie, “Harie, hieko sü n ru mu n chü ze.

²Kekreilamonyü hamhodzütsa Saul kedi chükeba ki zorei, noe Israel chüpahi chathakeshüu sü no zo; Jihova n Kepenuopfü n üse; n bu a themia Israel kepfheu chü, a themia Israel kekhakezhau chütuo” isi.

³Sidi Israelmia phichüko pete Hebron nu kediu ki vor; mu David-e Hebron nu Jihova mhodzünu nu uko ze dietseidiekhokelie puo chüwa. Mu uko David kenhepie Israel mho kedi chüwa, Jihova Samuel geinu pupie ketuo kemhie di.

⁴David mu Israel pete Jerusalem nu vor, süu Jebus, kijü süki lhouyakezha themiako Jebusko ketuo chüu.

⁵Jebus themiako David üse, “N bu hanu lerlie lho zo” ilie. Derei David-e Zion kemeteiu lielie. Süu David nadiu zo.

⁶David-e sie, “Kehoupuorei Jebusko geilie kerietho-u bu kezhau mu kekhakecüu chütuo” sishü. Sitse Zeruia nuou Joab kerietho chüshü, süla puo bu kezhau chülie.

⁷David razhüchü kemeteiu nu balie; süla süu üse David nadiu thote.

⁸Puoe nadiu Millo nunu chü zo vo süu whi touwa mu Joab-e nadiu keshako kemieshü.

⁹Mu David-e zha miemie sieta, kekreilamonyü krodiko Jihova puo zeketuo la.

¹⁰Jihova Israelko la pukeshü tuoi, hako David terhümiaviko, puo kedibau khrükemeteikeshüko. Israel pete sa di puo bu kedi chükelieko.

¹¹Haue David terhümiavi kekuoko dze: Hakmoni[21] nuou Jashobim donu Seko[22] kezhau, puoe puo ngoupie vapuonu mia krie se geiwa.

¹²Terhümiavi mecamekhrocüko donu puo sieso-u Eliazar, Dodo nuou Ahohitmia.

¹³Filistinko terhüchütuoü di Pas-dammin nu kengukelie ki puo David ze tuo. Lietsa puo nu barli tshu ba. Tsiu themiakoe Filistinko kinu ta phreta.

¹⁴Derei puo mu David-e lietsa metsuo nu tha zolie di süu yalie, sidi Filistinko geiwa; mu Jihova kuopezha philie di unie kelalie.

¹⁵Filistinmia chüpahi Refaim razhau nu razhüchü keba ki, kezhako mia ser donu mia se Adulam tsiepfüu nu David ki tsur.

¹⁶Süki David-e razhü chü dahou kemetei nu ba; mu Filistinko chüpahi Bethlehem nu ba.

¹⁷Mu David mhapuo mengu di sie, “He-i mia puo bu kharu khieki Bethlehem dzükhou-u nunu dzü se vor krieketuo la a tsü üthienyü!” sishü.

¹⁸Sitse mia Sekoe Filistinmia razhüchüu vaphapfü vo Bethlehem dzükhou kharu khieki kebau nu dzü se vor David tsü. Derei David-e süu krie lhoülie, sidi puoe süu lapie Jihova tsü,

¹⁹sidi sie, “A Kepenuopfü a bu süu chücü kha, a themia hako zie krielie vi me? Uko u kerheiro kha zoshü di se vorkecü la” sita. Sidi puo süu krie mota, terhümiavi se hako mhatho haha chüshü

²⁰Joab siezeu Abishai, mia Serko donu krütau, puo ngou pie di mia kriese perhie di uko geiwa, di puo za chüpie mia Seko salie.

²¹Puoe mia Serko donu kemeyietho-u, di puo uko krütau chü; derei puo mia Seko tuoi mo.

²²Benaia, Kabzil Jehoiada nuou rei kethepfu puo, mhakezha chükeshü puo; puo Moabmia nhachü kekhrieko tuoicü kenie dukhriwa. Pekrie krükecü puo nhie rei puo tsu thekre puo nu losha puo dukhrilie.

²³Puo Ijiptmia kezhakecha thu pengoukecü puo dukhrilie. Ijipt-u puo dzie nu rüngou pfhekedomia dzükrie pie puo geikegou co-u tuoicü puo pie tuo, derei Benaia kethe puo se puo ki ke di Ijipt-u dzie nunu puongouu selie di süu ngou pie puo geiwa.

²⁴Hako Jehoiada nuou Benaia mhatho, di puo kekuo seko sakemo puo za kralie.

²⁵Puo mia Serko donu zayie puo chü, derei mia Seko kro-u chü mo David-e puo bu puo kepfheko kezhau chü.

²⁶Puo chüpahiko donu terhümiaviko: Joab siezeu Asahel, Bethlehemmia Dodo nuou Elhanan,

²⁷Harodmia Shamoth, Pelonmia Helez,

²⁸Tekoamia Ikesh nuou Ira, Anathmia Abiezer,

²⁹Hushatmia Sibekai, Ahohitmia Ilai,

³⁰Netofamia Maharai, Netofamia Bana nuou Heled,

³¹Benjamin yiemia Gilid-u Ribai nuou Ithai, Pirathon-u Benaia,

³²Gash rücü khie kelhoumia Hurai, Arbatmia Abiel,

³³Baharum-u Asmavath, Shalbonmia Eliahba,

³⁴Gizonmia Hashem, Hararmia Shagi nuou Jonathan,

³⁵Hararmia Sakar nuou Ahiam, Ur nuou Elifal

³⁶Mekeratmia Hefer, Pelonmia Ahija,

³⁷Karmelmia Hezro, Ezbaimia nuou Narai,

³⁸Nathan siezeu Joel, Hagri nuou Mibhar,

³⁹Ammonmia Zelek, Bersothmia Naharai; Zeruia nuou Joab rünyieko kepieu,

⁴⁰Ithritmia Ira, Ithritmia Gareb,

⁴¹Hitmia Uria, Ahlai nuou Zabad,

⁴²Reubenmia Shiza nuou Adina; Reubenmia krütau, mu puo ze di mia serko.

⁴³Maka nuou Hanan, mu Mithmia Joshafat,

⁴⁴Ashterathmia Uzia, Aroermia Hotham nuonuo Jeiel mu Shama,

⁴⁵Shimri nuou Jediael mu puo sieze Tizit-u Joha,

⁴⁶Mahavmia Eliel mu Elnam nuonie Jeribai mu Joshavia, mu Moabmia Ithma,

⁴⁷Eliel, Abed mu Mezobaimia Jasiel.