Read Angami Naga Seyiedze Kerieu 12 Bible Online

Seyiedze Kerieu 12 - Angami Naga bible

Seyiedze Kerieu 12

¹Themia hako David-e Ziklag nu Kish nunu Saul la kehouchülie suo keba ki puo ki vor, ukoe terhü nu puo khruokeshü terhümiavimia kekuoko donu ketuo kro puo.

²Ukoe theükepiemia mu pevipeza theü cielieya mu ketsie rei peyielieya; ukoe Benjaminmia, Saul chienuoko.

³Uko kezhau Ahiezer, süue sie Joash, kenienie Gibia-u Shema nuo, süsie rei Asmaveth nuo Jaziel mu Pelet, Beraka, Anathothmia Jehu,

⁴Gibeonmia Ishmaia, mia Serko donu uko terhümiavimia puo mu uko krütau; Jeremia[23], Jahaziel, Johanan, Gederamia Jozabad,

⁵Eluzai[24], Jerimoth, Bealia, Shemaria, Harufit-u Shefatia;

⁶Korahitmia Elkana, Ishia, Azarel, Joezer mu Jashobim;

⁷Gedormia, Jeroham nuo Joela mu Zebadia.

⁸David-e rayhanu razhüchü keya keviu nu keba ki Gad yiemia kro puo puo ki kevorkoe kuo mu terhü do si pevi, pezhü mu rüngou se si mu uko u zie losha zie tuoi siro merhüpie kijüthou gei chüzhieko mhie zo.

⁹Ezer-e krütau, kenieu Obadia, seu Eliab,

¹⁰diau Mishmana, pengouu Jeremia,

¹¹sorouu Attai, thenieu Eliel,

¹²thethau Johanan, thepfüu Elzabad,

¹³ker-u Jeremia, kerepuokrüu Makbanai.

¹⁴Gad yiemia hako chüpahi mhokezhamia, kecükoe mia krie puo mho mu kezhakoe mia nyie puo mho tuoya.

¹⁵Themia hakoe thekhrü kerieu nu Jordan krupie puo khie lutsahatsa vupfü kezhüko zo rei ciepra di themia razhanu kelhouko whuopie niathutsa mu niakratsa shükewako.

¹⁶Benjamin mu Juda yiemia kro puo rei David razhüchü keviu nu vor.

¹⁷Sitse David-e uko ze kesetuoü pra di uko ki, “Nie a ze khriethotuoü mu a khruohituoü di vor ro a noue nieko ze puo chü zotuo, derei mhanuü a dzie mha kesuo chü mo zorei nie a tepie a ngumvümia dzienu keshü le kevor sie u pfutsanuoko Kepenuopfü bu nieko ca chücie” sita.

¹⁸Sitse ruopfü Amasamia Serko krütau gei vorlie di pukecü, “Hieko sü n vie zo, he-i David; mu n kitsa zo; he-i Jese nuou! Nouneu, nouneu bu n gei balie, Mu nouneu bu n kekhruohiko gei baliecie! N Kepenuopfü thuo n khruohituo zocü la” sita. Sitse David uko zelie di uko chüpie puo chüpahi mho kezha chülie.

¹⁹David-e Filistinko ze di Saul petsou kevor ki Manasseh themia kro puo puo kitsa la vorta. (Sizoürei puo uko khruohishü mo, kekreilamonyü Filistinmia kezhakoe kerüchü di sie, “Puoe u tsüko pie puoma chü di puo thuo ta puo niepuu Saul ki votatuo mu!” isi di puo ketsewata.)

²⁰Puoe Ziklag nu kevor ki Manasseh themia hako ta puo kitsa vota Adna, Jozabad, Jediael, Mikael, Jozabad Elihu, mu Zilethai, Manasseh yie nu mia nyie mho kezhako.

²¹Ukoe David yapie di miavie bielietuoü kevorko perhie[25], kekreilamonyü uko pete rei terhümiavimia mu chüpahimho kezhamia phre.

²²Teisonhie themiako David khruohituoü vorürü zotha kenuotsa krodi kezha puo, Ukepenuopfü Chüpahi kro puo mhielieta.

²³Themia hakoe David Hebron nu keba ki rünyie kese chüpahi kro kekreikrei di Jihova die nu pupie kezhü tuoi Saul kedi liepie tsüwaketuo la vor.

²⁴Sidi Juda themia rünyie kese pezhü mu rüngou kepie mia nyie sorou di krie thetha.

²⁵Simeon nuoko donu terhümiavi kekuo mia nyie thenie krie di krie puo.

²⁶Levi nuonuoko donu mia nyie dia di krie sorou.

²⁷Jehoiadae, Aron kinuko kezhau, mu puo sa di mia nyie se di krie thenie,

²⁸Zadok, khriesa terhümiavi puo, mu puo thuo puo pfutsanuoko yie nunu mia kekhakecü mia mepfüekenie sa.

²⁹Benjaminmia, Saul kiünuoko, mia nyie se, uko donu kekratsa hamhodzü Saul kitsa tha vor.

³⁰Efraimko mia nyie mepfü di krie thetha, u krü kinu zayie chükevor terhümiavi kekuo kro puo.

³¹Tietsa puo Manasseh yiemia mia nyie kerethetha David bu kedi chüketuo la uko za kie zoshü di uko bu vor.

³²Isakar yiemia mhatho siyakezha, Israel kedipuo chüshü shicüko sishüketuo kezhamia krie kenie, mu uko khroketuo u thinuomia pete.

³³Zebulun themia terhü chü mezhie vorketa mia nyie hiepengou, terhü chüketuo rünyie pete se dojü kepfü David khruohiketuo rübei le zokecü kro puo.

³⁴Naftaliko chüpahi kezhamia mia nyie puo, pezhü mu rüngou kepie mia nyie serethenie uko zetuo.

³⁵Danko nyie mepfüethetha di krie sorou terhü la dojüpfü tuo.

³⁶Asherko terhü chü si sekecü mia nyie hiedia dojü pfütuo.

³⁷Reubenko Gadko mu Manasseh yie tietsapuo Jordan lutsa khienu kevormia nyie krie puo di mepfü terhünyie se tsei zo.

³⁸Terhü themia hako pete terhü chüketuo rhiu se di David bu Israel pete mho kedi kechü le di Hebron nu vor.

³⁹Uko zha se David ze ba di u siezedzürieko mha kesekeshüko cüükrielie.

⁴⁰Siro uko zanuomia vo Isakar, Zebulun mu Naftali nu ketuoko rei gadako utko mu mithuko geinu theca kekra, chiedesi, khubesi phroko, khubezu, tier, mithu mu tekuoko pfü vorshü. Israel nu kenei kezha puo bacü la.