Read Angami Naga Seyiedze Kerieu 13 Bible Online

Seyiedze Kerieu 13 - Angami Naga bible

Seyiedze Kerieu 13

¹David-e nyie mho mu krie mho kezhako mia puo puo ze kevasilie.

²Siro David Israelmia kehou peteko ki pukecü, “Nieko mhodzü ki vi üro, mu Jihova uko Kepenuopfü medo tuo liro, uko mia ketsepie u siezedzüriemia Israel kijü pete nu ketuoko, zievoko mu Leviko nhanu keba nadiko nu kebako ki shü di uko bu vor úko kezelie khe.

³Sidi uko Kepenuopfü dietseidiekho bouu se la u ki vorta khe, uko Saul teiki süu se vorlie moketa la” sishü.

⁴Kehouu pete süu chücü u medolie, kekreilamonyü themia pete süu chüketuo u nei phreketa la.

⁵Süla David-e Israel pete Ijipt mu Shihor nunu vo Lebo-hamath ketso themia pfhükengulie, Kiriat-jearim nunu Kepenuopfü dietseidiekho bouu se vorketuo la.

⁶Siro David mu Israelmia pete Kepenuopfü, Jihova dietseidiekho bouu Cherubnie gei kebau, puo za se di kiekelieu, se la vor ketuo la Juda vie nu keba Kiriat-jearim nu Bala nu kho.

⁷Ukoe Abinadab ki nunu dietseidiekho bouu gari kesa puo geinu pfülie, gari kesenie Uza mu Ahio.[26]

⁸David mu Israelko u kekuo pete se di Kepenuopfü mhodzünu tsalichü, übou pe, tambourin kepfhü, merenyi khou kejo, mu ketsükhou di u dowhuo phi.

⁹Siro uko Kidon shie nu vorlie tse, mithu-ue dietseidiekhou bouu pfükenie pelashütuoüketa la Uza puo dzie chase pra süu memhilietuoü sie.

¹⁰Süki Jihova Uza gei puo nei mota, sidi puo puo dzie yhapie dietseidiekho bouu kebie la puo vüshü mu puo süki nu Kepenuopfü mhodzünu siazhüta.

¹¹Jihova Uza perhieketa la David-e puo neimota; süla thechü süu üse Perez-uza[27] üdi thie ketso kie vor.

¹²Sünhie David Kepenuopfü prei di sie, “A kimhie di Kepenuopfü dietseidiekhou bouu se a ki vorlie ta?” sita.

¹³Süla David-e dietseidiekho bouu se kinu David nadi nu vor mota, sidi puoe süu sounu se Gitmia Obed-edom kinu khapie bawa.

¹⁴Siro Kepenuopfü dietseidiekho bouu khrü se pie Obed-edon kinu ba, mu Jihova japie Obed-edon mu puo vie peteko gei shü.