Read Angami Naga Seyiedze Kerieu 15 Bible Online

Seyiedze Kerieu 15 - Angami Naga bible

Seyiedze Kerieu 15

¹David-e puo thuo puo la David nadiu nunu ki chülie; mu puoe Kepenuopfü dietseidiekhobouu khapie baketuo la thechü keselie di pfheki pethoulie.

²Sitse David-e Levi kemomia puo rei bu Kepenuopfü dietseidiekhoubouu pie lho üdi pu, Jihovae uko bu dietseidiekhoubouu pie mu süu liethoko chü sei zotuoükecü uko kedakelie la.

³Sitse David-e puo thechü kesepie keba chüu nu Jihova dietseidiekho bouu se vor ketuo la Israelmia pete kiekengupie Jerusalem nu shülie.

⁴Siro David Aron nuoyieko mu Leviko kengulie.

⁵Kohat nuonuo thepfuko; krütau Uriel mu puo siezedzürieko mia krie puo di mepfü;

⁶Merari nuonuoko; krütau Asaia mu puo siezedzürieko mia krie kenie di mepfü;

⁷Gershom nuonuoko, kezhau Joel mu puo siezedzürieko sa di mia krie puo di ser.

⁸Eliazafan nuonuoko, krütau Shemaia mu puo siezedzürieko sa di mia krie kenie,

⁹Hebron nuonuoko, krütau Eliel mu puo siezedzürieko sa mia hiethetha;

¹⁰Uziel nuonuoko, krütau Aminadab mu puo siezedzürieko sa mia krie puo di kerekenie.

¹¹Siro David-e zievo nie Zadok mu Abiathar, tsiu Leviko Uriel, Asaia, Joel, Shamaia, Eliel mu Aminadab hako kiekengulie.

¹²Puo uko ki, “Nieko ha Leviko kekreiko donu kezhako zo; nie thuo nie rei mu nie siezedzürieko chü kemesalie, nieko bu a puo la thechü puo kesepie keba nu Jihova, Israel Kepenuopfü dietseidiekhobouu se vor khashülieketuo la.

¹³Kekreilamonyü nieko kerieu va süu toupielie mota, süla Jihova uko Kepenuopfü uko gei puo nei mote, uko puo pfhü perielie moketa la” sishü.

¹⁴Süla zievoko mu Leviko Jihova, Israelko Kepenuopfü dietseidiekhobouu se vorlietuoü u thuo u chü kemesalie.

¹⁵Sidi Jihova Mosa ki pukeshü mhiei, Leviko u bouka geinu seipie Kepenuopfü dietseidiekhobouu pie vor.

¹⁶Süsie rei David-e Levimia krütako bu u siezedzürie tsalikechümia kedapie tsalikechü nyako, übou, nyarübou mu merenyikhou se u kenei pfhe chü petolie nushü.

¹⁷Süla Leviko Joel nuou Heman mu puo siezedzüriemia Berekia nuou Asaf, Merari nuonuoko, u siezedzürieko Kushaia nuou Ethan kedalie.

¹⁸Süsie vakenieu nu u siezedzürie kedakeshü hako: Zekaria, Jaziel, Shemiramoth, Jehiel, Unni, Eliab, Benaia, Maaseia, Matithia, Elifelehu mu Mikneia, siro care kepfheu Obed-edom mu Jeiel.

¹⁹Tsali kechüko Heman, Asaf mu Ethan hako bu Merenyikhou kekreiketuo

²⁰Zakaria, Aziel, Shemiramoth, Jehiel, Unni, Eliab, Maaseia mu Benaia hako Alamoth tuoi di übou khoutuo.

²¹Derei Matithia, Elifelehu, Mikneia, Obed-edom, Jeiel mu Azazia hako Sheminith übou tuoi di khoutuo.

²²Kenania, Leviko tsali krütau, tsali siyakezha la puo bu tsali kechü krütau chütuo.

²³Berekia mu Elkana dietseidiekho bouu la care kepfhe chütuo.

²⁴Shebania, Joshafat, Nethanel, Amasai, Zekaria, Benaia, mu Eliezer, zievoko bu Kepenuopfü dietseidiekho bouu mhodzünu nu ketsü khoushütuo. Obed-edom mu Jehia unie bu dietseidiekhobou careu pfhetuo.

²⁵Süla David mu Israel pehüko, mu nyie mhokezhako u nei phi di Obed-edom kinu Jihova dietseidiekhobou se vortuoü di tuoshü.

²⁶Siro Kepenuopfüe Leviko Jihova dietseidiekhobou toupieketuo khruohikeshü la uko thudo thenie mu tekuo chü thenie pie ruosuo chüshü.

²⁷Siro linen kemesepfhe David bu selie, mu dietseidiekhobouu kepie Leviko rei sümhie phre, tsalikechüko krütau Kenania rei si zo, siro David-e puo boulie mhonu zievoko kese linenpfhe puo rei sa se.

²⁸Israel pete shiekhoui, chükia mu ketsü siro merenyikhouko mu übouko se di Jihova dietseidiekhobou se vorlie.

²⁹Sidi Jihova dietseidiekhobou se David nadi nu shükelie ki Saul nuopfü Mikal khirki nunu mha mehoshü ru kediu David-e puo keneipfü rülhou mu puo dowhuo keba ngu, sitse süpfü puo nou nu David rütseta.