Read Angami Naga Seyiedze Kerieu 16 Bible Online

Seyiedze Kerieu 16 - Angami Naga bible

Seyiedze Kerieu 16

¹Sidi uko Kepenuopfü dietseidiekhoubouu se vor di David-e süu la pfheki puo chüpie kebau nu khashülie, süsie uko kethe ruosuo mu vitho ruosuo chüpie Kepenuopfü mhodzü shü.

²Siro David-e kethe ruosuo mu vitho ruosuou khashükewa sie, puoe Jihova za nunu japie themiako tsü,

³Sidi Israel pete, thepfumia mu thenumia rei miapuo puo ki niekhrüda da puo, themuo khrie puo mu khube kro puo puo kezashü.

⁴Sizomonyü puoe Leviko huo bu Jihova dietseidiekhobouu mhodzünu chalie chüketuo kedalie, Jihova Israel Kepenuopfü ki cha, thezie mu tsheketuo la.

⁵Krütau Asaf puo siesoko Zakaria, Jeiel, Shemiramoth, Jehiel, Matithia, Eliab, Benaia, Obed-edom mu Jeiel, hako bu übou puo rhükechüko se, Asaf-e merenyikhou kekreiketuo la,

⁶mu zievo Banaia mu Jahaziel unie bu Kepenuopfü dietseidiekhobouu mhodzünu ketsükhou sei-i zoketuo chülie.

⁷Sünhie David-e Asaf mu puo siezedzürieko bu ketshe tsali chüpie Jihova ki shüketuo keda kerietho chülie.

⁸He-i Jihova thezielie, puo za kiekelie themia donu puo mhathoko pesishülie.

⁹Puo ki kelishülie, ketshe tsali chü puo kishülie, puo mhatho u ngocüko pie pete ki pushülie.

¹⁰Puo za kemesau chüpezhalie; Jihova pfhüyakezhako nou bu u neiliecie.

¹¹Jihova mu puo kekuo pfhülie, puo ba zokecüu pfhü sei zolie.

¹²Puo ungotho chükeshü rükrashülie, puo ungomhatho chükeshü, mu puo mha pepikeshü dieko.

¹³Harie puo kituou Israel yiemiako, Jakob nuonuoko, puoe kedakelieko.

¹⁴Puoe Jihova úko Kepenuopfü, puo mha pepikeshüko kijü pete nu tuo.

¹⁵Puo dietseidiekho-u kechachie rükra tuolie, puo die khakeshüko, thephou nyie puo la khashüwaketako.

¹⁶Puo Abraham ze diekhokelie, Isak ki rüse di phrakeshüu,

¹⁷thezho puo tuoi di Jakob ki phrakeshü, Israel ze kechachie kediekhokelie chü di,

¹⁸pukeshü, “A Kanan kijü khapie nie tsütuo, nie bu kayie nie vie chütuoü di” si.

¹⁹Uko themia ketsa ki mhatho mo, sidi kijüu nu solhimia rei chü,

²⁰rühou seyie puo nunu kekrei puo nu vo, kedirüvie puo nunu kekrei puo ki vo,

²¹Puo mia puo bu rei uko pese mo; uko la puoe kediko rei kerhiewa di

²²pukecü, “A kedakelieko bie hie zocie, a siedzekesiko pese hie” si.

²³Jihova ki kelishücie, kijü peteu. Teisonhie puo kelakelie dze pucie,

²⁴Seyieko donu puo zapuzayie pushülie, themia pete ki puo mhatho u ngocüko pesishülie.

²⁵Jihova sü zha zocü la, mu puo tshe phi zhü zo; terhuoko pete kirei puo rhu kreikuocü mese.

²⁶Themia rhuoko sü terhuo miarhi zocü la, derei Jihova teiko chüshü.

²⁷Therhu mu kezha sü puo mhodzü ba; kekuo mu kenei sü puo chü nu baya.

²⁸Harie themia kikruko, Jihova ki pushülie; zapuzayie mu kekuo pie Jihova tsücie.

²⁹Jihova bu zayie ngulie kezhü pie tsüshülie; ruosuo se puo mhodzünu vorlie. Mesa di puo rüsuorüsulie;

³⁰kijü pete, puo mhodzünu pe zocie. Kijüu chü kemeteiliete; süu mhakipuo rei rünieta lho.

³¹Teiko bu u neilie, mu kijüu bu puo neilie, mu uko bu seyieko donu, “Jihovae kediu” ikecü pulie.

³²Dzükezhau mu mha puonu tshupfüketuoko bu ruoshülie; lieu mu mha puo nu keba pete bu u neiliecie.

³³Sitse ketsa nu seiboko rei u nei di, Jihova mhodzünu chielituo, puo kijüu ketsotuoü vorketa la.

³⁴He-i Jihova thezieliecie, puoe vicü la; puo ketseikevi-e kechachie baya.

³⁵Pu sashülie: “Hie kelashücie, he-i kelakelie Kepenuopfü, sidi seyieko donu hie pfhü kengulie mu hie kelaliecie, siro hie n za kemesau tshelietuo, mu n ketshe nu hie neilieketuo la.

³⁶Jihova, Israel Kepenuopfü bu thejakepfüu chücie, kechachie nu kechachie ketso” sishü. Sitse themia peteko “Amen” idi Jihova tshelie.

³⁷Sitse David-e Asaf mu puo siezedzürieko bu Jihova dietseidiekhobou mhodzünu teisonhie chalie chü morokesuoko chü sei balienushüwa.

³⁸Sükosü Obed-edom mu puo siezedzüriemia hiesorouethetha sa; Jeduthun nuou Obed-edom mu Hosa bu carekepfhe chütuoüta.

³⁹Siro puoe zievo Zadok mu puo siezedzürie zievoko bu Gibeon nu Jihova pfhekiu nu thechü kerükrieu nu dietseidiekhobouu mhodzünu chalie chütuoüshü,

⁴⁰Teisoduü mu teizeimetsei kethe ruosuo chüpie ruosuobau gei Jihova mhodzünu, Jihova Israelko ki diekhakeshü kemhie di chü tseiketuo la.

⁴¹Unie sakecü Heman mu Jeduthun, siro Jihova kekhrie rüdi mo di kechachie bayakezha la puo thezieketuo la u za pu zo di kedakelieko sa.

⁴²Heman mu Jeduthun-e tsaliko la ketsüko mu merenyikhou kekreiyakezhako se mu kemesa tsali ze chüketuoko übouko se. Jeduthun nuonuoko bu care kepfhe chüketuo la keda shüwa.

⁴³Süsie themia pete u thuo u kinu vota, mu David rei puo kikruu gei jashütuoü di puo kinu vota.