Read Angami Naga Seyiedze Kerieu 17 Bible Online

Seyiedze Kerieu 17 - Angami Naga bible

Seyiedze Kerieu 17

¹David-e puo kinu lhou keba ki, David-e Nathan siedzekesiu ki, “A we sedar pie kechü ki nu lhou ba, derei Jihova dietseidiekhobouu pfheki khro ba zo” sita.

²Sitse Nathan sie David ki, “Kepenuopfü n ze ketuo la no lekeba pete chüliecie” sita.

³Derei süzhü Jihova die Nathan ki vor di sie:

⁴Vo di n kituou David ki pushülie; Jihova hakemhie puya: N bu a baketuo ki chülie lho.

⁵Ae Israel ze parcü nhie nu vor thie ketso kinu ba mo zoluo, derei pfheki puo nu mu pru puo nu tuo zo.[30]

⁶A Israel pete ze di rüyie ketuo ki, Israel capiko, a uko bu a themiako kepfhe chünukeshüko ki, Nieko kiüdi sedar sei se ki puo chüshü a tsü mo ga icü pu me?

⁷Süla tsie no a kituou David ki pushücie: Krodiko Jihova hakemhie puya; No nha nu tekuoko siemedziketuo nunu a n zeliete, n bu a themia Israel mho kezhachüketuo la,

⁸mu a n kevora n ze tuoya zo. Mu n mhodzünu n ngumvümiako biewa, mu a n za chüpie kijünu kezhamiako za tuoikecü chüshütuo.

⁹A themia Israel la thechü puo keseshütuo, uko pelhoushütuo uko bu u thuo u chü nu lhoulieketuo la, mia bu uko keyhu la salie lhote; hadzütuoi di kesuokechümia bu uko pelha salie lhote,

¹⁰a themia Israelko capi kro puo kedakelie tei yawinu, a nie ngumvüko pete penyüwatuo. Sizomonyü Jihova ki puo chü n tsüshütuoü kecü a n kipushüzhie.

¹¹N zhako tseilie di n puonuoko ki votaketuo ki, n sie n nuo puo piesiershütuo, n nuo thepfuko mia puo, sidi puo kedi pesie sedeshütuo.

¹²Puo bu ki puo chü a tsütuo, mu a puo kedibau bu kechachie balieketuo chüshütuo.

¹³A puo puou chütuo, mu puo a nuo chütuo. A a kekhrie rüdikemo-u puo geinu setalie lho, n mhodzü kevor-u geinu süu seketa tuoi,

¹⁴derei a puo bu a kinu mu a kedi nunu puo kedibau chü kemetei sebaketuo chüshütuo.

¹⁵Die pete mu ziemho pete ngukelie mhie di Nathan-e David ki pushü.

¹⁶Sitse kediu David le Jihova mhodzünu balie di sie, “He-i Kepenuopfü Jihova, A supuoü mu a kiu kedipuoü di no hathechiepuo a ze vorshü ga?

¹⁷N mhiki we haha rei mha kevi puo zo, harie Kepenuopfü; no n kituou ki thiesietho chü vorketuo dze rei pushü. No a üse themia kezhamia puocü mhieshüte, he-i Kepenuopfü Jihova!

¹⁸David sü no n kituou rhukeshü la n ki kedipuo pu salie ta? No sü n kituou si baze ru.

¹⁹He-i Jihova, n kituou lanu n thuo n noukele mhie di mhakezha hako chüshü mu mhakezha hako pesishüte.

²⁰Mia puorei n mhie mo, he-i Jihova, mu n sie Kepenuopfü kekrei puorei tuo mo, hie thuo hie nyie pie sikelie zo we.

²¹Seyie krü kicü puo nie n themia Israel tuoi di, Kepenuopfü thuo pie puo themia chütuoü di rhakelie, mhakezha mu kemeriecüko chüshü mu n themiako mhodzünu nu mia seyieko whuowa di Ijipt nunu n kelashü ga?

²²Sidi noe Israel bu kechachie n themia chü tuote mu no he-i Jihova, n thuo uko Kepenuopfü chüte.

²³“Mu tsie, he-i Jihova, no n kituou mu puo kiu dze pukeshü dieu bu ba seilie, mu no phrakeshü mhie chülie thienyü.

²⁴Siliero n za bu kechachie tuolie mu chü pezhalietuo di sie, ‘Krodiko Jihova Israel Kepenuopfü sü Israel Kepenuopfü zo’ ituotatuo; mu n kituou David kiu bu n mhodzü ki chüpie balietuo.

²⁵No, a Kepenuopfü, n thuo ki puo n kituou la chüshütuoü di pesishüte; süla n kituou rei n mhodzünu puo mezhiemelotuoü lie kevichüliete.

²⁶Mu tsie, he-i Jihova, no sü Kepenuopfü zo, sidi no mha kevi hau se n kituou ki shüketuo puwate,

²⁷Süla no japie n kituou kiu tsüshüketuo n neilie thienyü, süu bu n mhodzüki tuo zolieyi; he-i Jihova, no jashüte mu kechachie la thejapfüte[31].”