Read Angami Naga Seyiedze Kerieu 18 Bible Online

Seyiedze Kerieu 18 - Angami Naga bible

Seyiedze Kerieu 18

¹Puotei huo sie David-e Filistinko perhie di uko penyüwa; puoe Filistinko dzie nunu Gath mu puo rünako lielie.

²Siro puo Moab penyülie, mu Moab-e David khrotuota di khezhanuo pie puo tsüta.

³David-e Zoba kediu Hadadezer Hamathtsatie kebau rei penyüwa; puo Efrat rükhie nu tsiese puo setuoü kevo ki.

⁴Sidi David puo ki nu gura gari nyie puo, gura kese mia nyie thenie mu pephi chüpahi mia nyie mepfü zelie; siro David-e gari kese gurako phika zawa, derei gura gari krie puo la we lashü.

⁵Damaska nunu Siriamia Zoba kediu Hadadezer yapietuoü vor tse David Siriamia nyie mepfüekenie dukhriwa.

⁶Sitse David-e chüpahimia bu Damaska Siria nu bata, sitse Siriamia David theke chüta di khezhanuo se vor. Jihovae David kevo kheko nu kuokelie se puo tsü.

⁷Siro David-e Hadadezer kituoko pieketuo suna pezhüko lielie di süko se Jerusalem nu vota.

⁸Tibath mu Kun, Hadadezer nadiko nunu David-e merenyi ngu philie; süko se di Solomon-e merenyi dzükezha mu ki coko mu mhakhouko chü.

⁹Hamath nu kediu Tou-e David Hadadezer, Zoba kediu penyüwaketa silie tse,

¹⁰puo nuou Hadoram ketsepie kediu David kishü, puo Hadadezer ze kegei di puo penyükelie la puo bu puo kelu mu kenei pesishütuoü di. Siro Hadadezer-e Tou ze terhü chü kuo phi. Sidi puo suna rakachü mu thegiko se mhanya chükelie neiüko ketseshü.

¹¹Mha hako mu puo seyie kekreiko kinu ngukelie Edom, Moab, Amorko, Filistinko mu Amelek kinu rakachü mu suna ngukelieko chükemesapie Jihova tsü.

¹²Süsie Zeruia nuou Abishai Metsie Razhau nu Edomko mia nyie kerethetha geilie.

¹³Sidi puo chüpahi khapie Edom nu bata, mu Edom-e mia pete David theke chüta, Siro Jihovae David kevo kheko nu kuokelie khashü.

¹⁴Süla David-e Israel pete mho dilie, mu puoe kedietho mu ketou se di puo themia pete kekha.

¹⁵Siro Zeruia nuou Joab rüpfhünuo mho kezha chü; Ahilud nuou Jehoshafat mhadze kethuu;

¹⁶Ahitub nuou Zadok mu Abiathar nuou Ahimelek zievo chü; mu Shavsha kethuu;

¹⁷Jehoiada nuou Benaia-e Keretko mu Peletko mho kekha, mu David nuonuoko kediu lietho nu mhakezha keseko chü.