Read Angami Naga Seyiedze Kerieu 19 Bible Online

Seyiedze Kerieu 19 - Angami Naga bible

Seyiedze Kerieu 19

¹Pecha mo di Ammonko kediu Nahash siata, mu puo nuou puo sou nu kedi chüta.

²Sitse David sie, “A Nahash nuou Hanun gei dietho tuo, puopuoe a gei dietho vorcü la” si. Süla David-e puo puo la puo nou thu peluotuoü di dieliemia ketseshü. David liethoko Amon kijü nu Hanun ki puo nou thu peluotuoü di vor.

³Sitse Ammon nu kezhako sie Hanun ki, “David-e n nou thupeluoketuo kro puo ketsekeshü ha n puo rhutuoücü la ba me? Puo liethoko ha n ki vorkecü mhapfhü, mu kijü rieshü di lielietuoü vor moü me?” ita.

⁴Süla Hanun-e David kituoko khalie, uko tiemie thiewa, uko pfhenei u likhei nunu dawa, sidi uko ketsewa;

⁵sitse uko tuota. Themiako dze David ki pukeshü ki puoe dieliemia ketsepie uko ki shü, uko bie kethenga phi chüketa la. Sitse kediue sie, “Nieko tiemieko the lalie kemochie Jeriko nu batalie, süsie nu la vorlie” sishü.

⁶Ammonkoe David mhodzü uko thuo uko chüpie puotou mowaketa ngulie tse, Hanun mu Ammonkoe Mesopotami-a, Aram-maka mu Zoba nunu gura mu gari nyietuoü rakachü talent nyie puo ketseshü.

⁷Ukoe gura gari nyie serekenie nyielie, mu kediu Maka mu puo chüpahi sa, süko vor Medeba nu razhüchü balie. Siro Ammonko u nadiko nunu kepfhü phrelie di kegeituoü vorlie.

⁸David süu sikelie ki, Joab mu terhümiavimia pete ketseshü.

⁹Sitse Ammonko nadiu kharu khieki nu terhü chüketuo dojülie, mu kedimia vorcüko we u thuo kijü kemeyako nu tuo.

¹⁰Joab-e terhüu puo mhodzütsa mu puo sietsa nu puo rü baketa ngu tse, puo Israelmia keviko kedalie di uko bu Siriako petsou thalie,

¹¹puo siezeu Abishai bu puo chüpahi kekreiko krütau chülie, di uko bu Ammonko petsou thalie.

¹²Sitse puo sie, “Mhanuü Siriako a ki kuothorta liro no a khruohilie, süsie Ammonko nie ki kuothorta ro a n khruohituo.

¹³Thepfu zolie, mu u themiako mu uko Kepenuopfü nadiko la thepfumia zhako chüshülie khe, sidi Jihova bu puo mhodzü ki viükecüu chüshüliecie” sishü.

¹⁴Süla Joab mu themia puo zeketuokoe keze di kegeituoü Siriako mhodzünu phir, sitse uko puo mhodzünu nu tata.

¹⁵Süsie Ammonko Siriako taketa ngu tse, uko rei Joab siezeu Abishai mhodzünu nu tata, sidi nadi nu leta. Süsie Joab-e Jerusalem nu vorta.

¹⁶Derei Siriako Israelko bu u penyüwaketa ngulie tse, uko dieliemia ketseshü di Siriamia Eufrat khie lutsa ketuoko ze vorlie. Hadadezer chüpahiko kezhau Shofak bu uko krütau chü tsu.

¹⁷Süu pie David ki pushü ru, Israel pete pfhükengulie, di Jordan ciepra di uko ki vor, mu puo themiako bu luko petsou thalie. David Siriako ze kegeituoü vor tse, uko puo ze kegei.

¹⁸Siro Siriako Israel mhodzü tata, mu David Siriamia gura gari kese mia nyie thenie, u phi seketuo chüpahi mia nyie hiedia geilie, puo chüpahiko kezhau Shofak rei dukhriwa.

¹⁹Hadadezer kituoko Israel uko penyükewa ngu tse uko David ze vitho chüwa, di puo khro leta. Süla Siriako Ammonko khruohi sa nyü mota.