Read Angami Naga Seyiedze Kerieu 21 Bible Online

Seyiedze Kerieu 21 - Angami Naga bible

Seyiedze Kerieu 21

¹Satan Israel ngumvü di David meshüpie puo bu Israel phrütuoüta.

²Süla David-e Joab mu chüpahi kezhako ki, “Vo di Israel Beersheba nunu Dan ketso themia phrüshülie, sidi süko mia kitsuo ba shi se vor a pesishücie” ita.

³Derei Joab sie, “Jihova bu themia kitsuo ba shi süde krie puo rei sashü tsü thienyü, a niepuu kediu mu süko pete a niepuu liethomia zo moü me? kiüdi a niepuu mha hau cha bate shi? Kiüdi a niepuu puo kejo se vor Israel gei shütuoüte shi?”

⁴Derei kediu die Joab ki kuolieta, süla Joab tuota di Israel pete donu voshü, sidi Jerusalem nu la vor.

⁵Sidi Joab themia phrükelie pie David pesishü. Israel pete nu mia Lakh kerepuo zhiecha selie kevi ba, Juda nu mia Lakh dia di nyie hiethenie zhiecha selie kevi ba.

⁶Derei kediu dieu Joab mhodzüki puo neikemo puocü la puo Levi mu Benjamin we phrüshü mo.

⁷Derei mha hau Kepenuopfü neikemo puo, süla puo Israel vüshü.

⁸Sitse David sie Kepenuopfü ki, “A mha hau chüwacü a phouma sewate. Derei tsie a n ki chayalie, n kituou kinu kejo-u chüwacie, a mhasi mo sewaketa la” sita.

⁹Siro Jihovae Gad David kepethau rüchü di sie,

¹⁰“Vo di David ki pushücie, ‘Jihova hakemhie puya: A mha se kha n tsüshüzhie; süko donu puo kedalie, a süu chüpie n tsütuo.’ ”

¹¹Süla Gad-e David ki vor di sie, “Jihova hakemhie kecü puya, ‘N medo-u lieliecie.

¹²Cie se pekriekecü tuo mo; morei n ngumvümia bu khrü se mhava di n ngumvümia zhiecha vo n tsoketau tuo mo, moro Jihova zhiechau bu zha se kijü gei bata di kijü gei thepe bata, mu Jihova dielieu bu Israel kijü rie pete nu peka vokewau tuo shi.’ Tsie pepilie di a bu die se la vo a ketsekeshüu ki pucie” sishü.

¹³Sitse David sie Gad ki, “A kemezhie sete, a bu Jihova dzie nu tetsutacie, puo ngukemezhie sü zha phi eru, derei a bu themia dzie nu we tetsuta hiecü mu” sita.

¹⁴Süla Jihova thepe puo ketsepie Israel gei shü, sidi sünu Israelmia nyie hiethenie krüta.

¹⁵Siro Kepenuopfü dielieu bu Jerusalem pekatuoü di ketseshü; derei puo süu pekatuoü kesieki Jihova ngu di mha kesuo süu nunu puo nou rüdita; di puo kepeka dielieu ki, “Si zota rei vite; n dzie kethelietacie,” sishü. Jihova dielieu Jebusmia Ornan shiechü kepenuo ki tha.

¹⁶David-e tosie Jihova dielieu tei mu kijü donu, tha mu puo dzie nu zhiecha puo zou se Jerusalem mho khashüzhücü ngu. Sitse David mu pehüko gakhropfhe dzie di tsu zerepfü zhüta.

¹⁷Sitse David sie Ukepenuopfü ki, “Themiako phrü nu di pukeshüu sü a zo mo me? phouma mu mha kesuo se chükeshü sü a zo. Derei tekuo hako we kedipuo chüwata ga? He-i Jihova, a n ki chaya, n dzie bu a gei mu a krü kiu gei liecie, derei thepeu bu n themiako gei hie zocie” ita.

¹⁸Süsie Jihova dielieue Gad ki David bu kho Jebusmia Ornan sie nu ruosuoba puo chüpie Jihova ki shü morokesuo pu nuta.

¹⁹Süla David-e Gad die ze di, puo Jihova za nunu pukeshü la khota.

²⁰Süki Ornan-e telha nyü ba; puo reipra dielieu ngu, mu puo nuo thepfumia dia puo ze kebako we rüshüta.

²¹Tsieu David Ornan ki vor, Ornan mehoshü ru David ngulie, sitse puo sie nunu parlie di puo zie zere kijü tsu di David kelushü.

²²Sitse David sie Ornan üse, “Shieu se a tsü di a bu sünunu Jihova la ruosuoba puo chücie, puo ma tseikecü nunu a tsücie, thepeu bu themiako kinu rüditaketuo la,” sishü.

²³Sitse Ornan sie David ki, “Lieliecie, sidi a niepuu kediu bu puo mhodzüki viücüu chülie harie kethe ruosuo la a thu rei khashütuo, mu telha kevü sei ha rei se sei chülie, mu telha rei se lhacülhale khakeshü ruosuo chüliecie, a pete khashüte” sita.

²⁴Derei kediu David sie Ornan ki, “Lhowe, puoma tsei di a khrü zotuowe, Jihova la a n vie lielie lho, morei a puoma chü mo zocü puo se kethe ruosuo chülie lho” sita.

²⁵Süla David-e kijü süu ma suna mesi nu shekel krie sorou pie Ornan tsü.

²⁶Siro David süki nu ruosuoba puo chüpie Jihova tsü di kethe ruosuo mu vitho ruosuo chüshü, sidi Jihova kieshü, mu puo teigei nu mi pie kethe ruosuoba gei shü di puo pfhekhoshü.

²⁷Süsie Jihova dielieu ki pushü, sitse puo zhiecha pie puo zhiesha nu shüwa.

²⁸Süki David-e Jihova Jebusmia Ornan shiechü nunu puo pfhekhokeshü ngu tse, puo sünunu, ruosuo puo chüshü.

²⁹Süteiki Jihova rüsuokiu, Mosa bu rayha nu chüshü, mu kethe ruosuobau Gibeon nu thechü kerükrieu gei ba zoluocü la;

³⁰derei David sünu vo di Kepenuopfü rüsalie kenjüta, puo Jihova dielieu zhiecha preiketa la.