Read Angami Naga Seyiedze Kerieu 22 Bible Online

Seyiedze Kerieu 22 - Angami Naga bible

Seyiedze Kerieu 22

¹Süsie David-e sie, “Hakiha Kepenuopfü Jihova kiu bu batuo mu hakinu Israel la kethe ruosuobau chütuo” sita.

²David-e solhimia Israel nu ketuoko kiekengulie, di ketsie bieyakezhako bu Kepenuopfü kiu la ketsie phro nu shüwa.

³Siro David-e kikhako, careko mu mha teshükema se baliekezhako chüketuo gojalko chütuoü di thegi kengu philie, merenyi rei mejü kekralie kelho pfhülie,

⁴mu sedar sei kinyie phrü hulie lhocü; Sidon mu Turmiako sedar se phi vor David tsükeshü la.

⁵David-e pucü, “A nuou Solomon sü medzü mu mhachü si mo zoluo mu Jihova la chüketuo kiu bu we zivithor zo morosuo, kijü pete nu zapuzayie chü zotuo; a süu la mha kesetuo” sita. Süla David-e puo se mhodzü mhanya kese phi se tuota.

⁶Süsie puo puo nuou Solomon kieshü di puo bu Jihova, Israel Kepenuopfü ki puo chü beituoüshü.

⁷Süsie David-e Solomon ki, “A nuo, a Jihova a Kepenuopfü za geinu ki puo chücü rhü tuote.

⁸Derei Jihova die a ki vor di sie, ‘No we thezie pekru phiwate mu terhü kezha chü phi eru, n bu a za geinu ki puo chülie lho ho, no kijü nu a mhodzüki nu thezie pekru phi zocü la.

⁹Harie, n nuo thepfumia puo penuolietuo; puoe kezekevi themia puo chütuo. A puokhie puomhouketuo ngumvüko kinunu kezekevi kha puo tsütuo, puo zae Solomon tuocü la, mu a puo teiki kezekevi mu tshüimhiekecü khapie Israel tsütuo.

¹⁰Puo bu a za la ki puo chütuowe, puo a nuo chütuo, mu a puo puo chütuo, mu a Israel nu puo kediba bu ba seiketuo chüshütuo’ si.

¹¹Süla a nuo Jihova bu n zetuolie, di Jihova n Kepenuopfü, puo thuo n dze pushüwaketa ki ze kiu chü toulie vi thienyü.

¹²Jihova bu kesikele mu mhasi se n tsü di, puo Israel pie n pelekeshü ki n bu Jihova n Kepenuopfü zho-u ze tuolie morosuo zo.

¹³Jihova Israel la Mosa ki khakeshü zhoko mu chünukeshüko ze menuo zolie ro no kruo sielietuo. Meteilie mu thepfulie, michie hie mu kechazieta hie.

¹⁴Chü re phi di a Jihova kiu la mha kesekelie, suna talent nyie krie puo, rakachü talent Lakh ker puo, tsiu merenyi mu thegi krapie mejü hulie kelho; sei kinyie mu ketsie rei a keseshüte. No mha pfhüpie hako salie morosuo.

¹⁵No mhakechümia ba phite; ketsie kephroko, ketsie mistiri, sei mistiri mu mhatho kekreikecü nu chükesiko phrü hulie kelho,

¹⁶suna, rakachü, merenyi mu thegi chükesiko ba phite. Tsie mhatho sedelie, mu Jihova n ze tuotuo” sishü.

¹⁷Siro David-e Israel krütako pete bu rei puo nuou Solomon khruohi nu diekhashü di sie,

¹⁸“Jihova nie Kepenuopfü nie ze tuo moü me? mu puo kezekevi khapie n khie pete nu shüshüta mo me? Puo kijüu nu themiako khapie n dzie nu shüte; sidi kijüu penyüpie Jihova mu puo themiako tsüshüte.

¹⁹Tsie we nie nou mu nie melou pie Jihova nie Kepenuopfü pfhülie, sie di Jihova Ukepenuopfü kemesa kiu chülie, sidi Jihova dietseidiekhobou-u mu Jihova hiekhouko se vor Jihova za la chükelie kiu nu khapie balieketuo la” sishü.