Read Angami Naga Seyiedze Kerieu 23 Bible Online

Seyiedze Kerieu 23 - Angami Naga bible

Seyiedze Kerieu 23

¹David tsata mu puo teisozhako tsei voketa ki puoe puo nuo Solomon bu Israel mho kedi chülie.

²David-e Israel krütako pete, siro zievoko mu Leviko kie kengulie.

³Leviko u kelhouzha cie ser mu sümhoko phrükelie pete kesa mia nyie serethetha.

⁴David-e sie, “Hako mia nyie mepfüedia bu Jihova kiu nu mhatho mezatuo, mia nyie sorou bu mhakezha kese mu capimiako chütuo,

⁵Care kepfheko mia nyiedia, mia nyiedia bu ae ketshe la chükelie übou khoupie Jihova tshekecü chütuo” sishü.

⁶Sidi David-e Levi nuonuoko keza pie za se chülie: Gershon[34], Kohat mu Merari.

⁷Gershon[35] nuonuokoe Ladan mu Shimei.

⁸Ladan nuonuoko: Kezhau Jehiel, Zetham mu Joel, mia se.

⁹Shimei nuonuoko: Shelomoth, Haziel mu Haran, mia se. Hako Ladan kikruko mu thekrüko.

¹⁰Siro Shimei nuonuoko: Jahath, Zina, Jeush mu Beria. Mia dia hakoha Shimei nuonuoko.

¹¹Kezhau Jahath mu kenieu Ziza; derei Jeush mu Beria unie nuonuo tsa, süla uko kesapie kikru puo chü phrüwa.

¹²Kohat nuonuoko: Amram, Izhar, Hebron mu Uziel, mia dia.

¹³Amram nuonuoko: Aron mu Mosa, Aron bu kemesathoko chüketuo la puo kelakreilie, süla puo mu puo nuonuoko bu Jihova mhodzünu mhakethengu thekeshü nuonuoko, mu puo za ketshe thoko chü sei zotuo.

¹⁴Derei Mosa, Kepenuopfü themiau nuonuoko zowe Levi yieko sa phrü.

¹⁵Mosa nuonuo Gershom mu Eliezer.

¹⁶Gershom nuonuoko: Krütau Shebuel.

¹⁷Eliezer nuonuoko: Krütau Rehabia, Eliezer-e puo nuo thepfumia jü, derei Rehabia nuonuo we kra phi.

¹⁸Izhar nuonuoko: Krütau Shelomith.

¹⁹Hebron nuonuoko: Krütau Jeria, mu Kenieu Amaria, seu Jahaziel mu diau Jekameam.

²⁰Uziel nuonuoko: Krütau Mika, mu kenieu Ishia.

²¹Merari nuonuoko: Mahli mu Mushi Mahli nuonuoko: Eliazar mu Kish.

²²Eliazar-e puo nuo thenumia sie thepfumia jü di siata, uko kinumia Kish nuonuo süpfüko lielie

²³Mushi nuonuoko: Mahli, Eder mu Jeremoth, mia se.

²⁴Hako Levi nuonuoko, u krünuo kiko nu thekrüko mia puopuo di phrükecü nu u kelhouzha cie mepfü mu sümhoko bu Jihova kiu nu lietho chüketuoko.

²⁵kekreilamonyü David-e sie, “Jihova, Israel Kepenuopfü kerülei khapie puo themiako tsüshüte; mu puo Jerusalem nu ba sei zotuo;

²⁶süla Leviko pfhekiu mu sünu mhatho la mhanyako ketakeyiekecü chü sa morei vite” sishü.

²⁷David diethelako ze di chükeshü nu Leviko kelhouzha cie mepfü mu sü mhoko pucü la.

²⁸“Derei uko bu Jihova kiu nu mhathoko la Aron nuonuoko khruohikecü pie u zha chütuo, kitie rei kibouko nu rei mesa ükecü vieko pete chü kemesakecü mu Jihova kiu nu mhatho kehoupuo la rei sa.

²⁹Kepekie niekhrüdau lhacülhale ruosuo kechü mu thou kevitho, khreiüshükemo niekhrüda; mha rielie di se ruosuo kechü, tier sa di se ruosuo kechü, mhakemejü mu kecükezha le di chükecü pete nu khruohituo.

³⁰Uko teisoduü tha di Jihova thezie mu puo tshetuo, thevatie rei sükemhietuo.

³¹Sabat nhie kethe ruosuo chüpie Jihova tsükecü ki, khrü kesaki, thenyi zhako, uko bu chülie morosuokecü die Jihova mhodzünu chü seituo.

³²Uko bu kehou la pfheki mu kemesabou kesetuo, mu uko siezedzürieko Aron nuonuoko Jihova kiu nu mha chükecüko nu uko mehotuo” sishü.