Read Angami Naga Seyiedze Kerieu 26 Bible Online

Seyiedze Kerieu 26 - Angami Naga bible

Seyiedze Kerieu 26

¹Care kepfheko kezakeshü hamhie; Korahitko, Asaf nuonuoko donu Kore nuou Meshelemia

²Meshelemia-e puo nuo thepfumia huo nyi, nuorieu Zekaria, kenieu Jediael, seu Zebadia, diau Jathniel.

³Pengou-u Elam, sorou-u Jehohanan, thenieu Eliehoenai.

⁴Siro Obed-edom-e puo nuo thepfumia nyi; nuorieu Shemaia, kenieu Jehozabad, seu Joah, diau Sakar, pengouu Nethanel,

⁵sorouu Amiel, thenieu Isakar, thethau Peulethai, Ukepenuopfüe japie puo tsükeshü la.

⁶Süsie puo nuou Shemaia rei puo nuo thepfumia lhoulie, mu uko mhachü philie kevi themiacü la uko krünuo kiko nu kezhachü.

⁷Shemaia nuonuoko: Othni, Refael, Obed mu Elzabad, uko siezemia rei mhachülie kevimia, Elihu mu Semakia.

⁸Hako pete, Obed-edom nuonuoko mu uko nuonuoko mu uko siezedzürieko sakecü lietho-u nu mhachülie keviko. Obed-edom themia mia hiesorouekenie.

⁹Meshelemia puo nuo thepfumia mu puo siezedzürie nyi, mhachülie keviko mia kerethetha.

¹⁰Hosa, Merari nuonuo geinu lhoukelieu, puo nuo thepfumia nyi: krütau Shimri (puoe nuorieu zo mo ürei puo puoe puo bu kezhau chü),

¹¹kenieu Hilkia, seu Tebalia, diau Zekaria: Hosa nuonuo thepfuko mu puo siezedzürie pete kesa mia kerese.

¹²Care kepfhe hakoha, uko donu kezhako rei Jihova kiu nu uko siezedzürieko kemhie u mhatho nyi phre.

¹³Uko kiko le di, kecü kezha kehoupuorei u careko la u za dapeshü di keda.

¹⁴Niathutsa zau Shelemia gei pfüta. Ukoe puo nuou Zekaria la rei theza khashü, puo do vi di mia tahitarholieya kezha puo, puo yau pesotsa,

¹⁵Obed-edom la pekhrotsa parlie, mu puo nuonuoko bu mhanya khapiekeba kiko mehoketuo ngulie.

¹⁶Siro Shupim mu Hosa unie la ro niakratsa parlie, cha puo khotayakecü Shaleketh kharuu nu. Care kepfhekoe puo thuo puo meseu nu pfhephre.

¹⁷Niathutsa la teisonhie Leviko mia sorou, pesotsa la teisonhie mia dia, pekhrotsa la teisonhie mia dia, mu mhanya khapiekeba kiu la mia kenienie;

¹⁸mu Parbar nu mia niakra keva tsatie mia dia mu Parbar nu mia kenie.

¹⁹Hako Korahit mu Merari nuonuoko donunu carekepfhe la kezashü.

²⁰Mu Leviko ro, Ahija bu Kepenuopfü kinu kinyibouko mu mhakhakeshü kinyiko keseu chü.

²¹Ladan nuonuoko, Ladan kitsa Gershon nuonuoko, Gershonmia Ladan kiko nu thekrüko donu: Jehieli.

²²Jehieli nuonuoko, Zetham mu puo siezeu Joel bu Jihova kiu nu kinyiko se.

²³Amramko, Izharko, Hebronko, mu Uzielko:

²⁴Mosa nuou Gershom nuou Shebuel bu kinyikese kezhau chü.

²⁵Puo siezedzürieko: Eliezer geinu puo nuou Rehabia, mu puo nuou Jeshaia, mu puo nuou Joram, puo nuou Zikri, mu puo nuou Shelomoth.

²⁶Shelomoth hau mu puo siezedzürieko bu mhama kereko kediu David, mu kikruko nu thekrüko mia nyie mho mu krie mho kezhako khakeshüko kemehoko chü.

²⁷Terhü nunu mhanya vakelieko se Jihova kiu meza chüketuo nu uko mhakhashü.

²⁸Süsie rei siedzekesiu Samuel, Kish nuou Saul, Ner nuou Abner, mu Zeruia nuou Joab khakeshü peteko chü kemesa pie Jihova ketsüko peteko Shelomoth[37] mu puo siezedzürieko bu meho.

²⁹Izharko, Kenania mu puo nuonuoko bu Israel la chazou kam kezha kecüko mu capiko chüketuo kedalie.

³⁰Hebronko Hashabia mu puo siezedzürieko mhachülie kevi themia nyie puo di krie thenie, hako bu Jordan khie niakratsa kediu lietho meho.

³¹Hebronko, Jeria sü Hebronko donu thephou shierei kiko nunu shierei kezhau zo. (David dikelie cie hiedia cie mia pfhükeshü nu Gilid nu Jazer nunu mhachü philieketuo themia ngulie).

³²David kediue puo mu puo siezedzürieko, mhachülie kevi themia nyie kenie di krie thenie, u krü kiko nu krütako kedapie Kepenuopfü ki nu lietho peteko la mu kediu nyie tsatie la rei Reubenko, Gadko mu tietsapuo Manassehko pete mehoketuo chü.